«كارانتين ەنگىزىلگەننەن كەيىن اۋرۋدىڭ ءوسۋ قارقىنى رەسپۋبليكا بويىنشا 24%-دان 7%-عا دەيىن تومەندەدى. ياعني, سوڭعى ءتورت كۇندە كوروناۆيرۋس جۇقتىرۋدىڭ جاڭا جاعدايلارىنىڭ باسەڭدەگەنىن بايقايمىز. الايدا, قازاقستاندا ەپيدەميا شارىقتاۋ شەگىنە جەتپەگەنىن ايتا كەتۋ كەرەك. نۇر-سۇلتان جانە الماتى قالالارىندا كارانتين شارالارىنىڭ كۇشەيۋىنە بايلانىستى ەپيدەميانىڭ ءوسىمى ايتارلىقتاي باياۋلادى. دەگەنمەن باسقا وڭىرلەردە ەپيدەميا ءورشىپ بارادى. قازاقستاندا ەپيدەميانىڭ شىرقاۋ شەگى شامامەن ءبىر-ەكى اپتانىڭ ىشىندە بولادى دەگەن بولجام جاسالىپ وتىر», دەگەن مينيسترلىك وكىلى 4 ساۋىردەن بەرى نۇر-سۇلتان قالاسىندا اۋرۋدىڭ ءوسۋ قارقىنى 8,4%-دان 0,9%-عا, الماتىدا 15%-دان 2,5%-عا دەيىن تومەندەگەنىن جەتكىزدى.
الماتىدا ەمدەلىپ جاتقان ءبىر ناۋقاستىڭ جاعدايى وتە اۋىر ەكەنىن حابارلاعان ب. جاقسەلەكوۆا: «قازىر ستاتسيونارلىق ەمدى 712 ناۋقاس قابىلداپ جاتىر. الماتىدا جاتقان پاتسيەنتتەردىڭ ءبىرىنىڭ جاعدايى اسا اۋىر. 17 ناۋقاستىڭ جاعدايى اۋىر, 107 ناۋقاستىڭ جاعدايى ورتاشا دەڭگەيدە. ال اۋرۋ جۇقتىرعانداردىڭ 80%-ى, ياعني 587 ادامنىڭ اۋرۋى جەڭىل نەمەسە سيمپتومسىز», دەدى.
بۇدان بولەك بوتاگوز جاقسەلەكوۆا مەديتسينا قىزمەتكەرلەرىنە بەرىلىپ جاتقان سىياقىنىڭ جايىنا توقتالدى. ونىڭ ايتۋىنشا, جەرگىلىكتى اتقارۋشى ورگانداردىڭ جانىنان مەديتسينا قىزمەتكەرلەرىنە قوسىمشا سىياقى تولەۋدى قاداعالايتىن كوميسسيا قۇرىلعان. مەديتسينالىق ۇيىمداردىڭ باسشىلارى سىياقى الاتىن قىزمەتكەرلەردىڭ اتى-ءجونى كورسەتىلگەن ءتىزىمدى كوميسسياعا بەرەدى. تولەم الەۋمەتتىك مەديتسينالىق ساقتاندىرۋ قورىنىڭ ەسەبىنەن بەرىلەدى. «بۇيرىق بويىنشا جەدەل باسقارۋ شتابىنىڭ باستىعى نەمەسە ونىڭ ورىنباسارىنىڭ باسشىلىعىمەن جەرگىلىكتى اتقارۋشى ورگاننىڭ جانىنان كوميسسيا قۇرىلادى. ونىڭ قۇرامىنا وبلىستىڭ باس سانيتارلىق دارىگەرى, دەنساۋلىق ساقتاۋ, جۇمىسپەن قامتۋ جانە الەۋمەتتىك قورعاۋ باسقارمالارىنىڭ, ۇكىمەتتىك ەمەس قۇرىلىمداردىڭ وكىلدەرى كىرەدى. ناۋرىز ايىندا شامامەن 5,2 ملرد تەڭگە كولەمىندەگى قاراجاتقا دەنساۋلىق ساقتاۋ ۇيىمدارىمەن كەلىسىمشارت جاسالدى. مەديتسينا قىزمەتكەرلەرىنە 8 ساۋىردەن باستاپ وسى قاراجاتتان اۋدارىلىپ جاتىر. كەشە بەس ايماق ءوز قىزمەتكەرلەرىنە سىياقىنى اۋداردى. قالعان ايماقتار جۇمىستى جالعاستىرۋدا», دەدى مينيسترلىكتىڭ جاۋاپتى حاتشىسى.
سونداي-اق سپيكەر ەلىمىزگە كومەككە كەلگەن قىتاي دەلەگاتسياسى نۇر-سۇلتان, الماتى جانە قاراعاندى قالالارىنداعى كوپبەيىندى اۋرۋحانالار مەن كلينيكالاردى ارالاپ, جوو-لاردا كەزدەسۋ وتكىزەتىنىن, ولارمەن ەلىمىزدىڭ مەديتسينا ماماندارى اراسىندا ونلاين تاجىريبە الماسۋ دا بولاتىنىن اتاپ ءوتتى. «9 ساۋىردە ەلىمىزگە قىتايدىڭ 10 مەديتسينا قىزمەتكەرى كەلدى. ولاردىڭ ىشىندە ينتەنسيۆتى تەراپيا, ينفەكتسيالىق باقىلاۋ, پۋلمونولوگيا, ەپيدەميولوگيا, قوعامدىق دەنساۋلىق ساقتاۋ سالاسىنداعى ماماندار بار. سونىمەن قاتار دەلەگاتسيا قۇرامىندا جاڭا كوروناۆيرۋس ينفەكتسياسىمەن كۇرەستە تاجىريبەسى بار مەدبيكە دە كەلدى. قىتايلىق دەلەگاتسيانىڭ باعدارلاماسى وتە مازمۇندى. 15 كۇنگە سوزىلادى. ولار كوپبەيىندى اۋرۋحانالار مەن كلينيكالاردى ارالاپ, ءارتۇرلى ماماندىقتاعى دارىگەرلەرمەن ونلاين-ترەنينگ وتكىزەدى. دەلەگاتسيامەن تاجىريبە الماسۋ ءۇشىن اۋداندىق دەڭگەيگە دەيىنگى مەديتسينالىق قىزمەتكەرلەرىمىزدى تارتىپ وتىرمىز. مەديتسينالىق جوو-لاردا كەزدەسۋ مەن ءباسپاسوز ءماسليحاتتارىن دا وتكىزەدى. ماماندار ۆيرۋستى انىقتاۋ الگوريتمى, بايلانىستا بولعان ادامداردى وقشاۋلاۋ, قىتايداعى ەپيدەميالىق زەرتتەۋ ادىستەرىن پايدالانۋ, ەمدەۋ حاتتامالارى مەن دياگنوستيكا, مەديتسينالىق قىزمەتكەردىڭ ۆيرۋس جۇقتىرۋىن بولدىرماۋ امالدارى جايلى ايتادى», دەدى ب.جاقسەلەكوۆا.
