The Korea Times گازەتىنىڭ حابارلاۋىنشا, وقيعا وسىدان ءبىر اي بۇرىن, ياعني 2020 جىلدىڭ 23 ناۋرىزىندا گانگۋون پروۆينتسياسىنداعى يانگيانگ قالاشىعىندا بولعان ەكەن. الياكبار يۋلداشەۆ ەسىمدى وتانداسىمىز ءتۇن ورتاسىنا قاراي ۇيىنە ورالعاندا ءتۇتىن ءيىسىن سەزەدى. پاتەرلەردىڭ بىرىندە ءورت شىققانىن تۇسىنگەن ول ء«ورت, ءورت» دەپ ايقاي سالىپ, عيماراتتاعى تۇرعىنداردى وياتادى.
قاربالاسىپ جۇرگەندە كومەك سۇراپ ايعايلاعان ايەلدىڭ داۋسىن ەستىگەن, بىراق پاتەردىڭ ەسىگىن اشا الماپتى. الياكبار كوپ ويلانباستان پاتەرگە گاز قۇبىرى جانە كابەل ارقىلى ورمەلەپ, پاتەرگە كىرىپ, ايەلدى الىپ شىعىپتى. سونداي-اق عيماراتتا بولعان تاعى 10 ادامدى ءتىلسىز جاۋدىڭ تىرناعىنان امان الىپ قالعان. وكىنىشكە قاراي, ءورت شىققان پاتەردە بولعان ايەل كەيىننەن اۋرۋحانادا كوز جۇمادى.
ال الياكبار موينىن, ارقاسىن جانە بىلەگىن وتقا كۇيدىرىپ العان. قازاقستاندىق جىگىت ەرلىگى تۋرالى دا, ءورت كەزىندە دەنەسىن كۇيىك شالعانى تۋرالى دا تۋىستارىنا ءتىس جارماپتى. مەديتسينالىق كومەكتەن دە باس تارتقان. الايدا كورشىلەرى بوي بەرمەي, ونى اۋرۋحاناعا جەتكىزىپ, ەمگە كەتەتىن شىعىندى وزدەرى تولەپتى.
«مەن تۋرالى حابار گازەتتە, ينتەرنەتتە, فەيسبۋكتە شىققاننان كەيىن ۇيدەگىلەر ونى كورىپ, انام جىلاپ جىبەرەدى. ول بىلمەيتىن ەدى. كوردى. قولىم, قۇلاعىم, موينىم داكەمەن ورالعان. جۇمىستا ونداي-ونداي بولادى, قۇلاپ ءتۇستىم دەدىم», دەيدى الياكبار «حابار24» ارناسىنا بەرگەن سۇحباتىندا.
الياكبار وڭتۇستىك كورەيانىڭ يانگيانگ قالاشىعىنا 2017 جىلى تۋريستىك ۆيزامەن بارعان. نەگىزگى ماقساتى جۇمىس ىستەۋ بولعان ول سول ەلدە قالىپ قويادى. ءسويتىپ, قۇجاتسىز جۇمىس ىستەگەن.
ونىڭ زاڭسىز جۇرگەنى انىقتالعان سوڭ, ەل ۇكىمەتى الياكباردى 1 مامىرعا دەيىن قازاقستانعا دەپورتاتسيالاماق. الايدا وڭتۇستىك كورەيا تۇرعىندارى بۇعان كەلىسپەيتىنىن, كەرىسىنشە الياكباردىڭ زاڭدى جۇمىس ىستەۋىنە رۇقسات ەتىپ, سىيلىق بەرۋ قاجەت ەكەنىن ايتىپ ونلاين پەتيتسيا جاريالاعان. قازىرگى تاڭدا وعان قول قويعاندار سانى 10 مىڭنان اسىپ جىعىلادى.
يانگيانگ اۋدانى اكىمشىلىگىنىڭ ايتۋىنشا, الياكبارعا زاڭدى جۇمىس ىستەۋگە رۇقسات بەرۋ ماسەلەسى قازىرگى تاڭدا قارالىپ جاتىر. بۇل ماسەلە وڭتۇستىك كورەيانىڭ دەنساۋلىق ساقتاۋ مينيسترلىگىنىڭ نازارىندا. الدا-جالدا اتالعان ۆەدومستۆو قولداپ جاتسا, الياكبار وڭتۇستىك كورەيادا تۇراقتى تۇرۋعا رۇقسات الۋى مۇمكىن.
Korea JoongAng Daily سايتىنىڭ مالىمەتىنە سۇيەنسەك, الياكباردىڭ ەرلىگىن ەسكەرگەن LG Welfare قورى وعان «گۋمانيتارلىق سىيلىعىن» تابىس ەتكەن.
