ءالى قوزى-لاقتىڭ دەڭگەيىنەن اسپاعان, قوزى ورىسىنەن ۇزاپ شىقپاعان كەزىم بولاتىن. جازدىڭ شىلىڭگىر ىستىعىندا دا, كۇزدىڭ قوڭىر سالقىنىندا دا ءۇي ماڭايىندا جالاڭ اياق «شاپقىلاي» بەرەسىڭ. باستاپقى كەزدە تابانىڭ ءبىراز تىلىمدەنەدى دە, كەيىن قارا قايىس تۇيەتابان بولىپ بەكىپ قالادى. كۇن سۋىتىپ, جاڭبىر جاۋسا عانا بىردەمە ىلگەن بولاسىڭ.
ءبىر كۇنى قوزى قايىرىپ ءجۇرىپ تابانىما «كىرش» ەتىپ تىكەن كىرگەنىن اڭعاردىم. دەرەۋ سۋىرىپ تاستاعانداي بولعام. بىراق, تىكەننىڭ ۇشى ماي تاباندا قالىپ قويىپتى. اياعىم اۋىرعىشتاپ جۇرگەندەي بولدى, ەت قىزۋمەن اسا ءمان بەرە قويمادىم. ارادا ەكى-ءۇش كۇن وتكەندە كۇپ بولىپ ءىسىپ, ەتىگىم سيماي قالماسى بار ما؟! ونىڭ ۇستىنە اقساڭدادىم دا قالدىم. ۇلكەندەردىڭ نازارى سوندا عانا اۋدى. سويتسەم, تىكەننىڭ ۇشى قالعان جەر ىرىڭدەگەن, ودان كەيىن بىتەۋ جاراعا اينالا باستاعان...
ۇيدە ءبىزدى قۇستىڭ كولەڭكەسىنەن قورعاپ وسىرگەن جاسى سەكسەننەن اسقان اجەمىز بار. اۋلەتتىڭ دارىگەرى دە, كەڭەس بەرەر اقىلشى دا سول كىسى. كەز كەلگەن اۋرۋ مەن جاراقاتتى تابيعي جولىمەن ەمدەي قوياتىن. ءبىر قىزىعى قۇلانتازا ايىعىپ كەتەر ەدىك. ءيا, ءبىزدىڭ ءۇيدىڭ ادامدارى اسا ءبىر كۇردەلى سىرقات بولماسا, قالادان دارىگەر شاقىرىپ اۋرە بولمايتىن.
ادەتتەگىشە, اجەم مەنىڭ اياعىمدى ەمدەۋدى قولىنا الدى. سونىمەن نە كەرەك, الگى بىتەۋ جارانىڭ بەتىنە جاڭا سويىلعان قويدىڭ بۇلشىق ەتىن, ياعني جاس ەتىن تارتتى دا سىرتىن جۇقا جىلتىر قاعازبەن (تسەللوفان) ورادى. ونىڭ سىرتىنان تازا ماتامەن تاڭدى. «اياققا ازىرگە قاتتى سالماق سالۋعا بولمايدى, كوپ جۇرمە, ەكى-ءۇش كۇن ۇيدە بول» دەدى. اجەمىز ايتتى ءبىتتى, شالقايىپ جاتىپ قالدىم. بىرەۋ ءبىر جاققا جۇمساسا «اجەم ەشقايدا جۇرمە» دەپ ايتقان دەيسىڭ. بولدى. سونىڭ ارقاسىندا بىرنەشە كۇن قوزىدان بوساپ, دەم الدىم.
تابانداعى ىسىك بىرتىندەپ قايتىپ, سىزداپ اۋىرعانى دا سيرەي باستادى. شاماسى ءۇش كۇن وتكەن سوڭ عوي دەيمىن, اق ماتانى شەشىپ, جاس ەتتى الدى. بىتەۋ جارانىڭ بەتىنە ينەنىڭ كوزىندەي تەسىك پايدا بولعان. وسى تەسىكتەن ىشتەگى ءىرىڭ تۇگەل شىققان. وسىلايشا تابانداعى جارا جازىلدى. بۇرىنعى جۇمىسىما قايتا كىرىستىم. مىنە, سول كۇننەن باستاپ جاڭا سويىلعان قويدىڭ بۇلشىق ەتىندە بىتەۋ جارانىڭ كوزىن اشىپ, ءىرىڭىن سىرتقا تارتاتىن ەمدىك قاسيەتى بارىن بىلدىك. وسىنداي حالىق ەمىنىڭ جايىن بىلەتىن كونە كوز قاريالار قازىرگى جوعارى ءبىلىمدى ماماندارىنان كەم تۇسپەيتىن ەدى. ءبىر وكىنەر جايت, قازىر سونداي «دالا دوكتورلارى» ازايىپ بارادى...
تىلەۋبەردى ساحابا
