بۇگىندە وزەكتىلىگى ارتىپ كەلە جاتقان قىزمەت ءتۇرىنىڭ ءبىرى كولىكتى ونلاين تاركەۋ بولىپ وتىر. «ازاماتتارعا ارنالعان ۇكىمەت» مك مالىمەتىنە سۇيەنسەك قازاقستاندا كارانتين كەزىندە egov.kz پورتالى ارقىلى 4 306 اۆتوموبيل تىركەلگەن. جەكەلەي قالالاردا بۇل قىزمەتتى قولدانۋ سانى دا ارتىپ كەلەدى. ونىڭ 271-ءى الماتى قالاسىنىڭ ۇلەسىندە.
«مامانداندىرىلعان حقو-لار كارانتينگە جابىلعاننان كەيىن قالا تۇرعىندارى 1414 ورتالىعىنا دا, الەۋمەتتىك جەلىدەگى پاراقشالارىمىزعا دا ساتىپ العان كولىكتى قالاي تىركەۋگە بولادى دەگەن ساۋالدارىن قايعان بولاتىن. ەgov.kz (http://%D0%95gov.kz) پورتالىندا كولىك قۇرالدارىن تىركەۋ قىزمەتى بارىن ايتىپ, ەندى تۇرعىنداردىڭ كوپشىلىگى شارۋالارىن ساناۋلى ۋاقىتتىڭ ىشىندە, ۇيلەرىندە وتىرىپ-اق ءبىتىرىپ جاتىر. بۇرىن كوبىسى كولىكتى اۆتوحقو-دا تىركەۋدى ءجون كورەتىن. ويتكەنى, سولاي قالىپتاسىپ قالدى. ال قازىر ۋاقىت باسقا», – دەدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالالىق فيليالىنىڭ ديرەكتورى دانيار قىرىقباەۆ.
ەسكە سالا كەتسەك, بيىلعى جىلدىڭ 26 ناۋرىزىنان باستاپ قازاقستانداعى حالىققا قىزمەت كورسەتۋ ورتالىقتارى مەن اۆتوحقو-دىڭ جۇمىسى توقتاتىلعان. ەل تۇرعىندارى مەملەكەتتىك قىزمەتتەردى تەك ەلەكتروندىق ۇكىمەت پورتالىندا الا الادى.
كولىكتەردى قايتا تىركەۋ قىزمەتى egov.kz پورتالىندا «كولىك جانە كوممۋنيكاتسيالار» بولىمىندە قولجەتىمدى. ونى ونلاين رەجيمىندە الۋ ءۇشىن ساتۋشى ەتسق-نى پايدالانىپ, egov.kz پورتالىنا كىرىپ, ساتىلاتىن كولىك تۋرالى اقپاراتتى ەنگىزىپ, ايىپپۇلدار مەن سالىقتار بويىنشا بەرەشەكتى تەكسەرۋگە سۇرانىس جىبەرۋى كەرەك. ەگەر بار بولسا, ەلەكتروندىق ۇكىمەت پورتالى ارقىلى تولەپ, وتىنىشكە ەتسق-مەن قول قويادى. وسىدان كەيىن ساتىپ الۋشى ەلەكتروندى ۇكىمەت پورتالىنداعى جەكە كابينەتىندەگى وتىنىشپەن تانىسا الادى, وندا ايىپپۇلداردى تەكسەرىپ بولعاننان كەيىن مەملەكەتتىك ءنومىر جانە تەحپاسپورت ءۇشىن ءتيىستى الىمدار مەن تىركەۋ جارناسىن تولەۋى ءتيىس. ساتىپ الۋشى مامىلەنى ءوزىنىڭ ەلەكتروندىق تسيفرلىق قولتاڭباسىمەن راستايدى.
كەيىن الماتىداعى مايلين كوشەسى, 85 مەكەن-جايىنداعى اۆتوحقو-عا تەك دايىن بولعان ءنومىر مەن تەحنيكالىق تولقۇجاتتى الىپ كەتۋ ءۇشىن بارادى.
