«بەكىرە – 2020» اكتسياسىنىڭ العاشقى ەكى اپتاسىندا 3،7 توننا بالىق تاركىلەندى

ناتيجەسىندە  1،5 ملن تەڭگە سومادا اكىمشىلىك ايىپپۇل سالىنىپ، 3،7 توننا بالىق تاركىلەندى، ونىڭ ىشىندە 333 كگ بەكىرە تۇقىمداس بالىق ءتۇرى، 15،4 كگ بەكىرە تۇقىمداس بالىقتىڭ ۋىلدىرىعى جانە 600 زاڭسىز اۋلاۋ قۇرىلعىسى تاركىلەندى. 

قازىرگى ۋاقىتتا اكتسيانى وتكىزۋگە 800 قىزمەتكەر، 60 ءجۇزۋ كولىگى، 116 اۆتوكولىك، 2 تىكۇشاق جۇمىلدىرىلدى. اتىراۋ، ماڭعىستاۋ جانە باتىس قازاقستان وبلىستارىندا 44 جىلجىمالى جانە ستاتسيونارلى پوستتار قۇرىلدى.

سونىمەن قاتار 2020 جىلعى 14 ساۋىردە  «بەكىرە -2020» اكتسياسى اياسىنداعى رەيدتىك شارا جۇرگىزۋ بارىسىندا اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ دامبى بولىمشەسىنىڭ ينسپەكتورلارى اتىراۋ قالاسىنداعى جايىق وزەنىنىڭ بويىنداعى ەركىنقالا كەنتىنىڭ اۋماعىندا (ەرەكشە قورعالاتىن تابيعي اۋماق) زاڭسىز بالىق اۋلاپ جۇرگەن 4 زاڭ بۇزۋشىنى انىقتادى.

بالىق قورعاۋ قىزمەتكەرلەرى زاڭ بۇزۋشىلارعا وزدەرىن تانىستىرىپ، ءىس جۇرگىزۋ قۇجاتتارىن راسىمدەۋگە كىرىسكەن كەزدە بۇزۋشىلار قارسىلىق كورسەتىپ، وزدەرىنىڭ ۋرال ماركالى موتوتسيكلدەرىن ورتتەپ، بەلگىسىز باعىتتا بوي تاسالادى. بۇل فاكتىنى دامبى بولىمشەسىنىڭ قىزمەتكەرلەرى ۇيالى تەلەفونعا بەينەگە ءتۇسىردى.

وقيعا ورنىنان كەلەسى ايعاق زاتتار تاركىلەندى: جالپى سالماعى 270 كگ بولاتىن قارا بالىق تۇرلەرى، 4 دانا زاڭسىز بالىق اۋلاۋ قۇرالى - مونوتالشىقتى «قىتاي اۋى»، قولدان جاسالعان ءجۇزۋ قۇرالى جانە ۋرال ماركالى موتوتسيكل. بالىق رەسۋرستارىنا كەلتىرىلگەن شىعىننىڭ سوماسى 900 072 تەڭگەنى قۇرايدى. 

اتالعان فاكتى بويىنشا قر قىلمىستىق كودەكسىنىڭ 335-بابىمەن قىلمىستىق ءىس قوزعالىپ، قۇقىق قورعاۋ ورگاندارىنا جانۋارلار دۇنيەسىن قورعاۋ جونىندەگى ءۇش مەملەكەتتىك ينسپەكتورلاردىڭ ومىرىنە قاۋىپ ءتوندىرۋ فاكتىسى بويىنشا رەسمي ءوتىنىش جولداندى.