– نۇرجان دىنىقۇل ۇلى, ءسىزدىڭ سپورتتىق جولىڭىز وتە جارقىن باستالدى. ولاي دەۋگە نەگىز, 1987-1990 جىلدار ارالىعىندا جاسوسپىرىمدەر مەن جاستار اراسىندا وتكەن كسرو بىرىنشىلىكتەرىنە ءتورت مارتە قاتىسىپ, بارلىعىندا باس جۇلدەنى ولجالادىڭىز. مۇنداي وراسان تابىستاردىڭ تەگىن كەلمەيتىنى بەلگىلى. سول قۇپياڭىزبەن بولىسسەڭىز.
– ونىڭ ەش قۇپياسى جوق. بىلعارى قولعاپتى العاش كيگەن كۇننەن باستاپ باعىت-باعدارىمدى انىق ايقىنداپ الدىم. جاتتىعۋ بارىسى نەمەسە جارىس كەزىندە ايانىپ, تارتىنىپ قالعان كەزىم جوق. ماقسات تاۋىنا شىعۋ جولىندا بارىمدى سالدىم. باعىما وراي, نۇرعالي سافيۋللين مەن حايرتىن فايزۋللين سىندى بىلىكتى باپكەرلەردەن ءتالىم-تاربيە الۋ باقىتى بۇيىردى. ۇستازدارىمنىڭ ءار تاپسىرماسىن بۇلجىتپاي ورىندادىم. ايتقان ءار اقىل-كەڭەسىنە قۇلاق استىم. ءبىر سوزبەن ايتسام, ءوزىم تاڭداعان كاسىپكە بارىنشا ادال بولۋعا تىرىستىم. ال جاتتىعۋ زالىندا توگىلگەن تەردىڭ زايا كەتپەيتىنى بەلگىلى عوي. شەبەرلىگىم تولىسا كەلە, ءوز قاتارىمنىڭ الدى بولدىم. اۋەلى وبلىستىق, ىلە-شالا رەسپۋبليكالىق دودالاردا دارالاندىم. سودان كەيىن بۇكىلوداقتىق جارىستاردا ەل نامىسىن قورعاۋ قۇرمەتىنە بولەندىم. العاشىندا جاسوسپىرىمدەردىڭ لۆوۆ پەن دونداعى, روستوۆتا وتكەن كسرو بىرىنشىلىكتەرىندە توپ جاردىم. ودان كەيىن شىمكەنت پەن يركۋتسكىدە ۇيىمداستىرىلعان جاستار اراسىنداعى جارىستا جوعارىداعى ناتيجەنى قايتالادىم. سول باسەكەلەردىڭ ەكەۋىندە ەڭ ۇزدىك بوكسشىعا تيەسىلى ارنايى سىيلىققا يە بولدىم.
– بۇكىلوداقتىق دودالاردا دارالانعان سپورتشىعا حالىقارالىق ارەناعا داڭعىل جولدىڭ اشىلاتىنى بەلگىلى. ال شەتەلدەگى العاشقى قادامدارىڭىز قالاي بولدى؟
– جوعارىداعى جەڭىستىڭ ارقاسىندا 1990 جىلى جاستار اراسىندا وتكەن ەكى بىردەي ءدۇبىرلى دوداعا قاتىستىم. شىلدە ايىندا چەحوسلوۆاكيانىڭ ۋستيا-ناد-لابوي قالاسىندا ۇيىمداستىرىلعان ەۋروپا بىرىنشىلىگىندە 63,5 كيلو سالماق دارەجەسىندە ونەر كورسەتىپ, التىن تۇعىرعا كوتەرىلدىم. جارىس قورىتىندىسى بويىنشا ەڭ ۇزدىك بوكسشى بولىپ تانىلدىم. قازان ايىندا وڭتۇستىك امەريكاعا اتتاندىق. پەرۋدىڭ استاناسى – ليمادا وتكەن الەم بىرىنشىلىگىندە 67 كيلو سالماقتا جۇدىرىقتاسىپ, كۇمىس مەدالدى يەلەندىم. فينالدىق سايىستا كۋبالىق اريەل ەرناندەسكە ەسە جىبەردىم. بوستاندىق ارالىنىڭ وكىلى ۋاقىت وزا وليمپيادا ويىندارى مەن الەم چەمپيوناتىنىڭ ەكى دۇركىن جەڭىمپازى اتاندى.
– 1987 جىلى العاش رەت وداق بىرىنشىلىگىندە توپ جارىپ, نەبارى 15 جاسىڭىزدا كسرو سپورت شەبەرىنىڭ كۇمىس بەلگىسىن كەۋدەڭىزگە تاقتىڭىز. سوندا حالىقارالىق دارەجەدەگى سپورت شەبەرى ءنورماتيۆىن ەۋروپا بىرىنشىلىگىندە ورىندادىڭىز با؟
– جوق, بۇل اتاققا ءسال ەرتەرەك قولىم جەتتى. 1988 جىلى بولگاريانىڭ حاسكوۆو قالاسىندا «دوستىق» ويىندارى ءوتتى. بۇل – سوتسياليستىك باعىتتاعى مەملەكەتتەردىڭ وليمپياداسىنا بالانعان جارىس. سول كەزدە شەتەلگە تۇڭعىش رەت شىعىپ تۇرعانىما قاراماستان بارلىق قارسىلاسىمدى سىپىرا ۇتىپ, فينالدا حەكتور ۆينەنتپەن كۇش سىناستىم. بۇل باسەكەدە قارسىلاسىمنىڭ قاباعىن جارىپ, ايقىن جەڭىسكە جەتتىم. ۆينەنت تە كەيىن كەرەمەت ناتيجەلەرگە قول جەتكىزدى. ول – بارسەلونا مەن اتلانتا وليمپياداسىندا جانە تامپەرە مەن بەرليندەگى الەم چەمپيوناتتارىندا الدىنا جان سالمادى. ال مەن وسى جەڭىستىڭ ارقاسىندا حالىقارالىق دارەجەدەگى سپورت شەبەرى ءنورماتيۆىن ورىندادىم. بۇل مارتەبەلى اتاق ماعان 16 جاسىمدا بۇيىردى.
– جاستار اراسىنداعى جارىستاردا قارسىلاس شىداتپاعان بوكسشىعا ەرەسەكتەر دۋىنا قوسىلۋ دا ايتارلىقتاي قيىندىق تۋعىزا قويماعان شىعار؟
– ەرەسەكتەر دۋىنا قوسىلعاننان كەيىن دە ناتيجەم جامان بولعان جوق. 1991 جىلى رۋمىنيادا وتكەن «التىن بەلبەۋ» تۋرنيرىندە توپ جاردىم. سودان كەيىن كسرو حالىقتارى سپارتاكياداسىنا قاتىستىق. مينسكىدە جالاۋى جەلبىرەگەن جارىستا كۇمىس مەدالدى ەنشىلەدىم. نەگىزى, فينالدىق ايقاستا جەڭىلمەگەن ەدىم. بىراق ادىلدىكتى بەلدەن باسقان تورەشىلەر مەنى رەسەي وكىلى اندرەي پەسترياەۆقا «جىعىپ بەردى».
– 1991 جىلى الماتىدا قازاق مەملەكەتتىك تەلە-راديو كوميتەتىنىڭ جۇلدەسى ءۇشىن وتكەن حالىقارالىق تۋرنيردە نەبىر دۇلدۇلدەردىڭ جينالعانى ەسىمىزدە. اسىرەسە 67 كيلو سالماق دارەجەسىندە باسەكەلەستىك وتە كۇشتى ەدى. سولاردىڭ اراسىنان ءسىزدىڭ شوقتىعىڭىز بيىك بولدى. ايتۋلى جارىستى جادىڭىزدا ءجيى جاڭعىرتىپ تۇراتىن شىعارسىز...
– ءسىز اڭگىمەلەپ وتىرعان جارىستا ءۇش بىردەي دۇلدۇلمەن كۇش سىناستىم. العاشقى اينالىمدا تالعات بەردىبەكوۆتەن باسىم ءتۇستىم. ودان كەيىن اركادي توپاەۆتى تىزە بۇكتىردىم. اقتىق سىندا ەرماحان ىبىرايىموۆتىڭ وسال تۇسىن تاپتىم. جوعارىدا اتالعان بوكسشىلاردىڭ بارلىعىنىڭ دا ەسىمدەرى جانكۇيەرلەرگە جاقسى تانىس. ولاردى ەش كۇمانسىز ۇتتىم. ەگەر مەنىڭ سوزىمە كۇماندانساڭىز وسى باسەكەلەردى عالامتوردان قايتالاپ كورۋىڭىزگە بولادى.
– وعان ەش كۇمان جوق. سىزدەن جەڭىلگەننەن كەيىن قارسىلاستارىڭىزدىڭ بارلىعى دا وزگە سالماقتارعا اۋىسقانى بىزگە ءمالىم. سول تۇستا ءداۋىرىڭىز ءجۇرىپ تۇرسا دا, بارسەلونا وليمپياداسىنا بارا المادىڭىز. نەگە؟
– قىرسىق دەگەن اياقاستى ەمەس پە؟! سول كەزدەرى سوزىلمالى برونحيت دەگەن اۋرۋ جابىستى. سول سىرقاتتىڭ كەسىرىنەن تامبوۆتا ۇيىمداستىرىلعان تمد چەمپيوناتىنا قاتىسا المادىم. ال ىرىكتەۋدەن وتپەگەن سپورتشىنىڭ بايراقتى باسەكەگە قاتىسپايتىنى بەلگىلى عوي.
– تاۋەلسىزدىككە قول جەتكىزگەننەن كەيىن قازاقستاننىڭ بىلعارى قولعاپ شەبەرلەرى ازيادا الدارىنا جان سالماي, دۇنيەجۇزىلىك دودالاردا دارالانا باستادى. ءسىز بەس جىل بويى سول جۇلدىزدى كوماندانىڭ كاپيتانى بولدىڭىز. سول كەزدەن باستاپ, اتلانتا وليمپياداسىنا دەيىنگى ارالىقتا قانداي بەلەستەردى باعىندىردىڭىز؟
– 1994 جىلى تەھراندا ازيا چەمپيونى اتانىپ, حيروسيمادا الاۋى تۇتانعان ازيا ويىندارىندا باس جۇلدەنى قانجىعاما بايلادىم. جاپونياداعى جارىستان سوڭ ەلىمىزگە ەڭبەك سىڭىرگەن سپورت شەبەرى اتاعىن الدىم. ايتۋلى دودالاردىڭ ەكەۋىندە دە ەڭ ۇزدىك بوكسشىعا تيەسىلى ارنايى سىيلىقتى يەلەندىم. باسقا دا بىرقاتار اسا ءىرى حالىقارالىق تۋرنيردە توپ جاردىم. 1995 جىلى تاشكەنتتە وتكەن ازيا چەمپيوناتىندا كۇمىس مەدالدى موينىما ءىلدىم.
– نۇرجان, وسى جەردە ءسوزىڭىزدى بولەيىن. سوعان دەيىنگى جارىستاردا وزبەكستاندىق ناريمان اتاەۆتى ەش قينالماي ۇتىپ جۇرگەن ەدىڭىز. بىراق تاشكەنت تورىندە ەسە جىبەردىڭىز...
– تاشكەنتتە دە اتاەۆتى «ويناپ-ك ۇلىپ» ءجۇرىپ-اق ۇتاتانىما كۇمانىم جوق ەدى. بىراق فينالدىق ايقاستا الدەكىمدەر تۇلا بويىمدى دۋالاپ تاستاعانداي كۇي كەشتىم. سەنسەڭىز, رينگكە قالاي كوتەرىلگەنىمدى جانە باسەكەنىڭ قالاي وربىگەنىن دە بىلمەيمىن. ايتەۋىر, ايقاس اياقتالىپ, كيىم اۋىستىراتىن بولمەگە جەتكەندە عانا ەسىمدى جيدىم. سول كەزدە تۋعان اعام نۇرلان مەن باپكەرىم نۇرعالي سافيۋللين «ساعان نە بولدى؟ تىپتەن, قارسىلاسىپ جارىتپادىڭ عوي» دەپ سۇراۋلى جۇزدەرىمەن قارايدى. مەن ءۇنسىزبىن. نە دەپ جاۋاپ بەرەرىمدى دە بىلمەيمىن. ەلگە ورالعاننان كەيىن بەينەتاسپانى كوردىم. ماسقارا! باسەكە بارىسىندا ناريمان مەنى نوكداۋنعا جىبەرگەن ەكەن. ءىشىم ۋداي اشىپ, جىلاپ جىبەرە جازدادىم. كەيىن ءبىلدىم, قارسىلاسىم قارا ماگياعا قاتىسى بار ادامنىڭ كومەگىنە جۇگىنىپتى. ءزاۋلىم سپورت كەشەنىنىڭ ءبىر بۇرىشىنا جايعاسقان ايەل ادام باسەكەنىڭ باسىنان اياعىنا دەيىن مەنى دۋالاپ وتىرىپتى. بۇل جايتتى ماعان كەيىن وزبەكتەردىڭ وزدەرى ايتتى.
– 1996 جىلى اتلانتا وليمپياداسىندا كۇللى قازاق جۇرتى سمانوۆقا ەرەكشە سەنىم ارتتى. الايدا ءسىز جەڭىس تۇعىرىنا سىنىق-سۇيەم قالعاندا ءسۇرىندىڭىز. نە جەتپەدى دەپ ويلايسىز؟
– جارىستى جاپ-جاقسى باستاعان ەدىم. العاشقى اينالىمدا اۋستراليانىڭ وكىلىن ەكىنشى راۋندتا ۇرىپ جىعىپ, كەلەسى كەزەڭدە پاكىستاندىقتى ويسىراتا ۇتتىم. الايدا شيرەك فينالدا جولىم حۋان ەرناندەسپەن قيىستى. شىنى كەرەك, بارسەلونا وليمپياداسىنىڭ كۇمىس جۇلدەگەرى, ءۇش دۇركىن الەم چەمپيونى دەگەن اتاعى بار ايگىلى كۋبا بوكسشىسىنا ءالىم جەتپەدى.
– بايىپتاپ قاراساق, وليمپيادا ويىندارى مەن الەم چەمپيوناتىندا كوبىنە-كوپ ءسىزدىڭ جولىڭىزدى بوگەگەن حۋان ەرناندەس ەكەن. سوندا كۋبا قابىلانىنىڭ وسال تۇسىن تابۋعا ەش مۇمكىندىك بولمادى ما؟
– ءيا, 1993 جىلى تامپەرە مەن 1997 جىلى بۋداپەشتە وتكەن الەمدىك دودادا جانە 1996 جىلى اتلانتا وليمپياداسىندا ءداپ سول بىلعارى قولعاپ شەبەرىنەن ۇتىلدىم. نەسىن جاسىرايىن, كەزىندە ول وتە مىقتى بوكسشى بولدى. وزدەرىڭىزگە ءمالىم, 1998-1999 جىلدارى ارالىعىندا كۋبا قۇراماسى قازاقستانعا كەلىپ, قوس كوماندا بىرلەسكەن وقۋ-جاتتىعۋ جيىندارىن وتكىزدى. سول كەزدە حۋان ەرناندەسپەن بەس رەت سپارينگكە شىقتىم. بەس كەزدەسۋ دە مەنىڭ پايداما شەشىلدى. تىپتەن, ءبىر رەت وڭباي ەسەڭگىرەتىپ تە تاستادىم. اتاعى الىسقا جايىلعان حەكتور ۆينەنت پەن روبەرتو گۋەرونى دا جاقسىلاپ تۇرىپ ساباعانمىن. ارينە رەسمي جارىستاردا ۇتپاعاننان كەيىن ونداي جەڭىستەردىڭ اسا ءبىر جەلپىندىرمەيتىنى انىق قوي. بىراق سول جيىنداردان سوڭ اسا جاۋاپتى جارىستاردىڭ شەشۋشى تۇستارىندا نەگە ەسەم كەتىپ جۇرگەنىن ءتۇسىندىم. بارلىعى دا شەكتەن تىس سالماق قۋعاننان ەكەن. ءار جارىس قارساڭىندا كەمىندە ءتورت-بەس كيلودان ارىلاتىنمىن. ال سالماق قۋعان سايىن بويداعى كۇش-قۋات كەميدى. بالكىم, كەيبىرەۋلەرگە قايتا قالپىنا كەلۋ قيىندىق تۋعىزبايتىن شىعار. ال ماعان بابىما كەلۋ وتە قيىن ەدى. سونىڭ زاردابىن تارتىپ ءجۇرىپپىن. مىنە, بارلىق گاپ وسىدا ەكەن.
– ولاي بولسا, 71 كيلو سالماق دارەجەسىنە اۋىسۋىڭىزعا نە كەدەرگى بولدى؟
– 1997 جىلى ازيا چەمپيونى اتانعاننان كەيىن 71 كيلو سالماق دارەجەسىندە كۇش سىناسۋعا بەل بۋدىم. العاشىندا اياقالىسىم جامان بولعان جوق. 1998 جىلى قوستانايدا ەل چەمپيونى اتاندىم. سول ارالىقتا ەرماحان ىبىرايىموۆ 75 كيلو سالماققا اۋىسىپ ۇلگەردى. ول دا قوستانايدا باس جۇلدەنى ولجالادى. كوپ ۇزاماي شىمكەنتتە سەرىك قوناقباەۆتىڭ جۇلدەسى ءۇشىن حالىقارالىق ءتۋرنيردىڭ جالاۋى جەلبىرەدى. اقىرى سول جەردە ەكەۋمىزدىڭ جولىمىز قيىستى. فينالدىق سايىستا مەن ەرماحاندى ۇتتىم. ازيا ويىندارى قارساڭىندا الماتىدا ەسكەندىر حاسانوۆتىڭ ءتۋرنيرى ءوتتى. باستاپقى باسەكەلەردە ءوز قارسىلاستارىمنان باسىم ءتۇسىپ, جارتىلاي فينالعا جولداما الدىم. كەلەسى كۇنى قوناق ۇيدەن شىعىپ, بالۋان شولاق اتىنداعى سپورت سارايىنا بارۋعا باعىتتالعانىمدا جول تورىعان بەلگىسىز بىرەۋلەر بەتىمە ۋلاندىرعىش زات سەۋىپ, كولىككە وتىرعىزىپ, ايدالاعا اپارىپ تاستاپ كەتتى. بىرەر ساعاتتان سوڭ ەسىمدى جيسام, پانفيلوۆ ساياباعىندا جالعىز جاتىر ەكەنمىن. جارىس الدەقاشان اياقتالىپ قويعان. وسى وقيعادان سوڭ كوپكە دەيىن ءوز-وزىمە كەلە الماي ءجۇردىم. مەن ەشۋاقىتتا بىرەۋدىڭ الا ءجىبىن اتتاپ كورمەگەن ەدىم. ەشكىمگە قيانات جاساعان دا ەمەسپىن. وزىمشە «نە بولسا دا, جاۋ الىستان كەلگەن جوق. وسىنداي ارسىزدىققا بارعاندار بوكستىڭ توڭىرەگىندە جۇرگەن نيەتى قارا, پيعىلى ارام ادامدار» دەپ توپشىلادىم.
– ءيا, ول وقيعادان قۇلاعدارمىز. سول تۇستا رەسپۋبليكالىق باسىلىمداردىڭ بىرىندە سپورت تاقىرىبىنا قالام تارتىپ جۇرگەن كورنەكتى جۋرناليست باقتيار تايجاننىڭ «نۇرجانعا قول سالعانى, ەر جىگىتتىڭ ازعانى» دەگەن ماقالا جارىق كوردى ەمەس پە؟
– جوعارىداعى جاعدايدان كەيىن جۇيكەمە سالماق تۇسكەنى بىلاي تۇرسىن, دەنساۋلىعىم دا سىر بەرە باستادى. بىرەر كۇننىڭ ىشىندە قاتتى ازىپ كەتتىم. قايتا جاتتىعۋ زالىنا كەلىپ, دايىندىقتى باستاعان ەدىم, سالماعىم 68 كيلودان كوتەرىلمەي قويدى. امالدىڭ جوقتىعىنان, ۇيرەنشىكتى سالماعىما قايتا ورالدىم. 1998 جىلى الماتىدا كۋبا مەن قازاقستان قۇرامالارى اراسىندا جولداستىق كەزدەسۋى ءوتتى. مەن 67 كيلو سالماقتا روبەرتو گۋەررونى ايقىن باسىمدىقپەن جەڭىپ, ەڭ ۇزدىك بوكسشى اتاندىم. كوپ ۇزاماي بانگكوكتا الاۋى تۇتانعان ازيا ويىندارىنا اتتانىپ, ەلگە كۇمىس مەدالمەن ورالدىم. نەگىزى فينالدا دا جەڭگەن ەدىم. قارسىلاسىمدى ءۇش راۋند بويى اۋىر سوققىلاردىڭ استىنا العانىممەن, تورەشىلەر جەرگىلىكتى بوكسشىنىڭ «ىعىنا جىعىلدى». كوپ كەشىكپەي حيۋستونداعى الەم چەمپيوناتىندا كۇش سىناسىپ, شيرەك فينالدا ويدا-جوقتا يتاليالىق لەونارد بۋندۋدان ۇتىلدىم. سودان كەيىن بىلعارى قولعابىمدى شەگەگە ءىلدىم.
– سول كەزدە ءسىز جالىنداپ تۇرعان 27 جاستا ەدىڭىز. جوعارىدا اتالعان سالماقتاردىڭ ەكەۋىندە دە ەلشىلىك جارىستاردا ەشكىمگە ەسە جىبەرمەي ءجۇردىڭىز. بىراق ءدال تاشكەنتتەگى ليتسەنزيالىق ازيا چەمپيوناتى قارساڭىندا ۇلكەن سپورتتان قول ءۇزۋدى قۇپ كورگەن ەكەنسىز. نەگە؟ الدا سيدنەي وليمپياداسى مەنمۇندالاپ تۇرعان ەدى عوي...
– بۇل اياق استى قابىلدانعان شەشىم ەمەس. سۇيىكتى كاسىبىمنەن بىردەن قول ءۇزىپ كەتۋ ماعان وڭاي بولعان جوق. وتكەنگە زەر سالسام, جۇدىرىقتاسۋ ونەرىنە 15 جىل عۇمىرىمدى ارناپپىن. التى جىل بويى كسرو قۇراماسىندا بولسام, جەتى جىل قازاق ەلىنىڭ تۋى استىندا ونەر كورسەتتىم. سول ۋاقىت ارالىعىندا 52 مەدالعا قول جەتكىزدىم: 35 التىن, 9 كۇمىس جانە 8 قولا. جارىس, جاتتىعۋ جيىندارى دەپ ءجۇرىپ, ءۇي كورمەدىك. ونداي تىنىمسىز تىرلىك ادامدى جالىقتىرادى ەكەن. اعزا دا, جۇيكە دە شارشايدى. بۇرىندارى كۇش-قۋاتىم بويىما سىيماي, ءار جەكپە-جەككە قۇشتارلانىپ شىعاتىنمىن. سوڭعى كەزدەرى قۇلشىنىس كەمي باستادى. سەنسەڭىز, كەيىنگى ۋاقىتتا جاتتىعۋ زالىنا ءوز-ءوزىمدى قيناعانداي بولىپ باراتىنمىن. ءيا, سيدنەيگە ساپار شەگۋگە مۇمكىندىگىم بولدى. تاشكەنتتە دە ازيانىڭ الدى بولىپ, جولداماعا يەلىك ەتۋگە كۇش-قۋاتىم جەتەتىنىنە ەش كۇمانىم جوق. بىراق 67 كيلو سالماق دارەجەسىندە سىنعا تۇسسەم, وليمپيا ويىندارىندا الىسقا شاپپايتىنىمدى ىشتەي سەزىندىم. ال سيدنەيگە جاي تۋريست رەتىندە بارۋعا ارىم جىبەرمەدى. ال 71 كيلو سالماقتا ەرماحان ىبىرايىموۆ بار. ونىڭ ۇستىنە, ەرماحان بۇل سالماققا ابدەن بەيىمدەلىپ قالدى. قول جەتكىزگەن تابىستارى دا قوماقتى. ءبىر جاعىنان دوسىمنىڭ جولىن بوگەگىم كەلمەدى. ەكىنشى جاعىنان بوس ەلەس قۋمايىن دەپ, ۇلكەن سپورتپەن تۇبەگەيلى قوش ايتىستىم.
– جانكۇيەرلەردىڭ اۋزىنان «جاستايىنان جاسىنداي جارقىراپ, دارا تالانتىمەن وقشاۋلانعان بولمىسى بولەك نۇرجان سمانوۆتاي بوكسشىنىڭ نە وليمپيادادا, نە الەم چەمپيوناتىندا جۇلدە الماعانى قانداي وكىنىشتى» دەگەندەي اڭگىمەلەردى ءجيى ەستيمىز. ال ءسىز ءوزىڭىز سوعان وكىنەسىز بە؟
– كسرو, ەۋروپا جانە ازيانى مويىنداتقانىممەن, جوعارىدا اتالعان قوس جارىستا جەڭىس تۇعىرىنا كوتەرىلە الماعانىما ەش ۋايىمدامايمىن دەسەم, وتىرىك ايتقان بولار ەدىم. ءيا, ىشتە ءبىر وكىنىش بار. بىراق بۇل جالعاندا ءبارى ءبىز ويلاعانداي بولمايدى ەكەن. بارلىعى دا اللانىڭ قالاۋىمەن جۇزەگە اسادى. وكىنىشكە قاراي, ونداي باق ماعان بۇيىرمادى. ەسەسىنە تاۋەلسىزدىك العالى بەرى قانشاما قازاق بوكسشىسى كوز ارباعان بيىكتەردى باعىندىردى. ءوز زامانداستارىم جانە ءىزىمىزدى باسقان ىنىلەرىمنىڭ ءبىرازى وليمپيادا مەن الەمدىك دودالاردا اتوي سالدى. مىنە, سونىڭ التىن باستاۋىندا بىزدەر تۇردىق. سوعان دا شۇكىر!
– ۇلكەن سپورتتان قول ۇزگەننەن كەيىن قانداي كاسىپتىڭ تۇتقاسىن ۇستادىڭىز؟ قازىرگى قىزمەتىڭىز قانداي؟
– ەلىمىزدەگى ءۇش جوعارى وقۋ ورنىن ءتامامداپ, ينجەنەر-ەكونوميست, زاڭگەر جانە دەنە شىنىقتىرۋ باكالاۆر ماماندىعىن الدىم. ءار جىلدارى وڭتۇستىك قازاقستان مەملەكەتتىك ۋنيۆەرسيتەتىنىڭ ەكونوميكا كافەدراسىندا ستاجەر-زەرتتەۋشى, «كازكوممەرتسبانك» اق-نىڭ فيليالىندا قاۋىپسىزدىك ءبولىمى باستىعىنىڭ ورىنباسارى, شىمكەنت قالاسىنىڭ دەنە شىنىقتىرۋ جانە سپورت ءبولىمىنىڭ باسشىسى قىزمەتتەرىن اتقاردىم. قازىرگى كەزدە جەرگىلىكتى سپورت مەكتەپتەرىنىڭ بىرىندە جاس ورەندەردى جاتتىقتىرامىن. سونىمەن قاتار م.وتەباەۆ اتىنداعى جوعارعى تەحنولوگيالار كوللەدجىندە دەنە شىنىقتىرۋ كافەدراسىندا ەڭبەك ەتىپ جاتىرمىن.
– اڭگىمەڭىزگە راحمەت.
اڭگىمەلەسكەن
عالىم سۇلەيمەن,
«Egemen Qazaqstan»
