الەم • 08 ءساۋىر، 2020

«تاليبان» كەلىسسوزدەن باس تارتتى

195 رەتكورسەتىلدى

«تاليبان» ۇيىمى اۋعانستان ۇكىمەتىمەن مامىلەگە كەلە الماي، تۇتقىنداردى الماسۋ جونىندەگى كەلىسسوزدەن باس تارتاتىنىن حابارلادى. بۇل قادام اقش پەن «تاليبان» اراسىنداعى كەلىسىمگە سىزات ءتۇسىرۋى مۇمكىن.

«تاليبان» وكىلى سۋحايل ءشا­حين­نىڭ ايتۋىنشا، ۇيىم­نىڭ ارنايى توبى الداعى كەلىسسوزدەرگە قاتىسپايدى. مۇنىڭ سەبەبىن اۋعانستان ۇكىمەتىنىڭ تۇتقىن­داردى بوساتۋعا ىقىلاسى جوق ەكەنىمەن تۇسىندىرەدى.

ء«بىزدىڭ ارنايى توبىمىز ەرتەڭ­نەن باستاپ ءتيىستى تاراپتار­مەن بولاتىن ناتيجەسىز كەزدە­سۋگە قا­تىسپايدى»، دەپ جازدى س.شاحين تۋيتتەردەگى پاراقشاسىنا.

ەستەرىڭىزدە بولسا، بيىلعى اق­پاندا اقش پەن «تاليبان» قوز­عالىسى ءوزارا مامىلەگە كەلىپ، بىرقاتار مىندەتتەر العان-تۇعىن. سوعان سايكەس، اۋعانستان ۇكى­مەتى 5 مىڭعا جۋىق «تاليبان» ۇيى­مىنىڭ مۇشەسىن، ال قارۋلى توپ تاراپى 1000 ادامدى بوساتۋى ءتيىس بولاتىن.

سونىمەن قاتار كەلىسىمدە اقش-تىڭ جانە حالىقارالىق قارۋلى كۇشتەردىڭ اۋعانستان اۋماعىنان شىعارىلاتىنى ايتىلعان-دى. مۇنىڭ وتەمى رەتىندە «تاليبان» وڭىردەگى قاۋىپ­سىزدىكتى قامتاماسىز ەتۋى ءتيىس. بۇل قۇجات 18 جىلعا سوزىلعان سوعىستىڭ اياقتالۋعا تاياپ قالعانىن بايقاتقانداي كورىنگەن. ايتسە دە، ەكىجاقتى كەلىسىمگە قاراما-قايشى كەلەتىن ماسەلەلەر ءالى دە وتە كوپ ەكەن.

تۇتقىنداردى الماسۋ تاراپ­تاردىڭ ءبىر-بىرىنە دەگەن سەنىمىن كۇشەيتىپ، كەلىسىمگە ادال ەكەنىن كورسەتۋگە ءتيىس ەدى. وسىلايشا، «تاليبان» ۇيىمىنىڭ وكىلدەرى مەن اۋعانستان ۇكىمەتىنىڭ مۇشە­لەرى وتكەن اپتادا كابۋلدا كەزدەس­كەن بولاتىن.

وسى ورايدا، اۋعانستان ۇكى­مەتىنىڭ دە ءوز ايتارى بار. ۇلتتىق قاۋىپسىزدىك كەڭەسىنىڭ ءباسپاسوز حاتشىسى دجاۆيد فايسالدىڭ سوزىنە قاراعاندا، «تاليبان» تاراپى كەلىسىمدى پايدالانىپ، بۋىنسىز جەردەن پىشاق ۇرىپ وتىرعان كورىنەدى.

ال ەل ۇكىمەتى تاراپىنان كە­لىس­­­سوزدەرگە قاتىسىپ جۇر­گەن ماتين بەكتىڭ ايتۋىنشا، «تاليبان» ۇيىمى تۇتقىنداعى 15 كو­مان­­ديرىن بوساتۋدى سۇراعان. ولار­دىڭ ءبارى قوزعالىستىڭ بەلدى مۇشەسى سانالادى.

ء«بىز ازاماتتارىمىزدى ولتىر­گەن­دەردى بوساتا المايمىز. ولار­دىڭ قايتادان مايدانعا ورالىپ، قاندى قىرعىن سالۋىنا مۇمكىندىك بەرمەيمىز»، دەدى م.بەك جۋرناليستەرمەن وتكەن ءباسپاسوز جيىنىندا. ونىڭ كەلتىرگەن دەرەكتەرىنە ساي، اۋعانستان ۇكىمەتى 400-گە جۋىق «تاليبان» مۇشەسىن بوساتۋعا ءازىر. بيلىكتىڭ پىكىرىنشە، ولاردان كەلەتىن قاۋىپ از. سونىمەن قاتار جاسى 50-دەن اسقان، دەنساۋلىعى سىر بەرگەن 100 مۇشەسىن دە بوستاندىققا شىعارماق. بىراق «تاليبان»  بۇل ۇسىنىستى قابىلداماي وتىر.

وسى ورايدا ايتا كەتكەن ءجون. قازاقستان اۋعانستانداعى احۋال­دى جاقسارتىپ، وڭىردە تۇراق­تىلىق پەن بەيبىتشىلىك ورناتۋعا مۇددەلى. ەكى ەل اراسىنداعى ىن­تىماقتاستىق جولعا قويىلعان. قازاقستان اۋعان ستۋدەنتتەرىنىڭ ءبىلىم الۋىنا كومەكتەسىپ كەلەدى.

سونداي-اق 2017-2018 جىل­­دارى بۇۇ قاۋىپسىزدىك كەڭە­سىنە تۇراقتى ەمەس مۇشە بولىپ ساي­لانعان كەزدە دە قازاق­ستان تارا­پى اۋعانستان ماسە­لەسىن ەستەن شى­عارعان جوق. ماسە­لەن، اۋعانستان/تاليبان كومي­تەتىنە، ءيليم/ال-كايدا كومي­تەتىنە جانە سومالي/ەريترەيا سانك­تسيالىق كوميتەتىنە توراعا­لىق ەتۋ تاپسىرىلىپ، ەلىمىز اتالعان مىندەتتى ابىرويمەن اتقارىپ شىقتى.

قازاقستان تاراپى ورتالىق ازيا جانە اۋعانستاندى بەيبىت­شىلىك، ىنتىماقتاستىق جانە قاۋىپسىزدىكتىڭ ۇلگىسىنە اينالدىرۋدى كوزدەيدى ءارى وسى ماقساتتا جۇمىس ىستەپ كەلەدى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • بۇگىن، 20:12

ەكى قىلمىستىق توپ ۇستالدى

ايماقتار • بۇگىن، 17:45

بالالار ۇيىندەگى ىزگىلىك شاراسى

ايماقتار • بۇگىن، 15:47

ەلتاڭبا تاريحى تالقىلاندى

رۋحانيات • بۇگىن، 14:54

ۇقساس جاڭالىقتار