- كوروناۆيرۋستىق ينفەكتسيا تابىلعان بۇل 9 جۇمىسشىنىڭ بىرەۋى – تۇركىستان وبلىسىنىڭ تۇرعىنى, 8-ءى – باتىسقازاقستاندىقتار. سونىمەن بىرگە, ورال قالاسىندا تۇراتىن 48 جاستاعى تۇرعىننان دا ينفەكتسيا تابىلدى. ول كوروناۆيرۋستىق ينفەكتسيا جۇقتىرعان اداممەن قارىم-قاتىناستا بولعانى ءۇشىن كارانتيندىك ستاتسيوناردا جاتقان بولاتىن, - دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
رەسەي فەدەراتسياسىمەن شەكاراداعى «سىرىم» جانە «تاسقالا» اۆتووتكەلدەرىندەگى سانيتارلىق-كارانتيندىك بەكەتتەردە ەپيدەميولوگ ماماندارمەن قاشىقتىق تەرمومەتريا جانە ساۋالناما جۇرگىزۋ كەزىندە ازاماتتاردىڭ دەنساۋلىقتارىنا شاعىمدارى بولماعان. الگوريتمگە سايكەس, سكپ ەپيدەميولوگتارى جەدەل جاردەم شاقىرىپ, ازاماتتار كارانتيندىك ستاتسيونارلارعا جاتقىزىلدى.
وقىرماندارىمىزدىڭ بايقاپ وتىرعانىنداي, باتىس قازاقستان وبلىسىندا انىقتالعان ناۋقاستاردىڭ 90%-دان استامى – رەسەي فەدەراتسياسىنان كەلگەن ءوز ازاماتتارىمىز. حالىق اراسىندا وسى جاعدايلارعا الاڭداپ, «شەكارانى مۇلدەم جابۋ كەرەك, ەشكىمدى كىرگىزبەۋ قاجەت» دەگەن پىكىرلەر دە ايتىلىپ قالىپ جاتىر. وسىعان وراي ءوڭىر باسشىسى عالي ەسقاليەۆ ارنايى مالىمدەمە جاسادى:
«قازىرگى جاعداي تۇرعىنداردى الاڭداتىپ وتىرعانىن جاقسى تۇسىنەمىن. سوڭعى كۇندەرى كوروناۆيرۋستىق ينفەكتسياعا شالدىققاندار سانى كۇرت ءوستى. ولاردىڭ 92%-ى رەسەي فەدەراتسياسىنان كەلگەن ءبىزدىڭ ەلدىڭ ازاماتتارى. ءوڭىر تۇرعىندارىنىڭ كەيبىرى رەسەي فەدەراتسياسىمەن شەكارانى تولىقتاي جابۋ تۋرالى سۇرايدى. بىراق مىنا جايتتاردى ەسكەرگەن ءجون:
بىرىنشىدەن, ولار ءبىزدىڭ ەلدىڭ ازاماتتارى. سونىڭ ىشىندە باسىم بولىگى باتىس قازاقستان وبلىسىنىڭ تۇرعىندارى. ولاردى قورعاۋ – مەملەكەتتىڭ ەڭ باستى ماقساتى. ەكىنشىدەن, رەسەي فەدەراتسياسىنان كەلەتىن ازاماتتار شەكارادان بىردەن كارانتيندىك نەمەسە پروۆيزورلىق ستاتسيونارعا بارلىق سانيتارلىق تالاپتار ساقتالىپ جەتكىزىلۋدە. ۇشىنشىدەن, ترانزيتتىك جۇك كولىگىنىڭ 4 جۇرگىزۋشىسى بار. ولار باسقا ەلدىڭ ازاماتتارى. قازىرگى ۋاقىتتا قازاقستانعا تاۋار اكەلەتىن نەمەسە باسقا ەلدەرگە ترانزيتپەن وتەتىن ترانزيتتىك جۇك كولىكتەرىن قوسپاعاندا, شەتەلدىك ازاماتتارعا, سونداي-اق كولىكتىڭ كەز كەلگەن تۇرىنە كىرۋگە تىيىم سالىندى. ەگەر تاۋارلاردى اكەلەتىن جۇك كولىكتەرىنە تىيىم سالىنسا, بۇل تاۋارلاردىڭ جەتىسپەۋىنە جانە باعانىڭ وسۋىنە اكەلىپ سوعادى. بارلىق ترانزيتتىك كولىك بەكىتىلگەن ءبىر جانارماي بەكەتىندە توقتايدى. ولارعا وبلىس تەرريتورياسىنىڭ باسقا جەرىندە توقتاۋعا تىيىم سالىندى. كولىكتەردى قالا اۋماعىنان پاترۋلدىك پوليتسيا ماشينالارى شىعارىپ سالادى» دەدى وبلىس اكىمى.
قازىر باتىس قازاقستان وبلىستىق جۇقپالى اۋرۋلار اۋرۋحاناسىندا 84 ادام ەمدەلىپ جاتىر. ەكى ادام جازىلىپ شىقتى.
پروۆيزورلىق ستاتسيوناردا - 20, كارانتيندىك ستاتسيوناردا - 56, ءۇي وقشاۋلاۋىندا - 1181 ادام دارىگەرلەر باقىلاۋىندا.
باتىس قازاقستان
