سالتاناتتى ءراسىم يتاليانىڭ ميلان قالاسىنداعى كونكيمەن جۇگىرۋ سپورتى ۇيىندە ءوتتى.
ءىس-شاراعا حالىقارالىق كونكيمەن جۇگىرۋشىلەر وداعىنىڭ پرەزيدەنتى كيم چجە يول, وليمپيادا مۇراجايى ديرەكتورىنىڭ ورىنباسارى ياسمين مايحتري, سونداي-اق, قازاقستان ۇلتتىق وليمپيادالىق كوميتەتىنىڭ پرەزيدەنتى گەننادي گولوۆكين قاتىستى.
قر ۇوك باسشىسى شايدوروۆتىڭ جەڭىسى قازاقستان مانەرلەپ سىرعاناۋىنىڭ تاريحىنداعى العاشقى وليمپيادالىق التىن مەدال ەكەنىن اتاپ ءوتتى.
«بۇل جاي عانا جەڭىس ەمەس - بۇل تاريح. بۇگىن سول تاريحتىڭ ءبىر بولىگى ماڭگى وسىندا قالادى. كوستيۋمنىڭ وليمپيادا مۇراجايىنا تاپسىرىلۋى ميلليونداعان ادامعا چەمپيونىمىزدىڭ مۇراسىن كورۋگە مۇمكىندىك بەرەدى.
بۇل كوستيۋم جاس سپورتشىلاردىڭ ارمانعا ۇمتىلىپ, وزىنە سەنۋىنە ىقپال ەتىپ, جىگەرلەندىرەدى. ميحايل, وسى سىيلىعىڭ ءۇشىن راقمەت. ءبىز سەنى ماقتان تۇتامىز», دەدى گەننادي گولوۆكين.
ميحايل شايدوروۆ بۇل وقيعانىڭ ءوزى ءۇشىن ايرىقشا ءمانى بار ەكەنىن ايتتى.
«كوستيۋمىمدى وليمپيادا مۇراجايىنا تاپسىرۋ – مەن ءۇشىن زور مارتەبە ءارى ۇلكەن جاۋاپكەرشىلىك. بۇگىن وسىندا تۇرىپ, ارمانىمنىڭ ءبىر بولىگى الەمدىك وليمپيادالىق مۇراعا اينالاتىنىنا قۋانىشتىمىن. بۇل كوستيۋم – وليمپيادالىق ارمانعا باستاعان جولىمىزدىڭ نىشانى. ەندى ونىڭ قازاقستان اتىنان الەمدىك وليمپيادالىق قوزعالىس جادىگەرلەرىنىڭ قاتارىندا ورنالاسۋى مەن ءۇشىن ەرەكشە مانگە يە.
ول وليمپيادالىق ارماننىڭ شەكاراسى جوق ەكەنىن, ءاربىر سپورتشى ۇلكەن وليمپيادالىق تاريحتىڭ ءبىر بولىگى بولا الاتىنىن بىلدىرەتىن نىشانعا اينالسىن. حالىقارالىق وليمپيادالىق كوميتەتكە قولداۋ كورسەتكەنى ءۇشىن العىس ايتامىن», دەدى شايدوروۆ.
ايتا كەتەيىك, ميحايل شايدوروۆ بۇل كوستيۋممەن وليمپياداعا دەيىن گران-پري فينالىندا دا ونەر كورسەتكەن. الايدا تورتجىلدىقتىڭ باستى دوداسىنا دەيىن كيىم قايتا تولىقتىرىلىپ, جەتىلدىرىلدى. قازاقستاندىق ديزاينەرلەرمەن بىرگە سپورتشى عارىش كەڭىستىگىن بەينەلەيتىن قانىق كوك ءتۇستى تاڭداعان. بۇل ءتۇس «بەسىنشى ەلەمەنت» ءفيلمىنىڭ تۇتاس اتموسفەراسىن ايقىن كورسەتەدى. ديزاينى جۇلدىزداردى ەسكە تۇسىرەتىن شىنى اشەكەيلەر جانە تاستارمەن تولىقتىرىلعان.
ميحايل شايدوروۆتىڭ دايىندىعىنا بيۋدجەتتەن قانشا قارجى جۇمسالدى؟
ەسكە سالا كەتەيىك, ميحايل شايدوروۆ ميلان-كورتينا-2026 قىسقى وليمپياداسىندا مانەرلەپ سىرعاناۋدان التىن مەدال جەڭىپ الىپ, تاۋەلسىز قازاقستان تاريحىندا قىسقى سپورت تۇرلەرىنەن شىققان ەكىنشى وليمپيادا چەمپيونى اتاندى.
