ۇيىمداستىرۋشىلاردىڭ ايتۋىنشا, زياتكەرلىك سايىستىڭ نەگىزگى ماقساتى – جاستاردىڭ شىعارماشىلىق جانە زياتكەرلىك قابىلەتتەرىن شىڭداۋ, وي-ءورىسىن كەڭەيتۋ, عىلىم مەن بىلىمگە دەگەن قىزىعۋشىلىعىن ارتتىرۋ. ءىس-شارانىڭ اشىلۋىندا اباي وبلىسى ءبىلىم باسقارماسى باسشىسىنىڭ ورىنباسارى اسەم نۇسكەنوۆا قاتىسۋشىلارعا ساتتىلىك تىلەپ, باستامانىڭ ماڭىزدىلىعىنا توقتالدى.
«بۇگىنگى ءىس-شارا «زاڭ جانە ءتارتىپ» يدەولوگيالىق ءنارراتيۆى اياسىندا ءوزىن-ءوزى باسقارۋ ۇيىمدارىنىڭ كوشباسشىلارى اراسىندا ۇيىمداستىرىلىپ وتىر. بۇل – جاستاردىڭ قۇقىقتىق ساۋاتتىلىعىن ارتتىرۋعا, قوعامداعى جاۋاپكەرشىلىك پەن ءتارتىپ قاعيداتتارىن تەرەڭ تۇسىنۋگە باعىتتالعان ماڭىزدى قادام. وسىنداي زياتكەرلىك الاڭدار وقۋشىلاردىڭ بىلىمدەرىن شىڭداپ قانا قويماي, تۇلعالىق دامۋلارىنا, كوشباسشىلىق قاسيەتتەرىن جەتىلدىرۋگە مۇمكىندىك بەرەدى. بۇگىنگى سايىستا العان تاجىريبە الداعى ءومىر جولدارىڭىزدا ۇلكەن سەپتىگىن تيگىزەدى دەپ سەنەمىن. بارشاڭىزعا ساتتىلىك پەن جارقىن جەڭىس تىلەيمىن», دەدى ول.
سايىسقا وبلىستىڭ قالا جانە اۋداندارىنان 12 كوماندا قاتىسىپ, جالپى سانى 40-قا جۋىق ءبىلىم بەرۋ ۇيىمدارىنىڭ ءوزىن-ءوزى باسقارۋ كوشباسشىلارى مەن مەكتەپ وقۋشىلارى باق سىناستى.
قاتىسۋشى, شوقان ءۋاليحانوۆ اتىنداعى «جاس ۇلان» ارنايى ەرلەر مەكتەپ-ليتسەي ينتەرناتىنىڭ 11-سىنىپ وقۋشىسى مۇحاممەد قۇدايبەرگەن جارىسقا دەگەن دايىندىقتارى تۋرالى ايتتى.
ء«بىز بۇل كۋيز ويىنىنا ۇلكەن جاۋاپكەرشىلىكپەن دايىندالدىق. قۇقىقتىق تاقىرىپتاردى, ەل تاريحى مەن مەملەكەتتىك ساياساتتىڭ نەگىزگى باعىتتارىن قايتالاپ, لوگيكالىق تاپسىرمالارعا ارنايى دايىندىق جۇرگىزدىك. بۇعان دەيىن دە وسىنداي اۋقىمدى سايىستارعا قاتىسىپ, جۇلدەلى ورىندارعا يە بولعانبىز. سوندىقتان بۇگىنگى جارىستا دا ءوز ءبىلىمىمىزدى كورسەتىپ, جوعارى ناتيجە كورسەتۋگە نيەتتىمىز. مۇنداي شارالار بىزگە تەك ءبىلىمىمىزدى سىناپ قانا قويماي, كوماندالىق جۇمىس پەن ءوزارا قولداۋدىڭ ماڭىزىن تۇسىنۋگە مۇمكىندىك بەرەدى. ءبىزدىڭ توپتىڭ اتاۋى – «جاس ۇلان», جانە ءبىز جەڭىسكە لايىقتى ءبىلىمىمىزدى كورسەتۋگە تىرىسامىز», دەدى ول.
قاتىسۋشىلار قۇقىقتىق ساۋاتتىلىق, مەملەكەتتىك ساياساتتىڭ باسىم باعىتتارى, ەل تاريحى جانە زاماناۋي قوعامدىق ۇدەرىستەرگە قاتىستى 7 كەزەڭ بويىنشا سىنعا ءتۇستى. ولار قويىلعان سۇراقتارعا جاۋاپ بەرىپ, لوگيكالىق تاپسىرمالاردى ورىندادى. ءىس-شارا بارىسىندا جاستار جوعارى بەلسەندىلىك تانىتىپ, ءوز بىلىمدەرى مەن كوشباسشىلىق قابىلەتتەرىن كورسەتە ءبىلدى. سايىس قورىتىندىسى بويىنشا قازىلار القاسىنىڭ شەشىمىمەن جەڭىمپازدار مەن جۇلدەگەرلەر انىقتالدى.
«ەڭ كرەاتيۆتى كوماندا» نوميناتسياسىمەن ماقانشى اۋدانىنىڭ «پاراسات» كومانداسى ماراپاتتالدى. ال «ۇزدىك ەستەتيكالىق كوماندا» اتالىمىن اياگوز اۋدانىنىڭ «جاس دەموكرات» كومانداسى يەلەندى. جالپى كوماندالىق ەسەپ ناتيجەسىندە ءى ورىندى جاڭاسەمەي اۋدانىنىڭ «بەس ارىس» كومانداسى جەڭىپ الدى. ءىى ورىن اباي اۋدانىنىڭ «ادىلەت» كومانداسىنا بۇيىرسا, ءىىى ورىندى بەسقاراعاي اۋدانىنىڭ «كەلەشەك ۇرپاق» كومانداسى يەلەندى. جەڭىمپازدار مەن جۇلدەگەرلەر ارنايى ديپلومدارمەن ماراپاتتالدى.
ۇيىمداستىرۋشىلار مۇنداي فورماتتاعى ءىس-شارالار الداعى ۋاقىتتا دا جالعاسىن تاۋىپ, ءوڭىر جاستارىنىڭ ازاماتتىق جاۋاپكەرشىلىگىن ارتتىرۋعا جانە زاڭ ۇستەمدىگى قاعيداتتارىن ناسيحاتتاۋعا قىزمەت ەتەتىنىن ايتتى.
