الايدا تج ماماندارى تاسقىننىڭ ەكىنشى تولقىنى كەلە جاتقانىن ايتىپ, قاۋىپتىڭ سەيىلمەگەنىن حالىققا جەتكىزۋدە. ونىڭ نەگىزگى سەبەبى ەسىلدىڭ وڭتۇستىكتەگى, ياعني اقمولا وبلىسىنداعى كەيبىر ساعالارىنىڭ مول سۋلى بولىپ, قازىر نەگىزگى ارتەرياعا قۇيىلىپ جاتقاندىعىنان بولىپ وتىر ەكەن. سونىڭ ىشىندە جاباي, كولۋتون وزەندەرىنىڭ سۋلارى ەسىلدىڭ ارناسىن اجەپتاۋىر كوتەرۋدە. دەرجاۆينسكىدەگى گيدروبەكەتتىڭ مالىمدەۋىنە قاراعاندا ولاردىڭ سۋى ەسىلدىڭ ارناسىن 79 سم-گە دەيىن كوتەرگەن, الايدا بۇل سۋ سولتۇستىككە ەكى تاۋلىكتە جەتىپ, اعىن سايابىرلايدى. بىراق ول ءبارىبىر ءىز-تۇزسىز اياقتالمايدى ەكەن.
سولتۇستىك قازاقستان وبلىستىق تج دەپارتامەنتىنىڭ باستىعى, پولكوۆنيك راميل كامالوۆ جۋرناليستەرگە بريفينگ بەرىپ, وسى ەكىنشى تولقىننىڭ قانشالىقتى زارداپ اكەلۋى مۇمكىن ەكەندىگىن جانە قازىرگى جاعداي تۋرالى ايتىپ بەردى. ەكىنشى تولقىن پەتروپاۆل قالاسىنىڭ ماڭىنداعى زارەچنىي كەنتى مەن قىزىلجار اۋدانىنىڭ پريبرەجنوە جانە تەپليچنوە اۋىلدارىنا قيىندىق اكەلۋى مۇمكىن ەكەن. بۇل قالىپتاعى ماۋسىمدىق جاعداي, ءدال وسى ەلدىمەكەندەرگە ەسىل تاسىعاندا جىل سايىن قاۋىپ تونەدى. الايدا بيىل سۋ كولەمى جىلداعىدان ەكى ەسە كوپ. «ول ەلدىمەكەندەردىڭ تۇسىندا جينالعان اعىن سۋدىڭ كولەمىنەن كورىنۋدە. الايدا جالپى جاعداي باقىلاۋدا. شەكتەن شىققان سۋ جوق, ءبىز تۇرعىن ۇيلەردى سۋ باسپاۋى ءۇشىن قولدان كەلگەن شارالاردى جاساۋدامىز. ال ەسىلدىڭ بويىنا سالىنعان ساياجايلاردى سۋ باسۋى قالىپتى جاعداي. ونى يەلەرى جاقسى بىلەدى. ەشكىم بۇل پروتسەستەن قاشىپ قۇتىلا المايدى. ءبىز ساياجايشىلاردى تەك قۇلاقتاندىرىپ, سۋ كوتەرىلگەندە ەشكىمنىڭ ۇيلەردە بولماۋىن ەسكەرتەمىز», دەدى پولكوۆنيك.
ەسىلدىڭ تاسۋى پەتروپاۆلدى باسىپ وتەتىن رەسپۋبليكالىق ماڭىزى بار چەليابينسك-نوۆوسيبيرسك اۆتوجولىنىڭ 528 جانە 529 شاقىرىمىنان دا كورىندى. وسى جانە پەتروپاۆلدان زارەچنىي كەنتىنە باراتىن جولداردىڭ ۇستىنە سۋ شىعىپ كەتكەن. بۇل جەرلەرگە ەسكەرتۋ بەلگىلەرى قويىلىپ, قوزعالىس ۋاقىتشا جابىلدى. ونىڭ ۇستىنە كەزەكشىلىك ۇيىمداستىرىلدى, دەدى ر.كامالوۆ. سونىمەن قاتار زارەچنىي كەنتىن ازىق-ت ۇلىكپەن قامتاماسىز ەتۋ ءۇشىن ۇلكەن اۆتوموبيلدەر عانا جىبەرىلەتىنى بەلگىلى بولدى, ويتكەنى شاعىن كولىكتەر سۋ شايعان جولدان وتە المايدى ەكەن. بىراق تۇرعىندار جاياۋلار جۇرەتىن كوپىر ارقىلى قالامەن قاتىناسىپ جاتىر. مۇنداعى ەڭ قاۋىپتى ۋچاستوك 1-ءشى زارەچنىي كوشەسى بولىپ تۇر. وسىنداعى ۇيلەرگە سۋ جەتىپ قالۋى مۇمكىن ەكەن, بىراق ازىرگە ول باۋ-باقشالاردان اسپاعان.
تج قىزمەتىنىڭ اعىن سۋدىڭ القاۋىن بوگەۋدە ىستەگەن جۇمىستارىنىڭ قاتارىندا راميل كامالوۆ وتكەن تاۋلىكتەردە ۇلتتىق ۇلاننىڭ كۇشىمەن بىرلەسە وتىرىپ, تەپليچنوە مەن زارەچنىي كەنتتەرىن قورعاۋعا 6 مىڭ قاپشىق ينەرتتى ماتەريالدار ارالاسقان قۇم بوگەتتەرى ۇيىلگەنىن ايتتى. ء سويتىپ, تاسقىن تۇراقتى باقىلاۋعا الىنعان.
وسى كۇندەرى پەتروپاۆل قالاسىنىڭ ءوزى ەسىلدىڭ ەڭ جوعارى كوتەرىلۋ كەزەڭىن باستان كەشۋدە. سوڭعى ءۇش تاۋلىكتە ونىڭ كوتەرىلۋى 22 سم-گە جەتكەن. سونىمەن قاتار سۋدىڭ كوتەرىلۋى پەتروپاۆلعا جاقىن ورنالاسقان بايتەرەك, نوۆونيكولسك, ۆودوپروۆودنىي اۋىلدارىندا دا بايقالادى.
ءسوزىنىڭ قورىتىندىسىندا تج دەپارتامەنتىنىڭ باستىعى جالپى جاعدايدىڭ شەكتەن شىقپاسىنا سەنىم ءبىلدىردى.
سولتۇستىك قازاقستان وبلىسى
