عىلىمي جۇمىستار جانە يننوۆاتسيا جونىندەگى دەپارتامەنت ۇيىتقى بولىپ وتىرعان اپتالىق اياسىندا وقۋ ورنىنىڭ پروفەسسور-وقىتۋشىلارى مەن ءبىلىم الۋشىلارىنا ارنالعان 20-عا جۋىق ءىس-شارا وتكىزىلەدى.
– ولاردىڭ قاتارىندا عىلىمي پوستەرلەر مەن ەسسە بايقاۋلارى, «ۋنيۆەرسيتەتتىڭ ۇزدىك عالىمى», «ەڭ ۇزدىك جاس عالىم» سايىستارى, «Startup-Tomiris» يننوۆاتسيالىق جوبالار كونكۋرسىنىڭ ەكىنشى كەزەڭى مەن ءتۇرلى عىلىمي تاقىرىپتاعى ۆەبينارلار, Ted فورماتىنداعى كونفەرەنتسيالار مەن كەزدەسۋلەر بار, – دەدى ۋنيۆەرسيتەتتىڭ رەسمي وكىلى.
اتاپ ايتقاندا, وقۋ ورنىنىڭ ماگيسترانتتارى اراسىندا وتەتىن «Open Source» اتتى ەسسە بايقاۋىنىڭ ماقساتى – ۋنيۆەرسيتەت ءبىلىم الۋشىلارىنىڭ شىعارماشىلىق الەۋەتىن كوتەرۋ, جاستاردىڭ عىلىمعا دەگەن ىنتاسىن ارتتىرۋ.
ال «ايەلدەردىڭ عىلىمداعى ورنى» تاقىرىبىنداعى پوستەرلەر سايىسىنا دوكتورانتتار قاتىسادى. ونلاين فورماتتا ۇيىمداستىرىلاتىن شارانىڭ كوزدەگەنى – جاس ىزدەنۋشىلەردىڭ كاسىبي جانە عىلىمي دەڭگەيىن ارتتىرۋ جانە ولاردىڭ شىعارماشىلىق قابىلەتىن دامىتۋ.
اپتالىق اياسىندا «Startup-Tomiris» اتتى جاس عالىمداردىڭ يننوۆاتسيالىق جوبالار بايقاۋىنىڭ ەكىنشى كەزەڭى دە وتەدى. ءداستۇرلى سايىستىڭ ماقساتى – جاس عالىمداردىڭ جاسامپازدىق الەۋەتىن كوتەرۋ, ولاردى زاماناۋي عىلىمنىڭ ماڭىزدى ماسەلەلەرىن شەشۋگە بەلسەندى تۇردە تارتۋ, ۋنيۆەرسيتەت ءبىلىم الۋشىلارىنىڭ شىعارماشىلىق قابىلەتىن اشۋ جانە يننوۆاتسيالىق كاسىپكەرلىككە تارتۋ.
سونداي-اق اپتالىق بارىسىندا «ۇزدىك جاس عالىم» بايقاۋى دا ۇيىمداستىرىلماق. جالپىۋنيۆەرسيتەتتىك سايىسقا 40 جاسقا دەيىنگى وقىتۋشىلار قاتىسا الادى. ال «ۋنيۆەرسيتەتتىڭ ۇزدىك عالىمى» كونكۋرسىنا وقۋ ورنىنىڭ 40 جاستان جوعارى عالىمدارى قاتىسادى.
بايقاۋ شارتى بويىنشا عالىمداردىڭ جاريالانعان عىلىمي ەڭبەكتەرى مەن ماقالالارى, ولاردىڭ عىلىمي كونفەرەنتسيالارعا قاتىسۋى, الىنعان قورعاۋ قۇجاتتارى, ستۋدەنتتەردىڭ عىلىمي جۇمىستارىنا جەتەكشىلىك ەتۋى جانە قوعامدىق جۇمىستارى ساراپقا سالىنباق.
– ايتا كەتەيىن, قىزدار ۋنيۆەرسيتەتىندە قولعا الىنعان «عىلىم اپتالىعى» شەڭبەرىندەگى ءىس-شارالاردىڭ بارلىعى دا ونلاين فورماتتا وتەدى, – دەيدى ءباسپاسوز قىزمەتىنىڭ جەتەكشىسى جاندار اسان.
الماتى
