كارانتين مەرزىمىندەگى كولىك اعىنىنىڭ ازايۋىن ءتيىمدى پايدالانعان كوكشەتاۋ قالاسىنىڭ اكىمدىگى جول توسەمىن الماستىرۋعا ايرىقشا كوڭىل ءبولىپ وتىر. قازىرگى تاڭدا وبلىس ورتالىعىنداعى 40-تان استام كوشەگە اسفالت توسەلىپ, جول جوندەۋ جۇمىستارى قاۋىرت اتقارىلۋدا. ازىرگە ش.ءۋاليحانوۆ, م.عابدۋللين, م.اۋەزوۆ, ە.اۋەلبەكوۆ ءتارىزدى نەگىزگى كوشەلەردى قامتىعان. قازىرگى تاڭدا ن.نازارباەۆ داڭعىلى, ش.ءۋاليحانوۆ كوشەلەرىنىڭ زەرەندى باعىتىندا جول توسەمى تولىق جاڭعىرتىلدى. قالاداعى كۇرە جولداردا نەگىزىنەن ەسكى اسفالتتى الماستىرۋ قولعا الىنعان. سونداي-اق, بۇعان دەيىن مۇلدەم جول توسەمى بولماعان كوشەلەر دە قامتىلىپ وتىر.
جول بەتىنەن سىرىلىپ الىنعان ەسكى اسفالت قالانىڭ جوندەۋ كورمەگەن كوشەلەرىنە قايتا توسەلۋدە. قالتارىستا قالىپ, لاي مەن سازدان ارىلماعان 27 كوشەگە العاش رەت جول سالىنىپ جاتىر. ال, كۇرە جولداردىڭ جابىنى تولىق جاڭارتىلادى. بۇل جول جوندەۋدە فرەزەرلىك تەحنيكا ۇتىمدى قولدانۋ ارقىلى مۇمكىن بولىپ وتىر.
–بۇل تەحنيكا «فريزا ۆيرگەنت ۆ-200» دەپ اتالادى. قۋاتتىلىعى 600 اتتىڭ كۇشىنە تەڭ. قازىر اسفالت جابىنىن سىلىپ الۋدامىز. تاڭەرتەڭنەن بەرى 4 جولاق ءجۇرىپ ءوتتىم. كۇن جىلىدا بۇل تەحنيكانىڭ قىزمەتى وڭاي جۇرەدى. اۋا رايىنىڭ قولايلى كەزىن پايدالانىپ قالۋعا تىرىسىپ جاتىرمىز,–دەيدى ماشينيست سەرگەي ميرونوۆ.
جول جوندەۋ جۇمىستارى وبلىس ورتالىعىنىڭ شەتكەرى ايماقتارىن دا قامتيدى. بيىل ش.ءۋاليحانوۆ, م.اۋەزوۆ كوشەلەرىنەن كەيىن ستانتسيوننىي پوسەلكەسى, كوكتەم, بىرلىك جانە بەيبىتشىلىك شاعىن اۋداندارىندا جوندەۋ جۇمىستارى جۇرگىزىلەدى دەپ كۇتىلۋدە.
