مەرەيتوي قۇشاعىنداعى اقتاۋدا «جۇلدىزدى ون كۇن» باستالدى. قايىرىمدىلىق پەن مەيىرىمدىلىكتى, سالاۋاتتىلىقتى, ءان-جىردى, پوەزيا كەشىن, ءتۇرلى جارمەڭكەلەر مەن اكتسيالاردى, جيىنداردى, كورمەلەر مەن عىلىمي-تانىمدىق شارالاردى تىزبەكتەگەن ون كۇن قايىرىمدىلىق شاراسىمەن باستالدى.
مەرەيتوي قۇشاعىنداعى اقتاۋدا «جۇلدىزدى ون كۇن» باستالدى. قايىرىمدىلىق پەن مەيىرىمدىلىكتى, سالاۋاتتىلىقتى, ءان-جىردى, پوەزيا كەشىن, ءتۇرلى جارمەڭكەلەر مەن اكتسيالاردى, جيىنداردى, كورمەلەر مەن عىلىمي-تانىمدىق شارالاردى تىزبەكتەگەن ون كۇن قايىرىمدىلىق شاراسىمەن باستالدى.
بۇل كۇنى قالاداعى جالعىزىلىكتى قارتتار مەن مۇمكىندىگى شەكتەۋلى بالالار قولىنان شىققان دۇنيەلەر كورمەسى ۇيىمداستىرىلدى. ارقايسىسى تاعدىردىڭ ءارتۇرلى تاۋقىمەتىنە تاپ كەلگەنمەن, وزىنشە ويلاۋ, دۇنيەنى تانۋ, ونەر الەمىمەن سىرلاسۋ مۇمكىندىگى بار ولار ءوز قابىلەتىن سىرلى بوياۋعا, اشەكەيلى بۇيىمدارعا, قولدان وسىرىلگەن الۋان گۇلدەرگە جۇمساپتى.
شارانى ۇيىمداستىرۋشى اقتاۋ قالالىق الەۋمەتتىك قىزمەت كورسەتۋ ورتالىعىنىڭ ديرەكتورى ك.ايتباتىروۆانىڭ ايتۋىنشا, ورتالىقتىڭ 8 بولىمشەسىندە جالعىزىلىكتى 640 قارت, اقىل-ەسى كەم, قيمىل-تىرەك ورگاندارى جۇمىس ىستەمەيتىندەرگە ارنالعان 2 بولىمشەدە 162 بالا ەسەپتە تۇرادى ەكەن. جاسانعان كورمەدەگى بۇيىمدار – وسى جانداردىڭ قولىنان شىققان تۋىندىلارى. وبلىس پەن قالانىڭ مەرەيتويىنا ارناپ, ءارى ساۋدا-ساتتىقتان تۇسكەن قارجى ورتالىققا, ونەر يەلەرىنە ماتەريالدىق كومەك بولسىن دەگەن ماقساتتا ۇيىمداستىرىلعان كورمەنى تاماشالاۋشىلار از بولعان جوق.
– ۇيدە وتىرعان مۇمكىندىگى شەكتەۋلى جانداردىڭ ورتادان وقشاۋلانىپ قالماي, ونەرمەن جاقىن بولۋى قۋانتادى. ولاردىڭ ءاربىر ەڭبەگى – ەرلىك, ال ەرلىك باعالانۋى ءتيىس. سوندىقتان, ولاردىڭ كورمە-جارمەڭكەسىن تەك قالا مەرەيتويى قارساڭىندا عانا ەمەس, الداعى ۋاقىتتا تۇراقتى وتكىزىپ, تۋىندىلاردى تۇتىنۋشىلاردىڭ ساتىپ الۋىنا مۇمكىندىك جاسايمىز, دەيدى اقتاۋ قالاسى اكىمىنىڭ ورىنباسارى راحات ەلتيزاروۆ.
گۇلايىم شىنتەمىرقىزى,
«ەگەمەن قازاقستان».
اقتاۋ.
