كەڭەستە ەگىس القاپتارىن, اۋىل شارۋاشىلىعى تەحنيكاسىن, تۇقىم مەن تىڭايتقىشتاردى دايىنداۋ, سونداي-اق فەرمەرلەردىڭ جانار جاعارمايمەن قامتاماسىز ەتىلۋى جانە كوكتەمگى ەگىس جۇمىستارىن قارجىلاندىرۋ بارىسى تالقىلاندى.
جيىن بارىسىندا اۋىل شارۋاشىلىعى ءمينيسترى ساپارحان وماروۆ جەرگىلىكتى اتقارۋشى ورگاندار وكىلدەرىنە وبلىستاعى ەگىن ناۋقانىنا قاتىستى جاعدايدى اشىق ايتۋعا جانە مينيسترلىككە ناقتى اقپارات بەرۋگە شاقىردى.
«بىزگە اقپاراتتى دۇرىس بەرىڭىزدەر, ەرتەڭ ءار تسيفر ءۇشىن جاۋاپ بەرەسىزدەر, وڭىرلەردىڭ جاعدايىن اشىق ايتىڭىزدار, ءبىز ءبىلىپ وتىرايىق», - دەپ اتاپ ءوتتى س.وماروۆ.
سونىمەن قاتار, ءىس-شارا بارىسىندا اگراريلەر قازىرگى توتەنشە جاعداي كەزىندە ەگىسكە جۇمىلدىرىلعان ادامدار مەن تەحنيكانىڭ ەركىن قوزعالۋى تۋرالى ماسەلەنى كوتەردى. قر اشم جەرگىلىكتى اتقارۋشى ورگاندارعا فەرمەرلەردى قاجەتتى رۇقساتنامالارمەن مۇمكىندىگىنشە جىلدام قامتاماسىز ەتۋدى تالاپ ەتتى.
بۇعان دەيىن حابارلانعانداي, اعىمداعى جىلى اۋىل شارۋاشىلىعى داقىلدارىن 22,5 ملن گەكتار جەرگە ەگۋ جوسپارلانىپ وتىر.
بۇل رەتتە, ەگىس القاپتارىن ءارتاراپتاندىرۋ جانە رەنتابەلدىلىگى جوعارى داقىلداردى وندىرۋگە كوشۋ شەڭبەرىندە ءداندى جانە ءداندى-بۇرشاقتى داقىلدار كولەمى ازايادى, ال مايلى, كوكونىس-باقشا جانە جەم-ءشوپ القاپتارى ايتارلىقتاي ۇلعايادى.
قازىرگى ۋاقىتتا ەگىس ناۋقانى ەلىمىزدىڭ وڭتۇستىك وڭىرلەرىندە - جامبىل, تۇركىستان, الماتى جانە قىزىلوردا وبلىستارىندا بەلسەندى جۇرگىزىلۋدە.
