1942 جىلدىڭ قاڭتار ايىندا مايدانعا شاقىرىلىپ, اياگوز ستانساسىندا جاساقتالعان 310-شى اتقىشتار پولكىندە جاۋىنگەرلىك جانە ساياسي دايىندىقتان وتەدى. ءبىر ايدان كەيىن, ياعني 1942 جىلدىڭ اقپانىندا ماسكەۋدىڭ قاسىنداعى فومينو, قازىرگى نارو-فومينسك قالاسىندا ورنالاسقان 108-ءشى اتقىشتار ديۆيزياسىنىڭ 444-اتقىشتار پولكىنا تۇسەدى. سول جەردە بولىمشە كومانديرى بولىپ, سەرجانت اتاعىن الادى. قان مايداننىڭ ورتاسىندا جۇرگەن اتامىز باتىر تولەگەن توقتاروۆپەن قالاي كەزدەسكەنى تۋراسىندا اڭگىمەلەپ, انامىزعا: «تولەگەن توقتاروۆ الاسا بويلى, شاپشاڭ قوزعالاتىن جىگىت ەدى» دەپ سۋرەتتەپ بەرگەن ەكەن.
1943 جىلدىڭ قازان ايىندا قاتتى جاراقات الىپ, گوسپيتالگە ءتۇسىپ, جازىلعاننان كەيىن 115-ءشى جەكە اتقىشتار بريگاداسىنا اۋىسادى. 1944 جىلى 29 ماۋسىمدا سناريادتىڭ جارىلىسىنان قاتتى جاراقات الىپ, №3640 ەۆاكۋاتسيالىق گوسپيتالگە تۇسەدى. گوسپيتالدا سول جىلدىڭ 7 قىركۇيەگىنە دەيىن ەمدەلىپ, سوعىسقا جارامسىز دەپ تانىلعاندىقتان ەلگە قايتادى. سناريادتىڭ جارقىنشاعى جۇرەككە جاقىن تيگەندىكتەن وتا جاساپ الۋ قاۋىپتى بولعان. كەيىن ەلگە ورالعاندا سول جارقىنشاق جىلدار وتە كەلە قولتىعىنىڭ استىن تەسىپ شىعىپتى. بۇل جارقىنشاق قازىر مەنىڭ قولىمدا. ارنايى ساراپتاما جاساتىپ, قۇجاتپەن بەكىتىپ السام با دەگەن ويىم بار. ەرلىگىمەن كوزگە تۇسكەن اتامىز سول كەزدەرى ەكىنشى دارەجەلى «داڭق» وردەنىمەن, كوپتەگەن مەدالدارمەن ماراپاتتالادى.
سوعىستان كەيىن سوۆحوزدا زەينەتكەرلىككە دەيىن ەڭبەك ەتتى. قامىستى فەرماسىندا ەسەپشى, قويشى بولدى. ەڭبەگى ەلەنىپ, كوپتەگەن ماراپاتتارعا يە بولدى. ۇيىمىزدە اتامىزدىڭ مەدالدارىنىڭ كۋالىكتەرى ساقتالعان.
ەل ىشىندە اتامىز ءوزىنىڭ كىرپياز, تازالىعىمەن اتى شىعىپ, «چاقاي سەرى» اتانىپ ەدى. كوزى تىرىسىندە قۇرداستارى مەن زامانداستارىنىڭ قۇرمەتىنە بولەندى. ەڭبەك ەتۋگە كەلگەندە الدىنا جان سالمايتىن, اۋىرتپاشىلىقتان قورىقپايتىن, ەش نارسەگە مويىمايتىن قاتال جان كورىنگەنىمەن, ازىلگە جۋىق, اقكوڭىل ادام بولاتىن. اسىرەسە سوعىس تۋرالى سۇراعانىمىزدا: «ونىڭ بەتىن ءارى قىلسىن, ءبىز كەشكەن, ءبىز كورگەن قاندى قىرعىندى سەندەر كورمەڭدەر, بولاشاقتارىڭ جارقىن بولسىن» دەپ وتىراتىن.
مەن اتام باردا تىم كىشكەنتاي بولسام دا, كەيىننەن ول كىسىنىڭ قانداي ادام بولعاندىعىن ۇلكەندەردەن ەستىگەنىمدە بويىمدى ماقتانىش سەزىمى كەرنەپ, ءوزىمنىڭ تەگىمنىڭ مالگاجدار بولعانىنا قۋاناتىنمىن. اتامنىڭ اۋىلعا ۇلگى بولىپ, ونىڭ سوعىستاعى ەرلىك جولدارىنىڭ كەيىنگى ۇرپاققا ەستەلىك رەتىندە بولسا دا قالعانى, ارتىندا قالعان ۇرپاقتارىنىڭ تاعزىم ەتەر الىپ تۇلعاسىنا اينالعانى ءبىز ءۇشىن زور مارتەبە.
سۇراپىل قان مايداندا قانشاما قازاق باتىرلارى وتان ءۇشىن جان قيىپ, شەيىت بولسا, مالگاجدار اتامىزدىڭ باۋىرلارى سادۋاقاس, وقاس دەگەن كىسىلەردىڭ ءىز-ءتۇسسىز كەتكەندەرى جايلى ۇيدەگى ۇلكەندەردىڭ اۋزىنان ەستيتىن ەدىك. وكىنىشكە قاراي, اعايىندىلار تۋرالى وسى كۇنگە دەيىن ەشقانداي مالىمەت جوق.
نۇرجان مالگاجداروۆ,
«شىعىس» وڭىرلىك قولباسشىلىعىنىڭ قاھارمان ق.قايسەنوۆ اتىنداعى 27943 اسكەري ءبولىمىنىڭ يدەولوگيالىق جۇمىستار, ارنايى ناسيحات جانە مەملەكەتتىك-قۇقىقتىق دايىندىق بويىنشا اعا وفيتسەرى, كاپيتان
وسكەمەن
