سپورتشىلار وتباسىندا دۇنيەگە كەلگەن دينارا بالاۋسا كەزىنەن تەننيسپەن اينالىستى. ءار جىلدارى WTA ءتۋرنيرىنىڭ جەكەلەگەن سايىسىندا 12 رەت توپ جارىپ, جۇپتىق باسەكەدە 9 مارتە دارا شىقتى. ەكى رەت «رولان گارروستىڭ» جانە ءبىر مارتە اۋستراليانىڭ اشىق بىرىنشىلىگىنىڭ فينالىندا ونەر كورسەتتى. 2008 جىلى بەيجىڭ وليمپياداسىندا كۇمىس مەدالدى يەلەنسە, 2009 جىلدىڭ كوكتەمىندە الەمنىڭ ءبىرىنشى راكەتكاسى اتاندى.
دينارانىڭ ۇلتى – تاتار. ونىڭ تۋعان اعاسى مارات سافيننىڭ دا قانداي مىقتى تەننيسشى بولعانىن جانكۇيەرلەر جاقسى بىلەدى. بيىل 40 جاسقا تولعان مارات عاسىرلار توعىسىندا الەمدىك رەيتينگتە كوش باستادى. اكەسى ءموبين اليكسەي ۇلى ماسكەۋدەگى تەننيس كلۋبىن باسقارسا, اناسى راۋزا مۇحامەدجانقىزى حالىقارالىق دارەجەدەگى سپورت شەبەرى. كەزىندە ول ءوز بالالارىن عانا ەمەس, ەلەنا دەمەنتەۆا, اناستاسيا مىسكينا جانە اننا كۋرنيكوۆا سىندى تەننيسشىلەردى دە جاتتىقتىردى.
