1969-1989 جىلدار ارالىعىندا «ميلۋوكي باكس» پەن «لوس-اندجەلەس لەيكەرستىڭ» نامىسىن قورعاعان كارىم-ابدۋل دجاببار 1 560 ويىن وتكىزىپ, 38 387 ۇپاي ولجالادى. 42 جاسقا دەيىن الاڭدا اتوي سالعان ول ءار كەزدەسۋدە ورتا ەسەپپەن 24,6 ۇپايدان ەنشىلەدى. كارىم-ابدۋلدىڭ بويى – 218 سانتيمەتر, سالماعى – 121 كيلو.
بۇل تىزىمدە كارل مەلوۋن ەكىنشى ورىندا تۇر. 1985-2004 جىلدار ارالىعىندا ونەر كورسەتكەن ايتۋلى باسكەتبولشىنىڭ قورجىنىندا 36 928 ۇپاي بار. الايدا مەلوۋن 2004 جىلى سپورتتىق كارەراسىن اياقتاعاندىقتان, ونىڭ دجاببارعا باسەكەلەس بولا المايتىنى انىق ەدى.
ءۇشىنشى ورىندا – لەبرون دجەيمس. ءداپ وسى ويىنشىنىڭ دجابباردى قۋىپ جەتۋگە جاقسى مۇمكىندىگى بار. وتكەن جىلدىڭ سوڭىندا 35 جاسقا تولعان «لوس-اندجەلەس لەيكەرستىڭ» شابۋىلشىسى ازىرگە 34 092 ۇپاي ولجالادى. ءوزىنىڭ داڭقتى وتانداسىن قۋىپ جەتۋ ءۇشىن وعان ءالى 4 295 ۇپاي جيۋ كەرەك. قازىرگى كەزدە دجەيمس ءار باسەكە بارىسىندا ورتا ەسەپپەن 27,1 ۇپايعا يەلىك ەتۋدە. ەگەر وسى قارقىنىن باسەڭدەتپەسە, لەبرون شامامەن 170 كەزدەسۋدەن كەيىن كارىم-ابدۋلدىڭ رەكوردىن جاڭارتۋى مۇمكىن. بۇگىنگى تاڭدا بارلىق بۋكمەكەرلىك كەڭسەلەر «دجەيمس دجابباردان وزا ما؟» دەگەن ساۋالعا باس قاتىرىپ, بارشا جانكۇيەردى باسكە اقشا تىگۋگە ۇگىتتەۋدە.
سونداي-اق ۇبق-نىڭ ەڭ ناتيجەلى «توپ-10» ويىنشىسىنىڭ تىزىمىنە مىنا باسكەتبولشىلار ەنىپ وتىر: كوبي برايانت (33 643 ۇپاي), مايكل دجوردان (32 292), ديرك نوۆيتسكي (31 560), ۋيلت چەمبەرلەن (31 419), شاكيل و’نيل (28 596), موزەس مەلوۋن (27 409) جانە ەلۆين حەيز (27 313). بۇل ويىنشىلاردىڭ بارلىعى دا سپورتتىق كارەرالارىن الدەقاشان اياقتاعان. سوندىقتان كارىم-ابدۋل دجابباردىڭ كورسەتكىشى ازىرشە ۇزدىك بولىپ قالا بەرمەك.
