كارانتين الىنعان ساتتەن باستاپ قالا تۇرعىندارىن جۇمىسپەن قامتاماسىز ەتۋ ماسەلەسى وزەكتى بولماق. سپيكەرلەردىڭ ايتۋىنشا, الماتىدا حالىقتى جۇمىسپەن قامتۋ جانە جاپپاي كاسىپكەرلىكتى دامىتۋدى كوزدەيتىن «ەڭبەك» ارنايى مەملەكەتتىك باعدارلاماسى جۇزەگە اسىرىلۋدا. بۇل باعدارلاما حالىقتىڭ بارلىق توپتارىن جۇمىسقا ورنالاستىرۋ پايىزىن ارتتىرۋعا باعىتتالعان.
«ەڭ الدىمەن, اڭگىمە تۇراقتى جانە ۋاقىتشا جۇمىس ورىندارىنا جۇمىسقا ورنالاسۋ, سونداي-اق بيزنەس يدەيالاردى, ميكرونەسيەلەردى قولداۋ ءۇشىن مەملەكەتتىك گرانتتار ءبولۋ, كاسىپتىك وقىتۋ كۋرستارىندا وقىتۋ تۋرالى بولىپ وتىر», – دەپ اتاپ ءوتتى ديليارا يمانقۇلوۆا.
بۇل تۇرعىدا الماتىدا جۇمىس ورىندارىنىڭ قاجەتتى قورى بار. نۇر-سۇلتان مەن الماتى قالالارى بوس جۇمىس ورىندار سانى بويىنشا كوش باستاپ كەلەدى. بۇگىندە سلەسار, دانەكەرلەۋشى, تەمىر-بەتون قۇرىلىمدارىن قۇراستىرۋشى, ەلەكتريك, جۇرگىزۋشى, جۇك تيەۋشى, اۋلا سىپىرۋشى, گازبەن دانەكەرلەۋشى سياقتى جۇمىسشىلار كاسىپتەرى اسا سۇرانىسقا يە. سونداي-اق قىزمەت كورسەتۋ سالاسىنىڭ قىزمەتكەرلەرى مەن مەديتسينا قىزمەتكەرلەرىنە دە قاجەتتىلىك بار.
جۇمىسپەن قامتۋ ورتالىعىنىڭ ديرەكتورى ديليارا يمانقۇلوۆانىڭ ايتۋىنشا, «ەڭبەك» باعدارلاماسى اياسىندا ۋاقىتشا جۇمىس ورىندارىندا قىزمەت ەتەتىن جۇمىسسىزداردى قولداۋ جۇزەگە اسىرىلىپ وتىر.
الماتىدا قوعامدىق جۇمىستارعا قاتىسۋشىلارعا جالاقى تولەنەدى. ۇيىمداردىڭ تىزبەسىن, جۇمىس تۇرلەرىن, قاتىسۋشىلاردىڭ سانىن جانە تولەم مولشەرىن الەۋمەتتىك ءال-اۋقات باسقارماسى بەكىتەدى. باسقارما باسشىسىنىڭ بۇيرىعىمەن وسى ساناتتاعى قىزمەتكەرلەر ءۇشىن 85 مىڭ تەڭگە كولەمىندە جالاقى بەكىتىلدى. بۇگىنگى تاڭدا قالادا وسىنداي قىزمەتكەرلەر سانى – 2290 ادام. جوسپارلى كورسەتكىشتەردى تۇزەتۋگە سايكەس الماتىدا قوسىمشا 12 مىڭ قىزمەتكەردى قوعامدىق جۇمىسقا قابىلداۋ جوسپارلانىپ وتىر.
ء«بىز جۇمىس ىستەۋگە نيەت بىلدىرگەندەردىڭ بارلىعىن جىبەرۋگە دايىنبىز, – دەدى سپيكەر. – بۇل تەك كوشەلەردى, ساياباقتاردى, سكۆەرلەردى تازالاۋ عانا ەمەس, سونىمەن قاتار قارت ادامدارعا, مۇگەدەكتەرگە كومەك كورسەتۋ سياقتى جۇمىستار».
جۇمىسپەن قامتىلماعان تۇرعىندار مەن جۇمىس بەرۋشىلەر اراسىندا الەۋمەتتىك جۇمىس ورىندارى باسىمدىققا يە. جىل باسىنان بەرى الەۋمەتتىك جۇمىس ورىندارىندا 695 ادام جۇمىس ىستەيدى.
بۇل رەتتە مەملەكەت ەڭ تومەنگى جالاقىنى (42 500 تگ) سۋبسيديالايدى. ال جۇمىس بەرۋشى ءوز تاراپىنان قوسىمشا اقى بەلگىلەيدى. كەيدە ونىڭ مولشەرى 70-90 مىڭ تەڭگەنى قۇرايدى.
مەملەكەت ۇكىمەتتىك ەمەس ۇيىمداردا جۇمىس ىستەيتىن مۇگەدەكتەرگە ەرەكشە قامقورلىق كورسەتەدى. ولار ءۇشىن اكىمدىك شەشىمىمەن 63 750 تەڭگە جالاقى بەلگىلەنگەن. قازىرگى ۋاقىتتا الەۋمەتتىك جۇمىس ورىندارىندا 695 ادام جۇمىس ىستەيدى, ونىڭ ىشىندە 456-سى مۇگەدەكتەر.
