قۇرمەتتى وتانداستار!
بارشاڭىزدى قازاقستان حالقىنىڭ بىرلىگى كۇنىمەن شىن جۇرەكتەن قۇتتىقتايمىن!
بۇل مەيرام ۇلتتىق بولمىسىمىزدى ايقىندايتىن اسىل قاسيەتتەرىمىز – دوستىقتى, سەنىمدى جانە ءپاتريوتيزمدى دارىپتەيدى.
مەن شيرەك عاسىر بۇرىن وسى مەرەكەنى بەلگىلەۋ تۋرالى شەشىم قابىلداعان ەدىم. وتكەن جىلدار ىشىندە ءبىز ەلىمىزدىڭ كوپۇلتتى جانە كوپكونفەسسيالى قۇرىلىمىن ستراتەگيالىق ارتىقشىلىعىمىزعا اينالدىرا الدىق.
قازاقستان بەرەكە-بىرلىكتىڭ ارقاسىندا ءتۇرلى قيىندىقتى ەڭسەرىپ, بۇكىل الەمنىڭ قۇرمەتىنە بولەندى جانە مەملەكەت قۇرۋ ىسىندە زور جەتىستىككە جەتتى.
بەيبىتشىلىك پەن قوعامدىق كەلىسىم ءاردايىم ەلدىگىمىزدى بەكەمدەيتىن قاستەرلى قۇندىلىعىمىز بولىپ قالا بەرەدى.
ءبىز بيىل قازاقستان حالقى اسسامبلەياسىنىڭ 25 جىلدىعىن اتاپ وتەمىز. بۇل – بارلىق ەتنوس وكىلدەرىن مەملەكەت قۇرۋشى ۇلتتىڭ توڭىرەگىنە توپتاستىراتىن جانە تاۋەلسىزدىگىمىزدى نىعايتۋعا ىقپال ەتەتىن بىرەگەي ينستيتۋت.
حالقىمىزدىڭ ىرىس-ىنتىماعى تاريح پەن تاعدىر سىيى عانا ەمەس, ارقايسىمىزدىڭ ەرەن ەڭبەگىمىز بەن زور جاۋاپكەرشىلىگىمىزدىڭ ناتيجەسى.
بىرلىك كۇنى بيىل ادەتتەن تىس جاعدايعا تۇسپا-تۇس كەلىپ وتىر. بۇكىل الەمدى جايلاعان ىندەت ءبىزدىڭ ەلىمىزدى دە ابىگەرگە سالدى.
بۇل سىناقتان دا سۇرىنبەي ءوتىپ, كۇش-قۋاتىمىزدى ودان ءارى ارتتىرا تۇسەمىز دەپ سەنەمىن. وسى جولدا دوستىق, بىرلىك, كەلىسىم جانە ءوزارا قولداۋ قاعيداتتارىن بەرىك ۇستانعانىمىز ابزال.
بارشاڭىزعا مىقتى دەنساۋلىق پەن باق-بەرەكە, ەلىمىزگە تاتۋلىق پەن تولاعاي تابىس تىلەيمىن!
