جارلىقتا «قازاقستان رەسپۋبليكاسى قارۋلى كۇشتەرىنىڭ اۋماقتىق اسكەرلەرىن جاساقتاۋ ءۇشىن اسكەري مىندەتتىلەر ارناۋلى جيىندارعا شاقىرىلسىن. استانانىڭ, رەسپۋبليكالىق ماڭىزى بار قالالاردىڭ جانە وبلىستاردىڭ جەرگىلىكتى اتقارۋشى ورگاندارى قازاقستان رەسپۋبليكاسى قارۋلى كۇشتەرىنىڭ باس شتابىمەن كەلىسۋ بويىنشا شاقىرىلاتىن اسكەري مىندەتتىلەردىڭ سانىن جانە ارناۋلى جيىنداردى وتكىزۋ مەرزىمدەرىن ايقىنداي وتىرىپ, ءتيىستى جەرگىلىكتى اسكەري باسقارۋ ورگاندارى ارقىلى اسكەري مىندەتتىلەردى ارناۋلى جيىندارعا شاقىرۋدى جۇرگىزۋدى ۇيىمداستىرسىن جانە قامتاماسىز ەتسىن» دەپ ايقىن كورسەتىلگەن.
ەلىمىزدەگى توتەنشە جاعدايعا بايلانىستى قولعا الىنعان بۇل شارانى مەن دە قولدايمىن. سەبەبى دۇنيە ءجۇزىن دۇرلىكتىرگەن پاندەميانى اۋىزدىقتاۋ ءالى دە وڭايعا سوقپاي تۇر. بۇل رەتتە ەر- ازاماتتىڭ ەل الدىنداعى باستى پارىزى – وتانىن وت پەن سۋدان قورعاپ, قولدان كەلگەن كومەگىن بەرۋ دەپ بىلەمىن.
ارينە ارناۋلى جيىندارعا شاقىرىلعاندار مايدان شەبىنە جىبەرىلمەسى بەلگىلى. سوندىقتان «وتان وتتان دا ىستىق» دەپ دانا حالقىمىز ايتقانداي, ونى كەسەل مەن كەساپاتتان قورعاۋ – كەۋدەسىندە نامىسى بار ءار وتانداسىمىزدىڭ باستى ازاماتتىق بورىشى. باتىر باۋىرجان مومىش ۇلىنىڭ «وتان ءۇشىن وتقا ءتۇس, كۇيمەيسىڭ!» دەگەن قاناتتى ءسوزى وسىنداي قىسىلتاياڭ شاقتا جىگىتتەردىڭ جىگەرىن جانىپ, جۇرەكتەگى ۇرانىنا اينالۋى ءتيىس. سەبەبى نەبىر زۇلمات جىلداردى, اشتىق پەن سوعىستى توبىعىنان قان كەشىپ ءجۇرىپ ەڭسەرگەن ەرجۇرەك حالقىمىز بۇدان دا زور ناۋبەتتەردى باسىنان وتكەرگەن ەدى. وعان تاريح تارازى.
«ەر ەل ءۇشىن تۋادى» دەگەن بار. وسى ءسوزدى بايراق ەتىپ كوتەرەر كەز كەلدى. باسىمىز امان, باۋىرىمىز ءبۇتىن بولسىن دەسەك, مەملەكەت باسشىسى باستاعان شاراعا جۇدىرىقتاي جۇمىلۋىمىز قاجەت!
ولجاس احمەتوۆ,
«جاس سارباز» اسكەري-پاتريوتتىق كلۋبىنىڭ ۇستازى
قاراعاندى وبلىسى
