قوعام • 04 ءساۋىر، 2020

شىمكەنت توتەنشە جاعداي اياقتالعانعا دەيىن كارانتينگە جابىلدى

422 رەتكورسەتىلدى

شىمكەنت بۇگىننەن باستاپ ەلدەگى توتەنشە جاعداي رەجيمى اياقتالعانشا كارانتينگە جابىلدى. وسىعان قاراي قالا اكىمى مۇرات ايتەنوۆ قالىڭ كوپشىلىككە ۇندەۋ جاريالادى.

م.ايتەنوۆ قالادا كوروناۆيرۋسپەن كۇرەس شارالارى ءتيىستى دەڭگەيدە جۇرگىزىلىپ جاتقانىن ايتا كەلە، شىمكەنتتە ىندەت جۇقتىرعاندار سانى 11-گە جەتكەنىن مالىمدەدى.

– ازاماتتاردىڭ ءومىرى مەن قاۋىپسىزدىگىن، دەنساۋلىعىن ساقتاۋ ماقساتىندا 2020 جىلعى 4 ءساۋىرى ساعات 21.00-دەن باستاپ توتەنشە جاعداي اياقتالعانعا دەيىن شىمكەنت قالاسى اۋماعىندا كارانتين جاريالانادى. كارانتين مىنانداي شەكتەۋ شارالارىن قامتيدى: بىرىنشىدەن، كارانتين كەزىندە شىمكەنت قالاسى باس سانيتارىنىڭ قاۋلىسىندا كورسەتىلگەن مەكەمەلەردەن بولەك مەنشىك نىسانىنا قاراماستان بارلىق مەكەمەلەردىڭ جۇمىسى توقتاتىلادى. ول مەكەمەلەردىڭ ءتىزىمىن اكىمدىكتىڭ رەسمي سايتى مەن الەۋمەتتىك جەلىلەردە جاريالايمىز. قوعامدىق دەمالىس ورىندارى، سونىمەن قاتار ساياباقتار مەن بالالار الاڭشالارىنا بارۋعا بولمايدى. ەكىنشىدەن، تۇرعىندار مەن كولىكتىڭ بارلىق تۇرىنە شىمكەنت قالاسىنان شىعۋعا جانە قالاعا كىرۋىنە تىيىم سالىنادى. بۇل شەكتەۋدىڭ قاۋلىدا كورسەتىلگەن بەلگىلى ازاماتتار مەن كولىكتەرگە قاتىسى جوق. ولاردىڭ دا ءتىزىمى جاريالانادى. ۇشىنشىدەن، قالا اۋماعىندا شاعىن ميكرواۆتوبۋستاردىڭ قوزعالىسىنا تىيىم سالىنىپ، ولاردىڭ باعىتتارى بويىنشا اۆتوبۋس قوزعالىسى قويىلادى. قالاىشىلىك قوعامدىق كولىك قوزعالىسى تاڭعى 07.00-دەن 19.00-گە دەيىن عانا جۇزەگە اسادى. تورتىنشىدەن، قالا اۋماعىنداعى زالالسىزداندىرۋ شارالارى كارانتين مەرزىمى اياقتالعانعا دەيىن كۇشەيتىلەتىن بولادى. بەسىنشىدەن، ازاماتتاردىڭ ءجۇرىپ-تۇرۋىنا شەكتەۋ قويىلادى. بۇل تۇرعىنداردىڭ ءوزىن-ءوزى وقشاۋلاۋى ءۇشىن جاعداي جاساۋعا باعىتتالىپ وتىر. مۇنداي شەكتەۋلەر مەديتسينا قىزمەتكەرلەرىنە، قۇقىق قورعاۋ ورگاندارىنىڭ وكىلدەرىنە، قالا تىنىس-تىرشىلىگىن قامتاماسىز ەتۋشى كوممۋنالدىق مەكەمە قىزمەتكەرلەرىنە قولدانىلمايدى. قالا تۇرعىندارى تولىقتاي شەكتەۋ كەزىندە ۇيلەرىنەن ازىق-ت ۇلىك، ءدارى-دارمەك، مەديتسينالىق كومەك، بانك جانە پوشتا قىزمەتتەرىن الۋ ءۇشىن عانا شىعا الادى. سوڭعى كۇندەرى الەۋمەتتىك جەلىلەردە تاراپ جاتقان ءتۇرلى نەگىزسىز اقپاراتتار تارالۋىنىڭ الدىن الۋ ماقساتىندا، قالا اۋماعىندا كوممەنداتتىق ساعات ازىرشە ەنگىزىلمەگەنىن رەسمي تۇردە مالىمدەيمىن. دەگەنمەن توتەنشە جاعداي كەزىندەگى تالاپتاردى ورىنداۋىمىز كەرەك. كارانتين رەجيمىن بۇزعان ازاماتتاردى قۇقىق قورعاۋ ورگاندارىنىڭ پاترۋلدىك قىزمەتى انىقتايتىن بولادى. سەبەبى ءوزىنىڭ دەنساۋلىعىنا نەمقۇرايلى قاراعان ازاماتتاردىڭ ارەكەتىنەن تۇرعىنداردىڭ باسىم بولىگى زارداپ شەكپەۋى ءتيىس دەپ سانايمىن. التىنشىدان، شىمكەنت قالاسىنىڭ اۋماعىنداعى توتەنشە جاعداي جانە كارانتين كەزىندە 55 جاستان اسقان تۇرعىندارعا اسا ءبىر قاجەتتىلىكسىز كوشەگە شىقپاۋدى ۇسىنامىز. جەتىنشىدەن، كارانتين كەزىندە ءتىزىم بويىنشا جۇمىسى توقتاماعان بارلىق مەكەمەلەر قىزمەتكەرىن جۇمىس ورنى تۋرالى انىقتامامەن قامتاماسىز ەتۋى شارت. سەگىزىنشىدەن، ازىق-ت ۇلىك بازارلارىنىڭ جۇمىس ۋاقىتى 10:00-دەن 18:00-گە دەيىن، قادامدىق قاشىقتىقتاعى ازىق-ت ۇلىك دۇكەندەرىنىڭ جۇمىس ۋاقىتى 10:00-دەن 21:00-گە دەيىن بولىپ قالادى. توعىزىنشىدان، بارلىق قوعامدىق تاماقتانۋ ورىندارى جەتكىزىپ بەرۋ رەجيمىنە كوشەدى. ونىنشىدان، ازاماتتاردىڭ قالا اۋماعىندا جەكە كولىگىمەن جۇرۋىنە تىيىم سالىنادى. بۇل تالاپ تىزىمگە كىرەتىن مەكەمە قىزمەتكەرلەرىنە قولدانىلمايدى جانە ول ازاماتتاردىڭ قولىندا جۇمىس ورنى بەرگەن انىقتاما بولۋى كەرەك. سونداي-اق، جەكە كولىكپەن ءۇيىنىڭ جانىندا ورنالاسقان ازىق-ت ۇلىك پەن ءبىرىنشى كەزەكتەگى تاۋارلار، مەديتسينالىق قۇرالدار الۋعا جانە جەدەل جاعدايلاردا مەديتسينا ۇيىمدارىنا كومەك الۋعا بارۋعا بولادى، - دەدى اكىم.

سونداي-اق قالانىڭ تىنىس-تىرشىلىگى توقتاماۋى ءۇشىن قالا اكىمدىگى بارلىق شارالاردى قابىلدايتىنىن ايتقان اكىم وسىنداي قيىن ساتتە شىمكەنتتى جان-تانىمەن سۇيەتىن ءاربىر تۇرعىنعا قالامىز ءبىزدىڭ كومەگىمىزگە ءزارۋ ەكەندىگىن ايرىقشا اتاپ ءوتتى.

- قالامىزعا تيگىزەر كومەگىمىز – بۇل ءبىزدىڭ بىركىسىدەي كارانتين تالاپتارىن بۇلجىتپاي ورىنداۋىمىزدا ەكەندىگىن اتاپ وتەمىن، - دەدى ول.

سوڭعى جاڭالىقتار

الماتىدا تاعى 37 ادام Covid-199 جۇقتىرعان

كوروناۆيرۋس • بۇگىن، 10:20

الاشتىڭ ارداقتىسى ۇلىقتالدى

رۋحانيات • بۇگىن، 10:02

تاپا-تالتۇستەگى توتەنشە جاعداي

ايماقتار • بۇگىن، 08:55

ەرتىستىڭ سۋى ەگىستىككە پايدالى

ايماقتار • بۇگىن، 08:40

ۇقساس جاڭالىقتار