بريفينگ بارىسىندا شىمكەنت قالاسى اكىمىنىڭ ورىنباسارى ماقسۇت يساحوۆ 2020 جىلعى 1 مامىردان باستاپ قالادا كەيبىر كاسىپكەرلىك نىساندارىنىڭ قالپىنا كەلتىرۋدىڭ ءبىرىنشى كەزەڭى باستالاتىنىن اتاپ ءوتتى.
-توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا پرەزيدەنت تاپسىرماسىمەن ەلىمىزدە كارانتين رەجيمىن جەڭىلدەتۋ ماسەلەسىن قاراستىرعان بولاتىن. وسىعان وراي, شىمكەنتتە 1 مامىردان باستاپ بىرقاتار قىزمەت كورسەتۋ, ساۋدا سالالارى مەن قارجى ۇيىمدارى ىسكە قوسىلادى. بۇكىل جەردە قاتاڭ سانيتارلىق-ەپيدەميولوگيالىق تالاپتار ساقتالۋى ءتيىس, - دەدى قالا اكىمىنىڭ ورىنباسارى.
ماقسۇت پەرنەباي ۇلىنىڭ مالىمدەۋىنشە, قىزمەت كورسەتۋ سالاسىندا جەتكىزۋ سەرۆيسى بولعان جاعدايدا الدىن الا جازىلۋ بويىنشا حيميالىق تازالاۋ, كىر جۋ ورىندارى, كىلەمدەردى تازالاۋ, تۇرمىستىق (ونىڭ ىشىندە ۇيىمداستىرۋ تەحنيكاسى, ءموبيلدى قۇرىلعىلار) جانە ونەركاسىپتىك تەحنيكانى جوندەۋ ورتالىقتارى, اۆتوجۋ (وزىنە-ءوزى قىزمەت كورسەتۋ) جۇمىسىن باستاماق. سونداي-اق, شينومونتاج, ماي اۋىستىرۋ ورتالىقتارى, تەحنيكالىق قىزمەت كورسەتۋ ستانسالارى, اۆتوسەرۆيستەر («سەرگەك» دەرەكتەر بازاسىنا تىركەلگەن اۆتوكولىك قۇرالدارى ءۇشىن),توكارلىق, دانەكەرلەۋ جانە جيھاز تسەحتارى, الدىن الا جازىلۋ بويىنشا سانيتارلىق نورمالاردى قاتاڭ ساقتاي وتىرىپ اسەمدىك سالوندارى, شاشتارازدار, اتەلە, كيىم مەن اياق كيىمدى جوندەۋ نۇكتەلەرى ساعات 10.00-18.00 ارالىعىندا جۇمىس ىستەيدى.
بۇدان بولەك, ساۋدا سالاسىندا تەك تۇرمىستىق تەحنيكالاردى ونلاين-جەتكىزۋ رەجيمىندە جۇمىس ىستەيتىن ساۋدا ۇيلەرى مەن دۇكەندەرگە, كوشەتتەردى, پەستيتسيدتەردى, تىڭايتقىشتاردى, باۋ-باقشا تاۋارلارىن ساتاتىن دۇكەندەرگە, جۇك اۆتوكولىگى مەن اۋىل شارۋاشىلىعى جانە قۇرىلىس تەحنيكاسىنا ارنالعان اۆتوبولشەكتەر مەن شينالاردى ساتاتىن دۇكەندەر مەن قويمالارعا, وپتيكا جانە اۆتوسالوندارعا رۇقسات بەرىلەدى.
سونىمەن قاتار قالاداعى ميكروقارجى ۇيىمدارى, لومباردتار جانە اقشا ايىرباستاۋ پۋنكتتەرى ساعات 10.00-18.00 ارالىعىندا جۇمىس ىستەيتىن بولادى.
-قازىرگى تاڭدا اتالعان كاسىپكەرلىك نىسانداردان وتىنىشتەردى قابىلداۋ باستالىپ كەتتى. وتىنىشتەردى ازاماتتار 2020 جىلعى 30 ءساۋىر, ساعات 14:00-گە دەيىن ۇسىنىپ ۇلگەرۋى ءتيىس. وسى كۇنى جاۋاپتى ماماندار بارلىق ءوتىنىشتى جەدەل قاراپ, قۇجاتتار راستالعان جاعدايدا كاسىپكەرلىك نىساندارعا 1 مامىردان باستاپ جۇمىسىن باستاۋعا رۇقسات بەرىلەدى, - دەپ اتاپ ءوتتى بريفينگتە قالا اكىمىنىڭ ورىنباسارى.
ايتا كەتسەك, وتىنىشتەردى جىبەرۋ ءۇشىن پوشتالىق مەكەنجايلار:
اباي اۋدانى – karantin.abai@mail.ru;
ءال-فارابي اۋدانى –karantin.alfarabi@mail.ru;
ەڭبەكشى اۋدانى – karantin.enbekshi@mail.ru;
قاراتاۋ اۋدانى – karantin.karatau@mail.ru
شىمكەنت
