بالالار اۋرۋحاناسىنىڭ حيرۋرگيا بولىمشەسىنىڭ مەڭگەرۋشىسى سۇلتانبەك تۇماشەۆتىڭ ايتۋىنشا, العاشىندا جان ساقتاۋ بولىمىنە تۇسكەن قوس سابيگە كەشەندى ەم الۋى ءۇشىن بارلىق جاعداي جاسالعان بولاتىن.
ومىرگە كەلگەننەن كەيىن جەتى كۇننەن سوڭ 4 ايلىق سابيدە دارىگەرلەر ىشتەن تۋعان جارىق كوكەتى پايدا بولعانىن انىقتاعان. بۇل ءوز كەزەگىندە تىنىس جەتكىلىكسىزدىگىنە اكەلىپ سوققان, سونىڭ ناتيجەسىندە جاعدايى كۇرت ناشارلاعان.
- شىن مانىسىندە بۇل وتە اۋىر پاتولوگيا جانە مۇنداي جاعدايدا كوبىنە وتانى كەيىنگە قالدىرۋعا تۋرا كەلىپ جاتادى, ياعني جاڭا تۋعان بالا ەڭ بولماعاندا ءۇش جاسقا شىعۋى ءتيىس. بۇل دياگنوزبەن بالانىڭ جاعدايى كۇن وتكەن سايىن ناشارلاي تۇسەدى جانە كۇتپەگەن جەردەن, اسىرەسە تۇنگى ۋاقىتتا قايعىلى وقيعانىڭ ورىن الۋى عاجاپ ەمەس. وپەراتسيانى باستاماس بۇرىن ويلانا كەلە توراسكوپياعا جۇگىنگەندى ءجون سانادىق, سەبەبى بۇل وتا جاساۋدىڭ ەڭ ءتيىمدى جولى. بارلىعى ويداعىداي وتكەن سوڭ كىشكەنتاي ءسابي ءبىزدىڭ اۋرۋحانادا 30 كۇننەن استام بولدى, جاعدايى جاقسارعان سوڭ ۇيىنە جىبەردىك, دەيدى سۇلتانبەك تۇماشەۆ.
ەكىنشى نارەستە ماڭعىستاۋ اۋدانى شەتپە اۋىلىنان سانيتارلىق اۆياتسيانىڭ كومەگىمەن وبلىستىق بالالار اۋرۋحاناسىنا جەتكىزىلگەن بولاتىن.
- بۇلدىرشىندە كوكەك كەمىستىگى بار ەكەندىگىن انىقتادىق. جۇقا جانە قالىڭ ىشەك وكپەگە ءوتىپ كەتكەن, ال جۇرەگى بولسا وڭ جاق بەتكە جىلجىعان. وتا كەزىندە ىشەكتى تولىعىمەن تومەنگى جاققا تۇسىردىك. تۋا بىتكەن ىشەك پاتولوگيانىڭ بولۋىنا بايلانىستى اراعا ءۇش كۇن سالىپ سابيگە قايتا وتا جاساۋعا تۋرا كەلدى. اناسىنىڭ ايتۋىنشا جۇكتى كەزىندە ول ءۇش رەت ۋلترادىبىستىق زەرتتەۋگە جۇگىنگەن, سوعان قاراماستان ماماندار پاتولوگيانى انىقتاي الماعان. وتا ءساتتى وتكەن سوڭ ءبۇلدىرشىن اۋرۋحانادا 20 كۇن جاتىپ ەمىن جالعاستىردى, قازىر ونىڭ دەنساۋلىعىنا الاڭداماۋعا بولادى, دەدى ءوز سوزىندە سۇلتانبەك تۇماشەۆ.
دارىگەرلەر بۇگىنگى تاڭدا كىشكەنتاي ناۋقاستار وزدەرىن جاقسى سەزىنەتىنىن, الداعى ۋاقىتتا قوسىمشا وتا جاساۋ قاجەتتىلىگى جوق ەكەندىگىن ايتادى. قوس ءسابي ايىعىپ, ۇيلەرىنە جىبەرىلدى.
ماڭعىستاۋ وبلىسى
