1-ءشى تازالانۋ كەزەڭى (1-2 كۇن)
باسىڭ اۋىرادى ما؟ ەش ۋايىمداما! ورازانىڭ ءبىرىنشى كۇنى قانىمىزداعى قانت ازايادى. جۇرەك سوعىسى باسەڭدەپ, قان قىسىمى تومەندەيدى. بۇلشىق ەتتەن گليكوگەن ءبولىنىپ, السىزدىك پايدا بولادى. تازالانۋدىڭ العاشقى كۇندەرى ەڭ قيىنداۋ بولۋى مۇمكىن. باس اۋرۋ, جۇرەك اينۋ, اۋىزدان جامان ءيىس شىعۋ, ءتىلدىڭ اۋىرلانىپ, ءىسىنۋى - تازالانۋدىڭ ءبىرىنشى كەزەڭى بولىپ ەسەپتەلەدى. وسى كەزەڭدە اشتىق قاتتى سەزىلۋى مۇمكىن.
2-ءشى تازالانۋ كەزەڭى (3-7 كۇندەرى)
ماي قىشقىلىنىڭ قۇرامى ىدىراپ, گليتسەريدتەر مولەكۋلاسىنداعى گليتسەريندى بوساپ, گليۋكوزاعا اينالادى.
بەت مايلانىپ, كەيبىر جاعدايدا ازداپ بورتپە شىعۋى مۇمكىن. اعزا ورازاعا ۇيرەنە باستايدى, اس قورىتۋ جۇيەسى دەمالىپ, بارلىق كۇش تازالانۋعا جانە ەمدەلۋگە جۇمسالادى.
قاننىڭ اق تۇيىرشىكتەرى مەن يممۋنيتەت جۇيەسىنىڭ بەلسەندىلىگى ارتادى. وكپە تۇسىڭىز اۋىرسىنۋى مۇمكىن. تازالانۋ ورگاندارى, وكپە جولدارى رەتكە كەلىپ, جاڭالانۋ پروتسەسسى ۇستىندە بولادى. ءتىلىڭىز اعارىپ, توق ىشەككە جابىسقان ءناجىس اجىراتىلا باستايدى.
3-ءشى تازالانۋ كەزەڭى (8-15 كۇندەرى)
ءوزىڭدى سەرگەك سەزىنىپ, قۋاتىڭ تاسيدى. الايدا, ەسكى جارالارىڭ قوزىپ, ءبىراز اۋىرسىنۋى مۇمكىن. بۇل, اعزانىڭ ورازا كەزىندە ءوزىن-ءوزى ەمدەۋگە كوشكەنىن كورسەتەدى.
اعزا ءوز بويىنان ءولى نە جاراقاتتانعان جەرىنە (تكاني) ليمفوتسيتتەر سەكرەتتەلگەن (شىرىشتى) زاتتاردى جەتكىزىپ, اقاۋلى جاسۋشالاردى جويۋعا كىرىسەدى.
وسى شىرىشتى زاتتار بۇرىن بولعان اقاۋ ورنىن قايتا اۋىرۋىنا اكەپ سوقتىرادى جانە سول جەردەگى جۇيكە تالشىقتارىنا اسەر ەتەدى. اعزا ءوزىن-ءوزى ەمدەپ ساۋىقتىرۋىنىڭ باستى كورسەتكىشى دە وسى اۋىرسىنۋ. بۇلشىق ەتتەر قاتايىپ, توكسيندەردىڭ اسەرىنەن اۋىرسىنۋ اسقىندايدى.
توكسيندەر اياقتا جينالاتىن بولعان سوڭ, اياقتارىڭىزدا اۋرۋ سەزىنەسىز. اۋىز قۋىسىندا شاعىن جارالار پايدا بولۋى مۇمكىن, ول باكتەريالاردىڭ كوبەيۋى سالدارىنان بولادى. كۇندەلىكتى اۋىزدى تۇزدى سۋمەن شايىپ تۇرساڭىز, جارالار تەز جازىلادى.
4-ءشى تازالانۋ كەزەڭى (16-30 كۇندەرى)
اعزا اشىعۋعا ابدەن ۇيرەنگەن. قۋاتىڭىز كوپ, وي-ساناڭىز تىنىق.
تازالانۋ كەزەڭدەرى قىسقارىپ, ءتىلىڭىز قىزعىلتتانىپ, تىنىسىڭىز تازارادى. اعزالار ءار ءتۇرلى اۋرۋ قوزدىرعىشتارىنان تازالاعاننان سوڭ, ورگاندار ەكى ەسە تەز جۇمىس جاساپ, اقاۋى بار جويىلعان جاسۋشالار ورنىن تولىقتىرادى.
20 كۇننەن سوڭ ساناڭىز تىنىق, جۇيكەڭىز تىنىش, قۋاتىڭىز كوپ, بويىڭىزدا جاقسى بالانس سەزىلەدى. ەستە ساقتاۋ قابىلەتىڭىز ارتادى.
كەرەمەت وزگەرىستەر. ودان دا ماڭىزدىسى - اللا تاعالانىڭ ورازا تۇتقان جان ءۇشىن بۇل دۇنيە مەن اقىرەتتە بەرەتىن نىعمەتتەرى كوپ.
