• 10 قىركۇيەك, 2013

بۇگىنگى قارسىلاس – شۆەتسيا قۇراماسى

260 رەت

كورسەتىلدى

5 مين

وقۋ ءۇشىن

Egemen Qazaqstan

قازاقستان ۇلتتىق قۇراماسى استانادا 2014 جىلعى الەم چەمپيوناتى ىرىكتەۋ ءتۋرنيرىنىڭ كەزەكتى كەزدەسۋىن وتكىزەدى.

كازاحستان شۆەتسيا

بۇل جولى ەلىمىزدىڭ باس كومانداسى استاناداعى «استانا-ارەنا» ستاديونىندا شۆەتسيا ۇلتتىق قۇراماسىن قابىلدايدى. بۇعان دەيىن ءبىزدىڭ قۇرامانىڭ سكانديناۆيا تۇبەگىنىڭ ءبىر بولىگىن الىپ جاتقان ەلمەن ءالى كەزدەسپەگەنىن بىلەمىز. جالپى, قازاقستان قۇراماسى سكانديناۆيا ەلدەرىنىڭ ەشقايسىسىمەن ءالى ويناپ كورگەن جوق. تەك جاقىندا عانا اتالعان تۇبەككە جاقىن ورنالاسقان دانيا كورولدىگىنىڭ اۆتونومياسى سانالاتىن فارەر ارالدارىمەن عانا ءۇشىنشى ماتچىن وتكىزدى. سوندىقتان قازاقستان مەن شۆەتسيا اراسىنداعى بۇگىنگى كەزدەسۋ ەكى ەلدىڭ العاشقى ماتچى بولادى.

جالپى, شۆەتسيا كومانداسى تۋرالى كوپ نارسە ايتۋعا بولادى. بۇل ەلدىڭ قۇراماسى حالىقارالىق ارەنادا وزىندىك قولتاڭباسى بار, الەم جانە ەۋروپا چەمپيوناتتارىندا بۇرىننان بەرى جاقسى ونەر كورسەتىپ كەلە جاتقان كوماندا رەتىندە بەلگىلى. شۆەدتەر 1950-1990 جىلدارى الەم جانە ەۋروپا چەمپيوناتتارىندا وزىندىك ويىن ورنەگىن قالىپتاستىرىپ ۇلگەرگەن. ول ءتىپتى, ەكى رەت الەم چەمپيوناتىنىڭ قولا جۇلدەگەرى اتانعان. العاش رەت 1950 جىلى برازيليادا وتكەن الەمدىك باسەكەدە, ەكىنشىسىن 1994 جىلى اقش-تا وتكەن سىندا الدى. سودان بەرى شۆەدتەر حالىقارالىق ارەنادا لايىقتى ونەر كورسەتىپ كەلەدى. قازىرگى كەزدە دە سكانديناۆيا ەلى ەشكىمگە جىعىلا سالاتىنداي ەمەس. ول 2014 جىلعى الەم چەمپيوناتىنىڭ ىرىكتەۋ تۋرنيرىندە ءبىزدىڭ «س» توبىندا گەرمانيادان كەيىنگى ەكىنشى ورىندا تۇر. توپتاعى سوڭعى كەزدەسۋىن ولار 6 قىركۇيەك كۇنى يرلاندياعا قارسى وتكىزىپ, 2:1 ەسەبىمەن ۇتتى. قالاي دەسەك تە, بۇگىنگى كەزدەسۋ قىزىقتى جانە تارتىستى وتەتىنى انىق. بۇعان قوسا, قازاقستاندىق جانكۇيەرلەردى شۆەتسيا قۇراماسىنىڭ قازىرگى كۇنگى «جۇلدىزى», تەگى بوسنيالىق مۇسىلمان وعلانى زلاتان يبراگيموۆيچتىڭ ونەرى قاتتى قىزىقتىراتىنى دا ءسوزسىز.

وسى كەزدەسۋ الدىندا قازاقستان مەن شۆەتسيا قۇرامالارى كوماندالار قۇرامىن جاريالادى. ءبىزدىڭ باس كومانداعا قاقپاشىلار اندرەي سيدەلنيكوۆ («اقتوبە»), الەكساندر موكين («شاحتەر»), انتون تسيرين («جەتىسۋ»), قورعاۋشىلار قايرات نۇرداۋلەتوۆ («استانا»), اندرەي پورىۆاەۆ («شاحتەر»), يۋري لوگۆينەنكو, الەكسەي مۋلداروۆ (ەكەۋى دە – «اقتوبە»), ۆيكتور دميترەنكو («استانا»), مارك گۋرمان, الەكساندر كيسليتسىن (ەكەۋى دە – «قايرات»), كونستانتين ەنگەل («ەنەرگي» كوتبۋس, گەرمانيا), جارتىلاي قورعاۋشىلار نۇربول جۇماسقاليەۆ («توبىل»), ماقسات بايجانوۆ («شاحتەر»), مارات حايرۋللين («اقتوبە»), ۆالەري كوروبكين («استانا»), دميتري شومكو («ەرتىس»), اندرەي كارپوۆيچ («ورداباسى»), اناتولي بوگدانوۆ («توبىل»), شابۋىلشىلار تاڭات نوسەرباەۆ («استانا»), اندرەي فينونچەنكو, سەرگەي حيجنيچەنكو (ەكەۋى دە – «شاحتەر»), سەرگەي وستاپەنكو («استانا»), الەكسەي ششەتكين («اتىراۋ»), يگور يۋرين («ەرتىس») شاقىرىلدى.

شۆەتسيا مىنا قۇراممەن ويىنعا شىعادى: قاقپاشىلار – اندرەاس يساكسسون («كاسىمپاشا», تۇركيا), كريستوففەر نوردفەلدت («حەرەنۆەن», گوللانديا), يۋحان ۆيلاند («كوپەنگاگەن», دانيا); قورعاۋشىلار – ميكاەل انتونسسون («بولونيا», يتاليا), پەر بەنگتسسون («كوپەنگاگەن», دانيا), راسمۋس بەنگتسسون («تۆەنتە», گوللانديا), اندرەاس گرانكۆيست («دجەنوا», يتاليا), ادام يۋحانسسون («سيەتل ساۋندەرس», سشا), ميكاەل لۋستيگ («سەلتيك», شوتلانديا), پەر نيلسسون («نيۋرنبەرگ», گەرمانيا), يۋناس ۋلسسون («ۆەست برومۆيچ», انگليا), مارتين ۋلسسون («بلەكبەرن روۆەرس», انگليا); جارتىلاي قورعاۋشىلار – دجيممي دۋرماز («گەنچلەربيرليگي», تۇركيا), البين ەكدال («كالياري», يتاليا), الەكساندر كاچانيكلي («فۋلحەم», انگليا), سەباستيان لارسسون («ساندەرلەند», انگليا), اندەرس سۆەنسسون («ەلفسبورگ», شۆەتسيا), پونتۋس ۆەرنبلۋم (تسسكا, رەسەي), ەركان زەنگين («گەنچلەربيرليگي», تۇركيا); شابۋىلشىلار – يۋحان ەلماندەر («گالاتاساراي», تۇركيا), توبياس حيۋسەن («گەتەبورگ», شۆەتسيا), زلاتان يبراگيموۆيچ («پاري سەن-جەرمەن», فرانتسيا), ولا تويۆونەن (پسۆ, گوللانديا).

باس جاتتىقتىرۋشى – ەريك حامرەن (شۆەتسيا).

ماتچ استانا ۋاقىتىمەن كەشكى ساعات 22.00-دە باستالادى. كەزدەسۋ «حابار» ارناسىنان تىكەلەي ەفيردە كورسەتىلەدى. ءبىزدىڭ گازەتتىڭ سايتى (www. egemen.kz) ماتچتان رەپورتاج بەرەتىن بولادى. ونى ويىن بىتكەن سوڭ ءبىر-ءبىر جارىم ساعاتتان كەيىن وقي الاسىزدار.

داستان كەنجالين,

«ەگەمەن قازاقستان».