10 قىركۇيەك. ساعات 11-30.
قازىر عانا استاناداعى «استانا-ارەنا» سپورت كەشەنىندە 2014 جىلعى الەم چەمپيوناتىنىڭ ىرىكتەۋ تۋرنيرىندە قازاقستان مەن شۆەتسيا قۇرامالارى كەزدەسىپ, ويىن 1:0 ەسەبىمەن قوناقتاردىڭ پايداسىنا شەشىلدى. ماتچتاعى جالعىز گولدى شۆەدتتەر قۇرامىنداعى ەڭ تانىمال دا شەبەر ويىنشى زلاتان يبراگيموۆيچ 28-سەكۋندتا سوقتى.
ءبىزدىڭ جىگىتتەر تاپ مۇنداي ساتسىزدىكتى كۇتپەسە كەرەك, ويىن باستالماي جاتىپ سالىنعان گول ولاردى ءبىراز ۋاقىتقا دەيىن ءوز-وزدەرىنە كەلتىرە قويمادى. ءبىر قىزىعى, العاشقى دوپتى تەز سالىپ العان شۆەدتەر دە وسىعان قاناعاتتانعان ءتۇر ءبىلدىرىپ, جاڭا قارقىندى شابۋىلعا اسىعاتىنىن بايقاتپادى. وسىنداي مايدا ويىن قازاقستاندىقتاردىڭ تىزگىندى مۇمكىندىگىنشە تەزىرەك قولعا الۋدارىنا مۇمكىندىك بەردى. وسىنىڭ ناتيجەسىندە ولار اقىرىن شابۋىلعا دا شىعا باستادى. كوپ ۇزاماي دميتري شومكونىڭ سول قاپتالدان جاساعان جورىعى قارسى قاقپاعا ءبىرىنشى قاۋىپ تۋدىرىپ ۇلگەردى. بىراق ايىپ الاڭىنا جەتكەن دوپقا بىزدەن ەگە بولاتىن ەشكىم تابىلمادى.
بۇدان كەيىن ويىن ەكى جاقتىڭ الما-كەزەك شابۋىلىمەن ءوتىپ جاتتى. مۇندا مەيمانداردىڭ ازداعان باسىمدىلىعى ءبىلىندى. بىراق قارسىلاستار ەسەپتى وزگەرتە المادى.
ال ەكىنشى تايمنىڭ باسىندا قازاقستان قۇراماسى ەسەپتى تەڭەستىرىپ كەتە جازدادى. بۇعان سۆەنسەننىڭ ءوز ايىپ الاڭىنا جاقىن جەردە ءتارتىپ بۇزعانى سەبەپكەرلىك ەتتى. ايىپ دوبىن ۇرۋعا كەلگەن اندرەي فينونچەنكو ونى ايىپ الاڭىنا اۋەلەتىپ جەتكىزۋ ورنىنا توتەلەتىپ جونەلتتى. وعان شۆەد قورعاۋشىلارىنىڭ ءبىرى بۇرىن جەتتى. بىراق دوپتى الىسقا ۇزاتىپ ۇلگەرە المادى. سوسىن كەزەكتى مارتە بەرىلگەن دوپقا سەرگەي حيجنيچەنكو يەلىك ەتتى. ال ونىڭ سوققىسىن قورعاۋشى يساكسسون قايتاردى.
قازاقستاندىقتار بۇدان كەيىن دە اشىق بەلسەندىلىك تانىتتى. شۆەدتەر ءوز كەزەگىندە وسىعان ەرىك بەرىپ قويىپ, باسەڭدىك كورسەتتى. سوعان قاراماستان, ولار 64-مينۋتتا تاعى ءبىر گول سوعىپ كەتۋگە شاق قالدى. الايدا, ەكدالدىڭ الىستان ۇرعان دوبى قاقپا باعانىنان كەيىن قايتتى.
ارادا بەس مينۋت وتكەندە ءبىزدىڭ جىگىتتەر تاعى ەكى قاۋىپتى شابۋىل جاسادى. الدىمەن ماقسات بايجانوۆ شۆەدتەر ايىپ الاڭىندا اشىق قالىپ, دوپ قابىلدادى. بىراق ونى ۇرا المادى. كەلەسىسىندە شومكا الىستان سوققى جاسادى. ونى يساكسسون قايتاردى.
ويىن وسى قالپىندا سوڭىنا جەتتى.
دامير قوجامقۇل.
قازىرگە دەيىن مىنا كوماندالار اراسىنداعى ناتيجەلەر بەلگىلى بولىپ وتىر:
رەسەي – يزرايل 3:1
ليتۆا – ليحتەنشتەين 2:0
ارمەنيا - دانيا 0:1
