وكىنىشكە قاراي, وڭىردەگى ەلدى مەكەندەردىڭ ينتەرنەت جەلىسىنە تولىقتاي قوسىلماۋىنا بايلانىستى بىرقاتار قيىندىقتار تۋىپ وتىر. كەيبىر وتباسىندا كومپيۋتەرلىك تەحنيكا جەتىسپەۋشىلىگى بار. راسىندا, 18 591 وقۋشى قۇرىلعىعا مۇقتاج ەكەن. اتقارۋشى بيلىك بۇل ماسەلەنى شەشۋگە شىنداپ كىرىسىپ جاتىر. ازىرگە 10 461 وقۋشىعا ۋاقىتشا پايدالانۋ ءۇشىن كومپيۋتەر بەرىلگەن. قالعان وقۋشىلاردى تەلەديدار ارقىلى وقىتۋعا شەشىم قابىلدانعان.
ال مۇعالىم مەن وقۋشى اراسىنداعى كەرى بايلانىس الەۋمەتتىك جەلى مەسسەندجەرلەرى مەن ەلەكتروندى پوشتا ارقىلى, ءتىپتى تسيفرلى بايلانىس جوق جەردە قاعاز جۇزىندە ورناماق. ياعني, تەلەديدار ارقىلى وقيتىن وقۋشىنىڭ ءۇي جۇمىسىن تەكسەرۋ ءۇشىن پوشتا قىزمەتى مەن ەرىكتىلەردىڭ ەڭبەگى پايدالانىلادى ەكەن.
- بۇگىن-ەرتەڭ ايماقتاعى جالپى ورتا ءبىلىم بەرۋ ۇيىمدارىنىڭ قاشىقتان وقىتۋعا كوشۋىنە قاتىستى دايىندىق جۇمىستارىن تولىق اياتايتىن بولامىز. وبلىس وقۋشىلارىن قاشىقتان وقىتۋ بويىنشا مۇعالىمدەر اراسىندا ءتۇسىندىرۋ جۇمىستارى جۇرگىزىلدى. ءبىلىم باسقارماسى تاراپىنان جالپى ورتا ءبىلىم بەرۋ ۇيىمدارىندا قاشىقتىقتان وقىتۋدى ىسكە اسىرۋ بويىنشا قادامدىق نۇسقاۋلىق ازىرلەنىپ, جۇمىس بارىسىندا Bilimland, DarynOnline, Edu Page, Zoom ءبىلىم بەرۋ پلاتفورمالارىن پايدالانۋ سىلتەمەلەرى جىبەرىلدى. اۋدان ورتالىعىنان شالعاي ورنالاسقان ەلدى مەكەندەردەگى ساباق «بالاپان» جانە «ەل-ارنا» تەلەارنالارى ارقىلى جۇرگىزىلمەك. الايدا, كەيبىر اۋىلداردا بۇل تەلەارنالار قولجەتىمسىز بولعاندىقتان, وبلىستىق «جەتىسۋ» تەلەارناسىنان ارنايى ۋاقىت ءبولىنىپ, جوعارىداعى 2 تەلەارنانىڭ تەلە-كورسەتىلىمى ەفيردەن بەرىلەتىن بولادى. قىسقاسى, جەتىسۋ ۇستازدارى ءتورتىنشى توقسانداعى ءبىلىم بەرۋ ءىسىن اقساتپاي, وقۋشىلارعا قاجەتتى ۇلاعاتتى بەرۋگە دايىن, - دەيدى الماتى وبلىستىق ءبىلىم باسقارما باسشىسى مايگۇل وماروۆا.
الماتى وبلىسى
