الەم • 08 ءساۋىر، 2020

اقش-تا قاشىقتان قالاي وقيدى؟

125 رەتكورسەتىلدى

كوروناۆيرۋستىڭ پاندەمياسىنا قاتتى زيان شەككەن باعىتتىڭ ءبىرى – ءبىلىم سالاسى. ىندەتتىڭ تارالۋى سالدارىنان وقۋ ورىندارى جابىلىپ، ميلليونداعان وقۋشى قاشىقتان نەمەسە ونلاين ءبىلىم الۋعا ءماجبۇر. ءار مەملەكەت توتەننەن كەلگەن قاتەرگە شاما-شارقىنشا بەيىمدەلە باستادى. تەحنولوگياسى دامىعان، ءبىلىمى مەن عىلىمى الدىڭعى قاتاردا سانالاتىن اقش-تا قولدا بار مۇمكىندىكتىڭ ءبارىن قاراستىرماق.

بۇگىنگە دەيىن قۇراما شتاتتارىندا 380 مىڭنان استام ادام Covid-19 ۆيرۋس جۇقتىرعانى انىقتالعان. قازىرگى تاڭدا وسى كوروناۆيرۋستىڭ سالدارىنان اقش-تا 124 مىڭ مەكتەپ قيىندىققا تاپ كەلدى. سايكەسىنشە، 55 ميلليون بالا وقۋ ورىندارىنا بارا الماي قالعان.

اسىرەسە، نيۋ-يورك قالاسى ۆيرۋستان قاتتى زارداپ شەكتى. الەمدىك قارجى نارىعىنىڭ وتانىنا اينالعان شاھاردا 140 مىڭعا جۋىق ادام ناۋقاستانعان. وسىنىڭ سالدارىنان قالادا بۇكىل وقۋ ورىندارى جابىلىپ، ميلليوننان استام وقۋشى قاشىقتان ءبىلىم الماق.

وسى ورايدا مىنانى ايتا كەتكەن ءجون. نيۋ-يورك قالاسىنىڭ باسشىلىعى مەكتەپتەردى جابۋعا اسىققان جوق. ماسەلەن، ناۋرىزدىڭ ورتاسىنا دەيىن بۇكىل وقۋ ورىندارى قالىپتى جۇمىس ىستەپ تۇرعان. ءتىپتى، بەس مۇعالىمنەن ۆيرۋس تابىلعانى دا شاھار باسشىلىعىن ناقتى قادام جاساۋعا يتەرمەلەمەدى. بىراق وعان دەيىن كۋينس اۋدانىنىڭ اكىمى شارون لي اتا-انالاردى بالالارىن مەكتەپكە جىبەرمەۋگە شاقىرعان-دى. اقىرى جاعدايدىڭ ۋشىعىپ بارا جاتقانىن تۇسىنگەن قالا باسشىلىعى ناۋرىزدىڭ سوڭىندا عانا بۇكىل مەكتەپتى جاۋىپ، قاشىقتان وقىتۋعا كوشۋگە شەشىم قابىلدادى.

نيۋ-يورك قالاسى ءبىلىم دەپارتامەنتىنىڭ مالىمەتىنە سۇيەنسەك، بۇگىنگە دەيىن 80 مىڭنان استام ۇستاز قاشىقتان وقىتۋدىڭ ءادىس-ءتاسىلىن ۇيرەنگەن. ولار ءۇش كۇن بويى ونلاين-پلاتفورمانى قولدانۋ جولدارىن مەڭگەرگەن.

الايدا مۇنىمەن شاھارداعى ونلاين ءبىلىم بەرۋ ماسەلەسى شەشىلدى دەپ ايتۋ قيىن. ويتكەنى وقۋشىلاردىڭ 13 پايىزى اعىلشىن ءتىلىن جەتىك مەڭگەرمەگەن. ءار بەس وقۋشىنىڭ بىرەۋىنىڭ مۇمكىندىگى شەكتەۋلى. سونداي-اق 10 پايىزى باسپاناسىزدار قاتارىندا. بۇعان قوسا، كەي وتباسىندا بىرنەشە بالا بولعاندىقتان، ونلاين وقۋعا قاجەتتى قۇرال-جابدىقتى كەزەكپەن قولدانادى. بۇل دا قاشىقتان وقىتۋ پروتسەسىن قيىنداتا ءتۇستى.

«جىعىلعانعا جۇدىرىق» دەگەندەي، قالا وقۋشىلارىنىڭ 72،8 پايىزى نەمەسە 820 مىڭعا جۋىق بالا تۇرمىسى تومەن وتباسىندا ءومىر سۇرەدى. سولاردىڭ 300 مىڭىندا قاشىقتان وقىتۋعا قاجەتتى ەلەكتروندى قۇرال-جابدىق جوق. بۇل دا شاھار باسشىلىعىنىڭ باس اۋىرتار ماسەلەسىنە اينالدى.

اتالعان ماسەلەنى شەشۋ ماقساتىندا ءبىلىم دەپارتامەنتى مەكتەپ وقۋشىلارىنا پلانشەت پەن نوۋتبۋك بەرۋگە كىرىستى. قازىرگە دەيىن 200 مىڭ پلانشەت تاراتىلىپ ۇلگەرىپتى. سونداي-اق مەكتەپتەر دە ماسەلەنى وڭتايلى شەشۋگە ءوز ۇلەستەرىن قوسىپ، ەلەكتروندى قۇرىلعىلاردى تۇرمىسى تومەن وتباسىنداعى بالالارعا ۇلەستىرىپ كەلەدى. ايتپاقشى، وقۋشىلارعا ۇلەستىرىلگەن نوۋتبۋكتار، پلانشەتتەر تۇبەگەيلى ۇلەستىرىلمەيتىنىن ايتا كەتكەن ءجون. ءبىلىم دەپارتامەنتى ەلەكتروندى قۇرىلعى قاجەت ەتكەن وتباسىمەن ارنايى كەلىسىمشارت جاساسىپ، قاجەتتى اقپاراتتىڭ ءبارىن جازىپ الادى. بۇل ءبىر جاعىنان بيلىكتىڭ قاي باعىتقا باسىمدىق بەرۋىن انىقتاۋعا مۇمكىندىك جاساسا، ەكىنشى جاعىنان پاندەميا اياقتالعاننان كەيىن پلانشەتتەر مەن نوۋتبۋكتاردى قايتارىپ جيناپ الۋ ءۇشىن كەرەك.

پالەنباي مىڭ وقۋشىنى ەلەكتروندى قۇرال-جابدىقپەن قامتاماسىز ەتۋ وڭاي شارۋا ەمەس ەكەنى بەلگىلى. وسىعان بايلانىستى نيۋ-يوركتىڭ ءبىلىم دەپارتامەنتى Apple كومپانياسىمەن ارىپتەستىك ورناتىپ، اپتاسىنا 50 مىڭ پلانشەت ساتىپ الىپ وتىر. كەيىننەن اتالعان قۇرالدارعا وقۋشىعا قاجەتتى بۇكىل باعدارلامالار ورناتىلادى. ۆەدومستۆو باسشىلىعى ساتىپ الىنعان ءار پلانشەتتىڭ قۇنىن ازىرگە جاريالاعان جوق. ايتسە دە، كومپانيانىڭ سايتىندا ەڭ ارزان iPad-تىڭ قۇنى 399 دوللار تۇرسا، ورتاڭقول نۇسقاسى 799 دوللارعا تەڭ.

اقش-تا ءبارى كەرەمەت دەسەڭىز، وڭباي قاتەلەسەسىز. ماسەلەن، نيۋ-يوركتىڭ كەي بولىگىندە كەڭجولاقتى ينتەرنەت جەلىسىنە قول جەتكىزۋ قيىن. قالالىق باقىلاۋ اگەنتتىگى سكوتت سترينگەردىڭ دەرەكتەرىنە سۇيەنسەك، 2019 جىلى شاھارداعى تۇرعىن ۇيلەردىڭ 29 پايىزىنا مۇلدەم ينتەرنەت جەتكىزىلمەگەن. ياعني، شامامەن 2،2 ميلليونعا جۋىق ادام ۇيدە وتىرىپ جاھاندىق جەلىگە شىعا المايدى دەگەن ءسوز.

وسىعان بايلانىستى قالا باسشىلىعى سىمسىز ينتەرنەت جەلىسىن كۇشەيتۋگە كىرىستى. بۇدان بولەك، T-Mobile موبيلدىك بايلانىس قىزمەتىمەن كەلىسىم جاسالىپ، وقۋشىلارعا جەڭىلدىكپەن ارنايى تاريف ۇسىنىلماق. ونىڭ قۇنى 3 دوللاردى قۇرايدى. ايتا كەتەرلىگى، مۇنداي ءتاريفتىڭ قۇنى بۇعان دەيىن 30 دوللار بولاتىن.

قاشىقتان وقىتۋ قىزمەتى قالاي جۇرمەك؟ وقۋشىلار مەن ستۋدەنتتەردى قاجەتتى قۇرال-جابدىقپەن قامتاماسىز ەتۋگە كىرىسكەن ءبىلىم دەپارتامەنتى ونلاين ءبىلىم الۋدىڭ تاسىلدەرىن دە ۇمىتقان جوق. سوعان سايكەس، ءار ءبىلىم الۋشىعا ارناپ ارنايى اككاۋنت اشىلدى. ولارعا Google Classroom جانە Microsoft Office 365 قىزمەتىن تەگىن پايدالانۋعا مۇمكىندىك بەرىلگەن.

وقۋشىلار ءۇشىن، اسىرەسە، Google Classroom تاپتىرماس قۇرال. اتالعان باعدارلامادا تاپسىرما بەرۋگە، ونى باعالاۋعا، ورتاق جۇمىس ىستەۋگە، مۇعالىم مەن وقۋشىنىڭ جەدەل بايلانىسۋىنا جاعداي جاسالعان. بۇدان بولەك، Google Classroom ارقىلى ونلاين كونفەرەنتسيا دا وتكىزۋگە مۇمكىندىك بار. سونىمەن قاتار Google كومپانياسىنىڭ Google Docs، Google Drive سەكىلدى باسقا دا قىزمەتتەرىن ءتيىمدى پايدالانا الادى.

ايتا كەتۋ كەرەك، ءبىلىم دەپارتامەنتى وقۋشىلاردىڭ ءبارى ساباق باستالعان ساتتە ونلاين بولۋىن مىندەتتەمەيدى. كەرىسىنشە، قولايلى ۋاقىتتا باعدارلاماعا كىرىپ، بەرىلگەن تاپسىرمانى ورىندايدى. ونلاين ترانسلياتسيا دا اپتاسىنا 2-3 مارتە عانا ۇيىمداستىرىلادى ەكەن. بۇل دا Google Classroom-دى ءبىلىم سالاسىندا ىڭعايلى ەتە ءتۇستى.

اقش-تا ءبىلىم سالاسىندا بىرقاتار جەڭىلدىك جاسالماق. اتاپ ايتساق، 19 شتاتتا جىل سوڭىنداعى ەمتيحان مۇلدەم الىنىپ تاستالدى. نيۋ-يوركتە دە كەي ساباقتار بويىنشا تاپسىرىلاتىن سىناق وتپەيدى.

قورىتا ايتقاندا، كوروناۆيرۋس پاندەمياسى سالدارىنان ءبىلىم، عىلىمى دامىعان اقش-تىڭ ءوزى ابدىراپ قالعانى انىق بايقالدى. ارينە، تەحنولوگياسى دامىعان مەملەكەت ءۇشىن ەلدەگى بۇكىل ستۋدەنت پەن وقۋشىنى قاجەتتى قۇرال-جابدىقپەن قامتاماسىز ەتۋ اسا قيىندىق كەلتىرمەس. ايتسە دە، ىندەتتىڭ تەز تارالۋى ەشكىمنىڭ قاشىقتان وقىتۋعا تۇبەگەيلى دايىن ەمەستىگىن كورسەتىپ بەردى.

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار