سۋرەتتى تۇسىرگەن ەرلان ومار, «EQ»
ال يسلام شارتىندا مۇسىلماننىڭ كوركى ونىڭ كوركەم مىنەزى دەلىنگەن. اللانىڭ ەلشىسى مۇحاممەد (س.ع.س) ءوزىنىڭ پايعامبارلىق مىندەتى جايلى ايتقاندا: «مەن كوركەم مىنەزدى تولىقتىرۋ, ورناتۋ ءۇشىن كەلدىم», دەگەن ساحيق ءحاديسى بار.
بىردە پايعامبارعا ءبىر ادامنىڭ كۇندىز ورازا تۇتىپ, تۇندە عيبادات ەتەتىندىگى, بىراق مىنەزى جامان ەكەندىگى, كورشىلەرىنە, دوستارىنا ۇنەمى ءتىل تيگىزەتىندىگى تۋرالى ايتىلعان كەزدە اللانىڭ ەلشىسى: «بۇل دۇرىس ەمەس. ەگەر ول ادام مىنەزىن تۇزەمەسە, باراتىن جەرى – توزاقتىڭ وتى», دەگەنى جايلى ءسوز بار.
كوركەم مىنەز تۋرالى پايعامبارىمىزدان (س.ع.س.) بىزگە جەتكەن وسيەت-حاديستەردە:
- عيباداتتارى از بولعان قۇل جاقسى كوركەم مىنەزىمەن قيامەتتە جوعارى دارەجەلەرگە جەتەدى;
- عيباداتتاردىڭ ەڭ وڭايى جانە ەڭ پايدالىسى – از سويلەۋ جانە كوركەم مىنەزدى بولۋ;
- قۇلدىڭ عيباداتتارى كوپ بولسا دا جامان مىنەزى ونى توزاقتىڭ تۇبىنە تۇسىرەدى, كەيدە كۇپىرلىككە اپارادى;
- جاقسى مىنەزدى ادام دۇنيە مەن اقىرەتتىڭ باقىتىنا قاۋىشادى;
- كەلبەتى مەن مىنەزى جاقسى ادام توزاق وتىنا جانبايدى;
- وزىنەن الىستاعاندارعا جاقىنداۋ, ز ۇلىمدىق جاساعانداردى كەشىرۋ, وزىنە ەشتەڭە بەرمەگەندەرگە سىي كورسەتۋ – جاقسى مىنەزدى بولۋدىڭ ءدال ءوزى;
- جاقسى مىنەزدى ادام دەنەسىنە, مالىنا, نامىسىنا زيان كەلتىرگەن ادامدى كەشىرەدى;
- اشۋلانعان كەزدە جۇمساق ارەكەت جاساعان ادامنىڭ جۇرەگىن اللا تاعالا سەنىمدىلىك پەن يمانعا تولتىرادى;
- جاماندىق جاساعانعا جاقسىلىق جاساۋ – ەڭ جاقسى مىنەز;
- كوركەم مىنەز ادامدى كەمەلدىككە باستايدى;
- مىنەزى جاقسى ادام دۇشپاندى دوسقا اينالدىرادى, ت.ب. دەلىنگەن.
سول سياقتى حالقىمىزدىڭ «جاقسىلىققا جاقسىلىق – ءار كىسىنىڭ ءىسى. جاماندىققا جاقسىلىق – ەر كىسىنىڭ ءىسى» دەگەنى نەمەسە اباي اتامىزدىڭ 18-ءشى قاراسوزىندە ايتىلعان: «ادام بالاسى ادام بالاسىنان اقىل, عىلىم, ار, جاقسى مىنەز دەگەن نارسەلەرمەن وزباق. ونان باسقا نارسەمەنەن وزدىم عوي دەمەكتىڭ ءبارى دە – اقىماقتىق», دەگەنى جوعارىداعى حاديس-شاريفتەرمەن ۇندەسىپ جاتقان جوق پا؟!
