بىرىككەن ۇلتتار ۇيىمىنىڭ سوڭعى جاريالاعان رەيتينگىنە سايكەس, قازاقستاندىقتار ورتالىق ازيا اۋماعىنداعى ەلدەردە تۇراتىن حالىقتار اراسىنداعى ەڭ باقۋاتتىسى بولىپ شىقتى.
وتكەن اپتادا بۇۇ مامىراجاي قالىپتا, باقىتتى جاعدايدا ءومىر ءسۇرىپ جاتقان ەلدەردىڭ الەمدىك رەيتينگىن جاريالادى.
بىرىككەن ۇلتتار ۇيىمىنىڭ سوڭعى جاريالاعان رەيتينگىنە سايكەس, قازاقستاندىقتار ورتالىق ازيا اۋماعىنداعى ەلدەردە تۇراتىن حالىقتار اراسىنداعى ەڭ باقۋاتتىسى بولىپ شىقتى.
وتكەن اپتادا بۇۇ مامىراجاي قالىپتا, باقىتتى جاعدايدا ءومىر ءسۇرىپ جاتقان ەلدەردىڭ الەمدىك رەيتينگىن جاريالادى. ونى جاساۋدا ءاربىر جەكە الىنعان ەلدىڭ كۇتىلەتىن ءومىر ءسۇرۋ ۇزاقتىعى, ىشكى جالپى ءونىمىنىڭ جان باسىنا شاققانداعى كولەمى, قوعامداعى سەنىمدىلىك دەڭگەيى, سايلاۋ ەركىندىگى, جەمقورلىق پەن جومارتتىقتىڭ مولشەرى سەكىلدى كورسەتكىشتەر ەسەپكە الىنادى. قورىتىندى كورسەتكىش امەريكانىڭ گەللاپ قوعامدىق پىكىرلەر ينستيتۋتى 2010-2012 جىلدار ارالىعىندا جۇرگىزگەن ساۋالداما مالىمەتتەرى نەگىزىندە تۇزىلگەن. كەستەگە بارلىعى 156 ەل ەنگىزىلگەن. قازاقستان سولاردىڭ اراسىندا 57-ءشى بولىپ تۇر. ال ورتالىق ازياداعى قالعان مەملەكەتتەردىڭ ءبارى ودان كەيىن ورنالاسقان. ايتالىق, رەيتينگ تۇزۋشىلەر تۇركىمەنستاندى 59-شى پوزيتسياعا قويسا, وزبەكستان 60-شى, قىرعىزستان 89-شى, ال تاجىكستان 125-ءشى بولىپ كەلەدى. بىزبەن كورشى جانە ارالاس-قۇرالاستىعى بار بىرقاتار قۋاتتى ەلدەر دە تومەنگە جايعاسىپتى. ماسەلەن, رەسەي 68-ءشى قاتارعا قونىس تەپسە, تۇركيا 77-ءشى, قىتاي 93-ءشى ساتىعا تابان تىرەگەن.
سونداي-اق World Happiness Report بايانداماسىندا قازاقستاننىڭ سوڭعى جىلدارى الەۋمەتتىك احۋالىنىڭ جاقسارا تۇسكەنىن ايعاقتايتىن كورسەتكىشتەر كەلتىرىلگەن. مۇنداي ءۇردىس تروپيكالىق افريكا جانە لاتىن امەريكاسى ەلدەرىندە دە بايقالادى ەكەن.
سونىمەن بىرگە, ومىرگە قاناعاتتانعاندىق دارەجەسى ەگيپەت پەن اقش-تا تومەندەپ كەتكەن. ال يسپانيا, گرەكيا, يتاليا جانە پورتۋگاليا ەلدەرىندە ءتىپتى ناعىز ستاتيستيكالىق قۇلدىراۋلار ورىن العان. بۇل – ايماقتاردا ەكونوميكالىق داعدارىستىڭ ورىن الۋى مەن وسىعان بايلانىستى تابىستىڭ ازايىپ كەتۋىنەن تۋىنداپ وتىرعان ناتيجە. باياندامادا ايتىلعانداي, جۇمىسسىزدار قاتارىن ارتتىرا تۇسۋگە سەپ بولاتىن پسيحيكالىق اۋرۋلاردىڭ سانى دا كوبەيىپ كەلەدى. بۇۇ ساراپشىلارىنىڭ پىكىرلەرىنشە, بۇل جاعدايدى تەك ءتيىستى الدىن الۋ جۇمىستارى مەن قولجەتىمدى تەراپيا عانا تۇزەي الادى. مۇنداي دەرەكتەر, اسىرەسە, يندۋستريالىق جاعىنان دامىعان ەلدەردە كوبىرەك ورىن الۋدا.
سوعان قاراماستان, جوعارىداعى رەيتينگىدە تاپ وسىنداي جوعارى دامىعان ەلدەر كوش باستاۋشىلىق تىزگىندى قولدارىنا ۇستاپ وتىر. ولار كەستەنىڭ ەڭ جوعارعى جاعىنا مىنا رەتپەن ورنالاسقان: دانيا, نورۆەگيا, نيدەرلاندى, شۆەتسيا. ال كەستەنىڭ سوڭىن قارا كونتينەنتتىڭ توگو, بەنين جانە ورتالىق افريكا رەسپۋبليكاسى سەكىلدى مەملەكەتتەرى اياقتايدى.
سەرىك ءپىرنازار,
«ەگەمەن قازاقستان».
