قازاقستاندا مۇناي وڭدەۋمەن ءتورت زاۋىت اينالىسادى. ولار: اتىراۋ مۇناي وڭدەۋ زاۋىتى, پاۆلودار مۇناي-حيميا زاۋىتى, «پەتروقازاقستان ويل پروداكتس» جشس, سونداي-اق «CASPI BITUM» بيتۋم زاۋىتى.
– 2020 جىلعى ءساۋىر ايىندا مۇناي ونىمدەرىنىڭ نەگىزگى تۇرلەرىنە سۇرانىس ايتارلىقتاي تومەندەدى. اتاپ ايتقاندا, اۆتوبەنزين مەن ديزەل وتىنىنا سۇرانىس 40%-عا, ال اۆياتسيالىق وتىنعا 70%-عا ازايدى. بۇل مۇناي وڭدەۋ زاۋىتتارىنا مۇناي جەتكىزۋشىلەردەن كەلىپ تۇسەتىن وتىنىمدەر ديناميكاسىنا جاسالعان تالداۋدىڭ ناتيجەسى بويىنشا راستالىپ وتىر, – دەپ حابارلادى ۇلتتىق كومپانيانىڭ ءباسپاسوز قىزمەتى.
قويمالاردا مۇناي ونىمدەرىنىڭ شامادان تىس جينالىپ قالۋىن بولدىرماۋ ءۇشىن اتىراۋ, پاۆلودار جانە شىمكەنت ءموز-دەرىندە وڭدەۋ قارقىنى كولەمدەرى ەڭ تومەن دەڭگەيگە دەيىن ازايتىلىپ, زاۋىتتار جۇمىسى ۇزدىكسىز جالعاسۋدا.
كوروناۆيرۋس پاندەمياسىنا بايلانىستى ناۋرىزدىڭ 15-نەن باستاپ زاۋىتتاردا ارنايى شتابتار جۇمىس ىستەۋدى باستاعانىن ايتا كەتەيىك. شتابتار جۇمىستى ۇلتتىق كومپانيانىڭ ورتالىق شتابىمەن كۇن سايىن ۇيلەستىرىپ وتىرادى. بۇل تۋرالى «قازمۇنايگازدىڭ» ءباسپاسوز قىزمەتى:
– ىندەتتىڭ الدىن الۋ بويىنشا ارنايى شارالار قابىلداندى. اتاپ ايتقاندا, اكىمشىلىك جانە وندىرىستىك نىسانداردا سانيتارلىق-دەزينفەكتسيالىق جانە باقىلاۋ-وتكىزۋ تارتىپتەرى كۇشەيتىلدى. كاسىپورىنداردا اكىمشىلىك قىزمەتكەرلەردىڭ 70%-ى قاشىقتان جۇمىس ىستەۋ رەجىمىنە كوشتى. زاۋىت قىزمەتكەرلەرىنە قۇرىلىمدىق بولىمشەلەر اراسىندا ءجۇرىپ-تۇرۋعا شەكتەۋ قويىلدى. قىزمەتكەرلەردىڭ دەنساۋلىعىن قاداعالاۋ بويىنشا كۇندەلىكتى مونيتورينگ جۇرگىزىلەدى, ءۇي-جايلار مەن عيماراتتاردا, كولىك قۇرالدارىنا جانە زاۋىتتارعا تيەسىلى ايماقتاردا تازالىق جۇمىستارى ۇنەمى اتقارىلىپ تۇرادى, – دەيدى.
«قازمۇنايگاز» زاۋىتتاردى كەمىندە 2 ايعا جەتەتىندەي مولشەردە سۋمەن, ازىق-ت ۇلىكپەن, ءبىرىنشى كەزەكتەگى اسا قاجەت تاۋارلارمەن, جەكە قورعانىش قۇرالدارىمەن قامتاماسىز ەتۋدە. بارلىق جۇمىسشىلارعا جەكە قورعانىش قۇرالدارى – مەديتسينالىق ماسكا, نيتريل قولعاپتارى, باكتەرياعا قارسى قۇرالدار بەرىلگەن.
