«قۇرمەتتى مادەنيەت, سپورت جانە تۋريزم سالاسىنىڭ قىزمەتكەرلەرى!
مەملەكەت باسشىسى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيا ماجىلىسىندە «بەرەكە-بىرلىكتىڭ ارقاسىندا قازاقستان بۇل ىندەتتى ارتقا تاستاپ, زور سەنىممەن العا باساتىنى ايقىن. بۇگىندە ءبىز ۋاقىتىندا جۇزەگە اسقان شۇعىل شارالاردىڭ ارقاسىندا ىندەتتىڭ كەڭ تارالۋىنا جول بەرمەدىك» دەپ, ەلگە رۋحاني تۇرعىدا قولداۋ ءبىلدىرىپ جاتقان مادەنيەت سالاسىنىڭ قىزمەتكەرلەرىنە العىس ايتتى.
جاھاندى جاۋلاعان قاتەرلى ىندەتكە توسقاۋىل بولۋدىڭ ءتيىمدى جولى – وقشاۋلانۋ, تارتىپكە باعىنۋ ەكەنىن كوپشىلىك قازىر جەتە تۇسىنەدى. دارىگەرلەر, پوليتسيا قىزمەتكەرلەرى مەن ەرىكتىلەر كۇن-ءتۇن دەمەي ەلگە قىزمەت ەتۋدە. بۇل – ورتاق ىسكە ءار ازامات ءوزىنىڭ قولىنان كەلەتىن ۇلەسىن اياماۋ كەرەك كەزەڭ. بۇل – بار ادام بالاسى ءبىر تىلەك, ءبىر ماقساتقا جۇدىرىقتاي جۇمىلعان ۋاقىت.
وسىنداي كۇندەرى مادەنيەتتىڭ باسى-قاسىنداعى مايتالماندار, اقىن-جازۋشىلار مەن ونەردىڭ ءار سالاسىندا جۇرگەن جۇلدىزدارىمىز قىسقا ۋاقىتتا حالىققا دەم بەرەتىن, قىزىقتى جوبالاردى باستاپ كەتتى.
ەل پرەزيدەنتى «قازاقتەلەكوم» اق بىرلەسكەن YouTube ارناسىنداعى «كارانتيندەگى جۇلدىز» جوباسى تۋرالى جىلى پىكىر ايتتى. بۇدان بولەك ونلاين رەجيمدە جانە تاسپادا قانشاما سپورتتىق جاتتىعۋلار, دارىستەر, سۇحباتتار جانە كونتسەرتتەردەن تۇراتىن ۆيدەوكونتەنت تسيكلى جۇزەگە اسىپ جاتىر. مۇنىڭ ءبارى ونەر قايراتكەرلەرى مەن سپورت جانە تۋريزم ساڭلاقتارىنىڭ حالىققا دەگەن يگى نيەتى, ىستىق ىقىلاسى دەپ قابىل العايسىزدار.
وسى رەتتە مادەنيەت جانە سپورت سالاسى قىزمەتكەرلەرىنە بىرلىك پەن ىنتىماق تانىتىپ, حالىققا قولداۋ جاساعاندارى ءۇشىن ريزاشىلىعىمدى بىلدىرگىم كەلەدى. باستامانى قولداپ, جوعارى باعا بەرگەن مەملەكەت باسشىسىنا بۇكىل مادەنيەت, سپورت, تۋريزم سالاسى قىزمەتكەرلەرىنىڭ اتىنان زور العىس ايتامىن.
الداعى ۋاقىتتا دا ەل كوڭىلىنەن شىعاتىن ومىرشەڭ جوبالاردى جۇزەگە اسىرىپ, كورەرمەننىڭ, تىڭدارماننىڭ تالابىن قاناعاتتاندىرۋعا اتسالىسۋعا شاقىرامىن» - دەلىنگەن العىس ايتۋ حاتىندا.
