ايماقتار • 05 مامىر، 2020

«سونبەسىن، انا، شىراعىڭ…» رەسپۋبليكالىق جوباسى باستاۋ الدى

17 رەت كورسەتىلدى

«Atamnyn Amanaty» قوعامدىق بىرلەستىگى سوعىس جىلدارىنداعى ايەلدەر تۋرالى اقپارات جيناۋ باستاماسى جۇزەگە اسىرىلاتىن «سونبەسىن، انا، شىراعىڭ» جوباسىن ىسكە قوستى.

جوبا ماقساتى — تاريحي ەستەلىكتى، ۇرپاقتار ساباقتاستىعىن ساقتاۋ، جاستاردىڭ ءوز اۋلەتىنىڭ، حالقىنىڭ جانە ەلىنىڭ تاريحىن زەردەلەۋگە قىزىعۋشىلىن وياتىپ، ىقىلاسىن ارتتىرۋ، ولاردىڭ العىس پەن قۇرمەت سەزىمىن ەلجاندىلىق پەن ماقتانىش سەزىمىنە ۇلاستىرۋ.

بۇل جوبا ەكى ۇلى بىردەي مايدانعا كەتىپ، ورالماعان 1900 جىلعى باقىتجان ەڭسەباەۆانىڭ ءومىر تاريحىنان باستاۋ الدى.

«باقىتجان ەڭسەباەۆا 88 جىل عۇمىر كەشكەن ەكەن. ولە-ولگەنشە ول قوس بوزداعىن كورۋدەن كۇدەرىن ۇزبەپتى. سوعىس باستالعان شاقتا نەبارى 15-تە بولعان ۇلكەنى مايدانعا اتتانعانشا اسىق بولىپتى. قايتا-قايتا ارىز، ءوتىنىش جازىپتى، بىراق، تەك 1943 جىلى، 18-گە تولعاندا عانا سوعىسقا جونەلتىلىپ، ءبىر ايدان سوڭ-اق حابارسىز كەتىپتى. ەكىنشى ۇلى دا سوعىستا قازا تاۋىپتى»، دەپ اڭگىمەلەپ بەردى «Atamnyn amanaty» قب باسقارماسىنىڭ توراعاسى مۇرات مولداعاليەۆ.

مولداعاليەۆتىڭ ايتۋىنشا، باقىتجان ەڭسەباەۆا قامىستى اۋدانىنا قاراستى ۇرقاش كەنتىنىڭ ىرگەسىندەگى زيراتقا جەرلەنگەن. قازىر ول ەلدى مەكەندە ازىن-اۋلاق شاڭىراق قانا تۇرىپ جاتىر. وسى وتكەن جىلدارى باقىتجان ەڭسەباەۆانىڭ مولاسى قاراۋسىز قالىپتى، ويتكەنى، كوز قىرىن سالاتىن ادام قالماپتى.

ء«بىز قوستاناي وبلىسىنىڭ اكىمشىلىگىنە ءوتىنىش بىلدىردىك. اكىمنىڭ الەۋمەتتىك ماسەلەلەر جونىندەگى ورىنباسارى جۇندىباەۆ مارات كۇنىسباي ۇلىنىڭ، قامىستى اۋدانىنىڭ اكىمى بەكمۇحامەدوۆ عازيز ەربولات ۇلىنىڭ قولداۋىمەن مارقۇمنىڭ بەيىتىن قالپىنا كەلتىرىپ، اباتتاندىرۋ جۇمىستارى جۇرگىزىلدى. ءبىز ءارى قاراي دا وسىنداي تاريحي دەرەكتەردى جيناپ، بالكىم، مۇمكىندىك بولسا، ەسكە الۋ كەشتەرىن وتكىزۋدى، سونداي-اق، ۇلدارى/جارلارى/اكەلەرى مايدانعا اتتانىپ، حابار-وشارسىز كەتكەن ايەلدەر تۋرالى قۇجاتتى فيلمدەر سەرياسىن ءتۇسىرۋدى جوسپارلاپ وتىرمىز» – دەپ ويىن ورتاعا سالدى مۇرات مولداعاليەۆ.

«Atamnyn amanaty» قب بارشا قازاقستاندىقتاردى وسى جوباعا اتسالىسىپ، ۇلى وتان سوعىسىنا قاتىسقان اتا-اجەلەرى مەن تۋعان-تۋىستارى جايلى تاريحي وقيعالار مەن ەستەلىكتەرىن ورتاعا سالۋعا شاقىرادى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار