– الماتى قالاسى اۋماعىندا توتەنشە جاعداي مەن كارانتين كەزىندە ءدارى-دارمەكتەرگە قولجەتكىزۋ قالاي ءجۇرىپ جاتقانىنا توقتالماقپىن. بۇعان دەيىن تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى مەن قازاقستان رەسپۋبليكاسىنىڭ فارماتسەۆتيكالىق قىزمەتتى قولداۋ جانە دامىتۋ قاۋىمداستىعىنىڭ اراسىندا مەموراندۋمعا قول قويىلعان بولاتىن. ياعني, بۇل مەموراندۋمعا توتەنشە جاعداي مەن كارانتين كەزىندە ەڭ قاجەت پرەپاراتتار سانالاتىن 103 ءدارى-دارمەك جانە مەديتسينالىق ونىمدەر ءتىزىمى كىرگەن بولاتىن. ءبىز مەديتسينالىق پرەپاراتتاردىڭ سانى مەن باعاسىنا كۇندەلىكتى مونيتورينگ جاساپ وتىرمىز, – دەدى ا.مولداعاسىموۆا.
سپيكەردىڭ ايتۋىنشا, ءدال وسى مەديتسينالىق ونىمدەر ءتىزىمىنىڭ باعاسىن اكىمشىلىك وكىلدەرى, جوعارىدا اتالعان دەپارتامەنت پەن وزگە دە مەملەكەتتىك مەكەمەلەر كۇندەلىكتى باقىلاپ وتىر.
جۇرگىزىلگەن مونيتورينگ اياسىندا قالاداعى بارلىق 8 اۋدان قامتىلعان. بۇگىنگى كۇنى ولار 135 ءدارىحانا ۇيىمىنا باقىلاۋ جاساپ, 5 ءدارىحانادا باعا كوتەرۋ دەرەگىن انىقتاعان.
– 2019 جىلدىڭ 1 ماۋسىمىندا قر دەنساۋلىق ساقتاۋ ءمينيسترى قول قويعان وسى بۇيرىققا توقتالا كەتسەك, جوعارىدا اتالعان, ساتۋعا تىيىم سالىنعان ءدارى-دارمەكتەردىڭ بارلىق دەرلىك تۇرلەرىنە شەكتى باعا قاراستىرىلعان. جاۋاپكەرشىلىككە تارتۋ ءۇشىن 5 ءدارىحانا سوتقا جىبەرىلدى, – دەدى سپيكەر.
ايتا كەتەيىك, زاڭ بۇزعانى ءۇشىن 97 مىڭنان باستاپ 225 مىڭ تەڭگەگە دەيىن ايىپپۇلدار قاراستىرىلعان.
باس سانيتاردىڭ مالىمدەۋىنشە, قالالىق شتاب پەن «دولچە فارم» ءوندىرۋشىسىنىڭ اراسىنداعى كەلىسىمشارت نەگىزىندە قالاداعى 70 ءدارىحانادا تۇرعىندارعا ارنالعان بەتپەردە جەتكىلىكتى تۇردە ساتىلاتىن بولدى. ماسەلەن, 9 ساۋىردە 164 مىڭ بەتپەردە بولسا, بۇگىن بەتپەردە سانى 250 مىڭعا جەتىپ وتىر. ءۇش قاباتتى بەتپەردە ءۇشىن باعا ساياساتى 87 تەڭگە بولسا, ال كومىر سۇزگىسىنەن جاسالعان بەتپەردە 111 تەڭگە جانە ءبىر ادامنىڭ قولىنا 10 بەتپەردەدەن ارتىق بەرىلمەيدى.
ساۋدا جانە ينتەگراتسيا مينيسترلىگى مەن ۇلتتىق ەكونوميكا جانە دەنساۋلىق ساقتاۋ مينيسترلىكتەرى 7 ساۋىردە «مەديتسينالىق بەتپەردەلەردىڭ شەكتى باعاسىن بەكىتۋ تۋرالى» بۇيرىققا قول قويعان بولاتىن. ول بويىنشا ءبىر مەديتسينالىق بەتپەردە ءۇشىن بەكىتىلگەن باعا 118 تەڭگەدەن اسپاۋ كەرەك.
