بۇگىن, 22 ساۋىردە الماتىدا 693 ادامدا كوروناۆيرۋستىق ينفەكتسيا تابىلسا, ونىڭ ىشىندە 383 ادام مەگاپوليستەگى مەديتسينا سالاسىنىڭ وكىلدەرى, ال ونىڭ ىشىندە 286 ادام ورتالىق قالالىق كلينيكالىق اۋرۋحانانىڭ قىزمەتكەرەلرى بولىپ تابىلادى.
قالانىڭ جاڭادان تاعايىندالعان باس سانيتار دارىگەرى مەديتسينا قىزمەتكەرلەرىنىڭ جاپپاي ۆيرۋس جۇقتىرۋىنا بايلانىستى ەپيدەميولوگيالىق تەكسەرۋلەردىڭ جالعاسىپ جاتقانىن ايتا كەلە, ورتالىق قالالىق كلينيكالىق اۋرۋحاناعا قاتىستى: «بۇل جەردە اۋرۋحانانىڭ ينفەكتسيالىق اۋرۋلاردى ەمدەۋگە رۇقساتى بولماسا دا, ەم جۇرگىزگەنى انىقتالدى. ەڭ ءبىرىنشى جۇقتىرعان ادامدى دا تاپتىق. ينفەكتسيا الدىمەن دياگنوستيكالىق بولىمنەن تاراعان دەپ تۇسپالداپ وتىرمىز. ەڭ ءبىرىنشى اۋىرعان ادامدار وسى جاقتان شىققان. وسى جەرگە كت, ۋزد جاساۋعا كەلگەن ادامنان ونىڭ قاسىندا جۇرگەن مەدبيكەگە جۇققان. ول پاتسيەنتتىڭ وتباسىنداعى 13 ادام تۇگەل تەكسەرىلدى. بىراق ولاردىڭ ۆيرۋس جۇقتىرعانى زەرتحانالىق تۇرعىدا راستالمادى», – دەدى جانداربەك بەكشين.
باس سانيتاردىڭ سوزىنە قاراعاندا, بۇل اۋرۋحانادا كوروناۆيرۋس جۇقتىرعان ناۋقاستار وقشاۋلانعان. مەملەكەتتىك مەكەمەلەرگە حابارلاماستان قابىلداۋ بولىمىندە پنەۆمونياعا شالدىققان 5 توسەك ورىننان ارتىق يزولياتور اشىلعان.
«وسى قىزمەتكە ارناۋلى رۇقساتى بولماسا دا اتالمىش اۋرۋحانا ينفەكتسيالىق ناۋقاستاردى ەمدەگەن. قابىلداۋ بولىمىندە ناۋقاستاردى وقشاۋلاعان. بەينەكامەراداعى كادرلارعا سەنسەك, قىزمەتكەرلەر اۋرۋحانانىڭ ىشىندە قورعانىس قۇرالدارىنسىز ەمىن-ەركىن ارالاپ جۇرگەن. بۇنىڭ بارلىعى جاپپاي جۇقتىرۋعا اكەلەدى. قازىر بولىمدەردىڭ بارلىعى وقشاۋلاندى. ەندى وسىدان كەيىن جۇقتىرۋ كورسەتكىشى ازايادى دەپ ويلامىز», – دەدى جانداربەك بەكشين.
الماتى
