ونىڭ ايتۋىنشا, 16 ساۋىردە ساعات 19:03-تە جاۋىنگەرلىك كەزەكشىلىككە دايىندالۋ ءۇشىن جوسپارلى ۇشۋ كەزىندە قاراعاندى اۋەجايىنىڭ وڭتۇستىگى تۇسىندا قازاقستان اسكەري-اۋە كۇشتەرىنىڭ «ميگ-31» ۇشاعى اپاتقا ۇشىراعان. مۇنداي وقيعا «ميگ-31» ۇشاعىنا قاتىستى العاشقى رەت تىركەلىپ وتىرعان جوق.
ۇشۋدان كەيىن قوزعالتقىشتاردىڭ بىرىندە ءورت شىققان. ەكيپاج ۇشاقتى ەلدى مەكەن اۋماعىنان بۇرىپ جىبەرۋ ءۇشىن بارلىق شارالاردى قابىلداپ, قاراپايىم تۇرعىندارعا ەش قاۋىپ تونبەيتىنىنە كوز جەتكىزگەن سوڭ, ۇشۋ جەتەكشىسىنىڭ بۇيرىعىمەن كاتاپۋلتتەۋگە كوشتى.
– بورتتا 2 ۇشقىش بولدى. ەكيپاجدىڭ دايارلىق دەڭگەيى جوسپارلانعان ۇشۋ تاپسىرماسىن ورىنداۋعا سايكەستەلگەن ەدى. ۇشاقتى جالپى ۇشۋ ۋاقىتى 888 ساعاتتى قۇراعان پودپولكوۆنيك ارمان قۇرمانعاليەۆ پەن ۇشۋ ۋاقىتى 1161 ساعاتتان اسقان پودپولكوۆنيك يۆان گاۆريلكو باسقارعان بولاتىن, – دەدى ن.ورمانبەتوۆ.
العاش بولىپ اپات ورنىنا «قازقۇتقارۋ» ىزدەستىرۋ-قۇتقارۋ قىزمەتىنىڭ كەزەكشى تىكۇشاعى, سونداي-اق اسكەري-اۋە كۇشتەرىنىڭ جەردەگى ىزدەستىرۋ-قۇتقارۋ كومانداسى جەتتى. ۇشقىشتارعا جەدەل مەديتسينالىق كومەك كورسەتىلىپ, كەيىن ولار قاراعاندى قالاسىنداعى وبلىستىق اۋرۋحاناعا ەۆاكۋاتسيالاندى. قازىرگى ۋاقىتتا ۇشقىشتارعا قاجەتتى مەديتسينالىق كومەك كورسەتىلۋدە. ءبىر ۇشقىشتىڭ جاعدايىن دارىگەرلەر «قاناعاتتانارلىق» دەپ باعالاۋدا. ەكىنشى ۇشقىشتىڭ جاعدايى – «ورتاشا».
و.ورمانبەتوۆتىڭ ايتۋىنشا, قورعانىس ءمينيسترى اتالعان اۆياتسيالىق وقيعانى تەكسەرۋ جونىندە كوميسسيا تاعايىندادى. اپات سەبەبى انىقتالعانعا دەيىن «ميگ-31» ۇشاقتارىنىڭ ۇشۋى توقتاتىلدى.
