حالىقارالىق ازاماتتىق اۆياتسيا ۇيىمىنىڭ حابارلاۋىنشا, كۇزگە قاراي حالىقارالىق رەيستەردەگى اۆياجولاۋشىلاردىڭ جالپى سانى 1,2 ميلليارد ادامعا ازايۋى مۇمكىن. سالدارىنان ەۋروپا مەن ازيا-تىنىق مۇحيتىنىڭ اۋە كەڭىستىگى ۇشاقسىز قالىپ, بۇل باعىتتان تۇسەتىن تابىس ايتارلىقتاي كەميدى. ءدال وسىنداي جاعداي سولتۇستىك امەريكا ايماعىندا دا ورىن الادى دەپ كۇتىلۋدە. اسىرەسە جازعى ماۋسىمدا ەۋروپالىق ساياحاتشىلاردىڭ باسىم بولىگى ازيا-تىنىق مۇحيتى وڭىرلەرىنە ءجيى ءارى تۇراقتى قاتىنايتىن ەدى. بيىلعى جاعدايعا بايلانىستى جازدى جاعالاۋدا وتكىزەتىندەر سانى ەداۋىر كەميتىن ءتۇرى بار.
IATA باس ديرەكتورى الەكساندر دە جيۋنياكتىڭ ايتۋىنشا, الەم ساياحاتشىلارىنا جۇرگىزىلگەن ساۋالناما ناتيجەسىندە ساياحاتشىلاردىڭ 60%-ى COVID-19 پاندەمياسى سايابىرسىعاننان كەيىن ءبىر-ەكى اي ىشىندە ساياحاتقا ورالۋعا دايىن ەكەندىكتەرىن ايتسا, قالعانى جەكە قارجىلىق جاعدايلارى تۇراقتانعانشا ساياحاتقا ورالۋعا اسىقپايتىندارىن بىلدىرگەن. بۇل تىزىمدە قاۋىپسىزدىك ماسەلەسىن ءبىرىنشى ورىنعا قويىپ, ۇيدە وتىرۋدى ءجون سانايتىندار دا بار. اتالعان قاۋىمداستىق باسشىلىعى قايتكەن كۇندە دە بۇل جولعى داعدارىس اۋە كەڭىستىگىنىڭ تاسىمالداۋشىلارى ءۇشىن ۇلكەن اپوكاليپسيس, ابدەن تىعىرىققا تىرەلگەن شاق ەكەنىن ايتىپ, دابىل قاعۋدا. قاۋىمداستىق تاراپى جاعدايدىڭ ەڭ اۋىر كۇيىن سيپاتتايتىن بولجام ايتۋ ارقىلى اۆياكومپانيالارعا مەملەكەتتىڭ قولداۋى كەرەك ەكەنىن مەڭزەسە كەرەك. وسىنداي باتىل مالىمدەمەدەن كەيىن بىرقاتار ەلدىڭ اۆيا كومپانيالارعا جۇرگىزەتىن ساياساتىندا سەڭ قوزعالا باستاعانداي. مىسالى, كولۋمبيا بيلىگى اۆيابيلەتتەرگە, اۆياوتىن جانە تۋريزم سالاسىنا كومەك كورسەتۋ ءۇشىن كەشەندى شارالار پاكەتىن ەنگىزىپ, العاشقى جەڭىلدىك رەتىندە سالىقتان بوساتىپ وتىر. ال گونكونگ بيلىگى 2 ميلليارد گونكونگ دوللارىنا الدىن الا اۋەكومپانيالارىنىڭ 500 000 بيلەتىن ساتىپ الىپ, قالعان قاراجاتقا قوسىمشا شىعىنداردى وتەپ بەرگەن. سەنەگال بيلىگى تۋريزم جانە اۋە كولىگى سەكتورى ءۇشىن 128 ميلليون اقش دوللارىن بولەتىندەرىن مالىمدەگەن بولاتىن. ەۋروپادا اقپان مەن مامىر ارالىعىندا جانە كەلەر جىلعا دەيىن اەروناۆيگاتسيالىق قىزمەت كورسەتۋ ءۇشىن تولەنۋى ءتيىس 1,1 ملرد ەۋرو كەيىنگە شەگەرىلىپ وتىر.
̶ بۇكىل الەمنىڭ اۆياكومپانيالارى ء«ومىر ءسۇرۋ» ءۇشىن كۇرەسۋدە. كەز-كەلگەن ەلگە ەكونوميكانى تۇراقتاندىرىپ, سالىق تولەپ تۇرۋ ءۇشىن «ومىرشەڭ» اۋە كەمەلەرى كەرەك. ولار ارينە باسەكەگە قابىلەتتى بولۋى ءتيىس. وسىنى ەسكەرىپ, قانداي دا ءبىر كومەك كورسەتكەن مەملەكەتتەر بار. بۇل الدىمەن قانشاما جۇمىس ورىندارىن ساقتاپ قالاتىن ماڭىزدى قادام بولماق, ̶ دەدى الەكساندر دە جيۋنياك تاياۋدا باق وكىلدەرىمەن كەزدەسۋ بارىسىندا. ونىڭ جيىندا جاساعان بايانداماسىندا داعدارىسقا بايلانىستى جولاۋشىلار تابىسىنىڭ 314 ميلليارد دوللارعا كەميتىنى, 25 ميلليون جۇمىس ورنىنىڭ كەمۋى مۇمكىن ەكەنى, ءتىپتى, كەيبىر اۋە كومپانيالارىنىڭ داعدارىسقا شىداس بەرمەي, جۇمىسىن توقتاتۋى مۇمكىن ەكەنى ايتىلدى. سونىمەن قاتار, كۇردەلەنگەن ماسەلەنى شەشۋ ءۇشىن قاۋىمداستىق ديرەكتورى اۆياكومپانيالارعا مەملەكەت تاراپىنان قانداي كومەك كورسەتىلۋى كەرەك ەكەنىن دە اشىق ايتتى.
̶ بۇل سالاعا تىكەلەي قارجىلىق كومەك قاجەت. نەسيە, نەسيە بويىنشا كەپىلدىك بەرۋ جانە ۇكىمەت پەن ورتالىق بانكتەردىڭ كورپوراتيۆتىك وبليگاتسيالار نارىعىن قولداۋى ماڭىزدى بولماق. سونىمەن قاتار, بۇل سالاعا جاپپاي سالىقتىق دەمالىس جاريالاۋ قاجەت. ويتكەنى, اۋەدە ۇشاقتار ۇشپايدى, تابىس كوزى جوق, ̶ دەيدى IATA باس ديرەكتورى.
وسى رەتتە, جولاۋشىلاردىڭ قاۋىپسىزدىك ماسەلەسىنە ايتارلىقتاي ءمان بەرۋ كەرەكتىگى, ءار مەملەكەت بۇل باعىتتا ءوز جوسپارىن دايىنداۋى قاجەتتىگىن دە باسا ايتادى.
̶ اۆياتسيا سالاسىنا ءتيىمدى بولاتىن ارنايى عىلىمي زەتتەۋلەر جۇرگىزۋ كەرەك دەپ سانايمىز. وسى ماقساتتا ءبىزدىڭ قاۋىمداستىق دۇنيەجۇزىلىك دەنساۋلىق ساقتاۋ جانە حالىقارالىق ازاماتتىق اۆياتسيا ۇيىمىمەن تىعىز بايلانىس ورناتۋدا. تەك جولاۋشىلاردىڭ دەنساۋلىعى عانا ەمەس, اۆياتسيا سالاسىنداعى قىزمەتكەرلەردىڭ دەنساۋلىعى دا باستى نازاردا بولۋى كەرەك, ̶ دەدى الەكساندر دە جيۋنياك.
