وسىدان بىرەر اپتا بۇرىن ۋەفا-نىڭ بارلىق مەملەكەتتىڭ ۇلتتىق فەدەراتسيالارىنا 2019/2020 جىلعى دوپ دوداسىن قالاي دا اياقتاۋ قاجەتتىگى جونىندە نۇسقاۋ بەرگەنى ءمالىم. سوعان سايكەس يتاليالىقتار وسىنداي شەشىم قابىلداپ وتىر. ال وسى ەلدەگى ىشكى بىرىنشىلىك مامىردىڭ سوڭىندا نەمەسە ماۋسىم ايىنىڭ باسىندا جالعاسادى دەپ كۇتىلۋدە.
قازىرگى كەزدە ا سەرياسىندا «يۋۆەنتۋس» پەن «لاتسيو» كلۋبتارى ۇزەڭگى قاعىستىرىپ كەلەدى. تۋريندىكتەر 26 كەزدەسۋدەن كەيىن 63 ۇپايدى قورجىنعا سالسا, ريمدىكتەردىڭ كوش باسىنداعى ۇجىمنان ءبىر عانا ۇپايى كەم. وزگە كوماندالاردىڭ جاعدايى ءسال مۇشكىلدەۋ. ماسەلەن, ءۇشىنشى ساتىعا جايعاسقان «ينتەر» 25 ويىننان سوڭ 54 ۇپاي جيدى.
