ونىڭ ىشىندە الماتى قالاسىنىڭ 17 فرونت-ءوفيسىنىڭ 150-دەن اسا قىزمەتكەرءى ازاماتتارعا قاشىقتان كەڭەس بەرۋگە جۇمىلدىرىلىپ, ۇيدە وتىرىپ قىزمەت كورسەتءىپ وتىر. بىراق, تالاپ ادەتتەگىدەي, تاڭعى ساعات 9-دان جۇمىسىنا كىرىسۋ كەرەك جانە ساعات 6.30-عا دەيىن جالعاسۋ كەرەك.
بۇگىنگى كۇنى مەملەكەتتىك قىزمەتتىڭ 80%-دان استامىن ەلەكتروندىق ۇكىمەت پورتالى ارقىلى ونلاين الۋعا بولادى. دەگەنمەن, ءاربىر ادام سايتتا ءوز بەتىنشە جۇمىس ىستەي بىلمەيدى ءارى قوسىمشالاردى تۇسىنە بەرمەيدى. سوندىقتان كەڭەسشىنىڭ جۇمىسى وتە ماڭىزدى.
فيليالدا 1414 كولل ورتالىعىنىڭ وپەراتورلارىنان باسقا, بەينە قوڭىراۋلارعا جاۋاپ بەرەتىن ونلاين-وپەراتورلارى دا بار.
بۇگىنگى كۇنى ەتسق كومەگىمەن بارلىق مەملەكەتتىك قىزمەتتەردىڭ 80% الۋعا بولادى. سوندىقتان ازاماتتارعا ىڭعايلى بولۋ ءۇشىن جاقىندا ەلەكتروندىق تسيفرلىق قولتاڭبانى (ەتسق) ونلاين الۋ سەرۆيسى ىسكە قوسىلدى. كارانتينگە بايلانىستى كوپتەگەن ازاماتتار مەملەكەتتىك قىزمەتتەردى ۇيدە الۋ ءۇشىن موبيلدىك ازاماتتار بازاسىندا تىركەلۋى نەمەسە ەتسق-سى بولۋى ءتيىس. ال تىركەلگەندە ولاردىڭ سايكەستەندىرۋ ءراسىمىن راستاۋ ءۇشىن الماتىدا 50 وپەراتور جۇمىس ىستەيدى. ەگەر ازاماتتىڭ تەلەفون ءنومىرى موبيلدىك ازاماتتار بازاسىندا تىركەلمەگەن جاعدايدا, جۇيە ونى حقكو وپەراتورىمەن بايلانىستىرادى, ول ازاماتتى بەينەبايلانىس ارقىلى سايكەستەندىرەدى, بىرقاتار قوسىمشا سۇراقتار,(قۇجاتتاردىڭ دەرەكتەرىن, تىركەۋ ورنىن جانە ت. ب.) قويادى.
«قازىرگى كۇنى قوڭىراۋلار وتە كوپ ءتۇسىپ جاتىر. كەي كەزدە كليەنتتىڭ جۇمىسىن تولىقتاي ءوزىڭ جاساپ بەرۋگە تۋرا كەلەدى... قىزىقتى جاعدايلار دا بولىپ جاتادى. ءبىر-ەكى كۇن بۇرىن دىشىباەۆ مۇحيت دەگەن ءبىر تانىسىم بەينە- قوڭىراۋمەن حابارلاسىپ, ماعان ءتۇستى. مۇحيت ءوزىنىڭ اكەسىن Mgov mobile-عا تىركەگەلى جۇگىنگەن ەكەن. ول كەڭەس بەرىپ وتىرعان مەنى كورىپ تاڭ-تاماشا قالدى. كامەرانىڭ الدىندا اكەسىمەن بىرگە وتىرىپ, بەينەبايلانىستا بولدىق. ءبىز ءۇشىن مۇنداي جاعدايدا تىلدەسۋ قىزىقتى بولدى ارينە. اكەسىن تىركەپ ريزا بولعان ول, كورسەتىلگەن قىزمەتكە العىسىن ءبىلدىرىپ قوشتاستى», – دەيدى الاتاۋ اۋداندىق فرونت-ءوفيسىنىڭ مامانى قالامقاس ىرگەباەۆا.
