ولاردىڭ اراسىندا پۋلمونولوگ, ەپيدەميولوگ, ينفەكتسيونيست ماماندار مەن ساراپشىلار بار. اق حالاتتىلار 24 ناۋرىزدا مەملەكەت باسشىسى قاسىم-جومارت توقاەۆ پەن قىتاي توراعاسى
سي ءتسزينپيننىڭ تەلەفون ارقىلى كەلىسۋى بويىنشا شەكارالىق ايماقتا ورنالاسقان شىڭجاڭ ولكەسىنىڭ بەس اۋرۋحاناسىنان ارنايى جونەلتىلىپ وتىر. ولار نۇر-سۇلتان, الماتى جانە قاراعاندى قالالارىندا بەس-بەس كۇننەن بولادى دەپ جوسپارلانعان. كومەككە كەلگەن دارىگەرلەردىڭ بارلىعىنان قازاقستانعا كەلگەن بويدا بىرەر ساعاتتا ناتيجەسى دايىن بولاتىن سىنامالار الىنىپ, دەنساۋلىق جاعدايى تەكسەرىلگەن.
جۇما كۇنى شۇار حالىق اۋرۋحاناسى باس دارىگەرىنىڭ ورىنباسارى لۋ چىن مەن شىڭجاڭ مەديتسينا ۋنيۆەرسيتەتىنىڭ №1 سەرىكتەس اۋرۋحاناسىنىڭ جۇقپالى اۋرۋلار دارىگەرى لۋ شياۋبو پرەزيدەنت جانىنداعى ورتالىق كوممۋنيكاتسيالار قىزمەتىنىڭ ونلاين ءباسپاسوز ءماسليحاتىنا قاتىسىپ, جۋرناليستەردىڭ سۇراعىنا جاۋاپ بەردى.
وقشاۋلانۋ كوروناۆيرۋستان ساقتانۋدىڭ جانە تارالۋىنا جول بەرمەۋدىڭ ەڭ ناتيجەلى ءتاسىلى ەكەنىن جەتكىزگەن ولار ەلورداداعى كۇشەيتىلگەن توتەنشە جاعداي رەجىمىنىڭ جاقسى ساقتالىپ جاتقانىنا وڭ باعاسىن بەردى. «كارانتين كوپتەگەن ادامنىڭ تۇرمىسىنا قولايسىزدىق اكەلەتىنى راس. بىراق بۇل ىندەتتەن تەز قۇتىلۋدىڭ بىردەن-ءبىر ءتيىمدى جولى. ءبىز نۇر-سۇلتانعا كەشە كەلدىك. سوعان قاراماستان ءبىز بۇل قالادا جاقسى جۇمىس جۇرگىزىلىپ جاتقانىن بايقادىق. ەڭ باستىسى, كارانتين ەنگىزىلگەن. كوپتەگەن ارىپتەسىمىزدىڭ ماسكا تاعىپ جۇرگەنىن, ءتىپتى ءبىزدى وسىندا الىپ كەلگەن جۇرگىزۋشىنىڭ دە ارنايى كيىم كيگەنىن كوردىك. سول سەبەپتى قولعا الىنعان شارالار دۇرىس دەپ ويلايمىن. كەيىن اۋرۋحانالارعا بارىپ, جاعدايمەن تولىق تانىسقان سوڭ تولىقتاي باعا بەرەمىز», دەدى ينفەكتسيونيست لۋ شياۋبو.
ال لۋ چىننىڭ ايتۋىنشا, قىتايدا 3387 مەديتسينا قىزمەتكەرى اۋرۋ جۇقتىرعان. ونىڭ 90%-ى ۋحان قالاسىنىڭ دارىگەرلەرى كورىنەدى. «ولارعا ينفەكتسيا العاش تارالعان كەزدە جۇققان. مەديتسينا قىزمەتكەرلەرى اۋرۋدىڭ الدىن الۋعا ارنالعان وقۋ-جاتتىعۋدان ءوتىپ, قورعانىش قۇرالدارىمەن قامتاماسىز ەتىلگەن سوڭ اۋرۋ جۇقتىرۋ دەڭگەيى ايتارلىقتاي تومەندەدى», دەدى ول.
ەلىمىزگە كەلگەن ماماندار شىڭجاڭ پروۆينتسياسىندا ىندەت جۇقتىرعانداردى ەمدەۋگە اتسالىسقان شىڭجاڭ ولكەلىك حالىق اۋرۋحاناسى, شىڭجاڭ مەديتسينا ۋنيۆەرسيتەتىنىڭ №1 سەرىكتەس اۋرۋحاناسى, ولكەلىك ءداستۇرلى قىتاي مەديتسيناسى اۋرۋحاناسى, ىلە وبلىستىق سانيتارلىق-ەپيدەميالىق باقىلاۋ ورتالىعى جانە ىلە وبلىستىق دوستىق اۋرۋحاناسىنىڭ باسشىلارى مەن قىزمەتكەرلەرى. ايتا كەتەرلىگى, COVID-19 شىڭجاڭ پروۆينتسياسىنداعى 76 ادامعا جۇعىپ, ۇشەۋى قايتىس بولعان ەدى. قالعاندارى تۇگەل جازىلىپ شىققان ايماقتا سوڭعى 55 كۇننەن بەرى جاڭا جاعداي تىركەلمەگەن.
