1944 جىل. سۇراپىل سوعىستىڭ سوڭعى جىلى. كەڭەس اسكەرى فاشيستەردى تۇرە قۋىپ, ەۋروپاعا جەتكەن. سول جىلدىڭ قاراشا ايىندا قازىرگى بۋراباي اۋدانىنىڭ تۋماسى ساتتار جاقانوۆقا دا شاقىرتۋ قاعازى كەلگەن. الدىندا عانا تۋعان اعاسى قان مايداندا قازا تاپسا كەرەك. ەندى مىنە, بوزبالا ساتتار دا سوعىسقا اتتاندى.
–ۆەنگريا, اۆستريا, گەرمانيا جەرلەرىندە بولدىم. 63 كۇن كۇنى-ءتۇنى سوعىسىپ, وسى ءۇش مەملەكەتتى ازات ەتتىك. مينومەتچيك بولدىم. رەيحستاگتىڭ تۇبىندە 90 كۇن سوعىستىق. قازىر سول ءبىر كەزدى ەسكە الۋدىڭ ءوزى وڭاي ەمەس. نەبىر قىرشىن جاس وپات بولدى,–دەيدى مايدانگەر.
مينومەتشى مايدانگەر رەيحستاگقا دەيىن جەتىپ, جەڭىس تۋى جەلبىرەگەن تاريحي ءساتتىڭ كۋاگەرى بولعان. كەڭەس وداعىنىڭ باتىرى راقىمجان قوشقارباەۆپەن ءبىر پولكتا بولعانىن ماقتانىش ەتەدى.
– راقىمجان قوشقارباەۆ ۆزۆود كومانديرى بولدى. ءبىر پولكتا, ءبىر باتالوندا بولدىق. سوعىستان سوڭ كەلىنى ۇيگە ىزدەپ كەلگەن. تاريحي وقيعانىڭ كۋاگەرى رەتىندە جادىمدا جاتتالعان جايدى ايتىپ بەرگەنمىن,–دەيدى مايدانگەر ساتتار جاقانوۆ.
ساتتار اتا وتان سوعىسىنىڭ ءى جانە ءىى دارەجەلى وردەندەرىمەن ماراپاتتالعان. مايداننان كەيىن ورمان شارۋاشىلىعىندا ەڭبەك ەتىپ, زەينەتكە شىققان. جۇبايى زەينيكامال – تىل ارداگەرى. قوس ارداگەر 9 بالا ءوسىرىپ-جەتكىزگەن. بۇگىندە نەمەرەلى, شوبەرەلى بولىپ وتىر.
كوكشەتاۋ قالاسى
