جارتىلاي اۋىر سالماقتا ايقاسىپ جۇرگەن 32 جاستاعى اقش سپورتشىسى 2008 جىلدان بەرى وسى سپورت ءتۇرىن سەركى ەتۋدە. بۇگىنگى تاڭدا ول UFC پروموۋشەنىنىڭ شوق جۇلدىزى. بارلىعى 28 كەزدەسۋ وتكىزگەن دجون دجونس تەك ءبىر رەت قانا ۇتىلدى. ونىڭ وزىندە تازا ايقاستا جەڭىلگەن جوق. 2009 جىلى مەتت حەميلگە قارسى باسەكەدە رۇقسات ەتىلمەگەن ءادىس قولداندى دەگەن جەلەۋمەن ول جارىستان شەتتەتىلگەن بولاتىن. 20 قارسىلاسىن دجونس ايقىن باسىمدىقپەن ۇتتى.
ەكىنشى ورىندا – رەسەيلىك حابيب نۇرماگومەدوۆ. جەڭىل سالماقتاعى 31 جاستاعى داعىستاننىڭ ورەنى 28 جەكپە-جەكتىڭ بارلىعىن ءوز پايداسىنا شەشتى. 18 كەزدەسۋدى ۋاقىتىنا جەتكىزبەي اياقتادى.
ءۇشىنشى ساتىعا ستيپە ميوچيچ جايعاستى. حورۆاتيادا تۋىپ-ءوسىپ, كەيىننەن اقش-قا قونىس اۋدارعان اسا اۋىر سالماقتاعى 37 جاستاعى ساقا سپورتشى 22 رەت وكتاگونعا شىعىپ, 19 رەت جەڭىس تويىن تويلادى. 15 مارتە ايقىن باسىمدىققا يە بولدى.
سونداي-اق, «توپ-10» ەرەجەسىز جەكپە-جەك شەبەرلەرى ساناتىنا گەنري سەحۋدو (اقش), دانيەل كورمە (اقش), روبەرت ۋيتتاكەر (اۋستراليا), كامارۋ ۋسمان (اقش), دەمەتريۋس دجونسون (اقش), توني فەرگيۋسون (اقش) جانە داستين پورە (اقش) سىندى ساڭلاقتار ەنىپ وتىر.
