اباي • 08 ءساۋىر، 2020

تورىمىزدە تۇرۋى ءتيىس

67 رەتكورسەتىلدى

قازاقستان رەسپۋبليكاسىنىڭ پرەزيدەنتى ق.ك.توقاەۆ «اباي جانە XXI عاسىرداعى قازاقستان» اتتى ماقالاسىندا: «بيىل اباي قۇنانباي ۇلىنىڭ تۋعانىنا 175 جىل تولادى. حالقىمىزدىڭ ۇلى پەرزەنتىنىڭ مەرەيتويىن لايىقتى اتاپ ءوتۋ ءۇشىن ارنايى قۇرىلعان كوميسسيا دايىندىق جۇمىستارىن باستاپ كەتتى.

مەملەكەت كولەمىندە جانە حالىقارا­لىق دەڭگەيدە اۋقىمدى ءىس-شارالار ۇيىمداستىرۋ جوسپارلانىپ وتىر. بىراق مۇنىڭ ءبارى توي تويلاۋ ءۇشىن ەمەس، وي-ءورىسىمىزدى كەڭەيتىپ، رۋحاني تۇرعىدان دامۋىمىز ءۇشىن وتكىزىلمەك» دەپ جازعان بولاتىن. وتە ءماندى دە ماڭىزدى ويلار. ەلىمىزدە قازاقتىڭ ۇلى اقىنى اباي­دىڭ تۋعانىنا 175 جىل مەرەيتويى­نا ارنالعان اۋقىمدى دا ماڭىزدى ءىس-شارا­لار باستالىپ كەتكەنى كوڭىلگە قۋانىش ۇيالاتادى. مەرەيتويدىڭ دەڭگەيى بيىك، يگىلىكتى شارالارى مول بولادى دەگەن ۇمىتتەمىز. وسى ورايدا، اتالعان كوميسسيا مۇشەلەرىنىڭ نازارىنا ۇسىنار ءبىر وي بولىپ تۇر.

وسى كۇندەرى كەمەڭگەر اقىنى­مىزدىڭ ولەڭدەرى مەن قارا سوزدەرىن زەردەلەي قايتالاپ وقىپ، جادىمىزدا جاڭعىرتۋ ۇلكەن ابىروي. سونىمەن قوسا اباي اتامىزعا ارنالعان ۇستەل ۇستىنە قوياتىن، بيىكتىگى 15 سانتيمەتردەي كىشىرەك مۇسىنشە كەڭەس زامانىندا كەلىستى جاسالىپ، دۇكەندەردە ساتىلاتىن. تۇرپاتى مەتالدان قۇيىلعان قۇيتىمداي مۇسىنشە. ءبىر كەمىستىگى، ول مۇسىنشە قۇيىلعان مەتالل قارا-قوڭىر ءتۇستى ەدى. بىراق قازىر سول مۇسىنشەنىڭ ءوزىن ەش جەردەن تابۋ مۇمكىن ەمەس. قايتادان قۇيىلىپ، ساتۋعا قويىلماعان بولار. وكىنىشكە قاراي، وسى مۇسىنشەنى بۇقارالىق دۇكەندەر مەن انتيكۆاريات دۇكەنىنەن جىلداپ سابىلا ىزدەپ تاپپاي ءجۇرمىن.       

وسىلاردى ايتا كەلە، ءار قازاقتىڭ ۇيىندە دومبىرامەن قوسا ابىز اقىنىمىز ابايدىڭ كىشكەنە مۇسىنشەسى ءۇيدىڭ باس بولمەسىنىڭ تورىندە تۇرۋى، بىرىنشىدەن – پارىز، ەكىنشىدەن – ابىروي بولار ەدى دەپ ويلايمىز. ول ءۇشىن بۇرىنعى قۇيىلعان مۇسىنشەنى نۇسقا رەتىندە پايدالانىپ، قايتادان قۇيىپ، حالىققا كەڭ تاراتۋ كەرەك. ارينە، «كەڭ تاراتۋ»، دەگەنىمىز – كەلىسىمدى باعاعا ساتۋ. ۇسىنىس رەتىندە ايتارىمىز، الداعى قۇيىلاتىن مۇسىنشەنىڭ نۇسقاسى كۇمىس تۇستەس اقسۇر مەتالل قوسىندىلاردان قۇيىلسا وتە تارتىم­دى بولار ەدى. ۋاقىت از، بۇل ىسكە جۇمىلا دا جەدەل كىرىسكەن ءجون. سونىمەن وسى ۇسىنىسىمىز جۇزەگە اساتىن بولسا، ارداقتى ويشىل اقىنىمىزعا كورسە­تىلگەن قۇرمەتىمىزدىڭ تاعى ءبىر ەلەۋلى بەلگىسى بولارى ءسوزسىز.

بۇل مۇسىنشەنى اعايىن، دوس-جاران اراسىندا سىيعا دا تارتۋ قاي جاعىنان قاراسىڭىز دا وتە ۇتىمدى دەۋگە بولادى. بۇرىندارى جانە قازىر، سىزدەر مىنانداي كورىنىستەرگە كۋا بولعاندارىڭىز ايقىن. كوبىنە ەرتەدە، شەت مەملەكەتتەردەن كەلگەن مەيماندارعا دومبىرا نەمەسە ويۋ-ورنەكتى قۇمىرا، بىلەزىك سىيلايتىن. قازىر قالىڭ شاپان مەن بورىك سىيلايدى. بىرەۋ تۇگىلى، ءبىزدىڭ ءوز ارامىزدا دا سول شاپانداردى كوشەگە كيىپ شىققان ادامدى كورمەدىك. كەزىندە بەلگىلى جازۋشى گ.بەلگەر ونشاقتى شاپاندى رەجيسسەر ە.تۇرسىنوۆقا كورسەتىپ، بۇلاردى نە ىستەۋ كەرەكتىگىن بىلمەيتىنىن ايتقان ەكەن. مۇنىڭ دۇرىس-قيسىقتىعىن وزدەرىڭىز سارالارسىزدار. مەنىڭ ويىمشا، وسى اباي اتامىزعا ارنالعان تولاعاي تويعا كەلگەن شەتەل مەيماندارىنا شاپان مەن بورىكتىڭ ورنىنا اباي مۇسىنشەسىن سىيلاعان وتە ورىندى بولار ەدى. وسى ۇسىنىستارىمدى قولداۋلارىڭىزدى  وتىنەمىن.

 

ناقىپبەك سادۋاقاسوۆ،

پۋبليتسيست

 

سوڭعى جاڭالىقتار

جۇزدەگەن تۇرعىنعا جۇمىس تابىلدى

ايماقتار • بۇگىن، 12:44

ۇقساس جاڭالىقتار