قوعام • 02 ءساۋىر، 2020

«جەدەل جاردەمنىڭ» جاۋجۇرەك دارىگەرى

480 رەتكورسەتىلدى

جۇقپالى ىندەتتىڭ الدىن الۋ جالپى قوعامنىڭ دا، جەكە ادامنىڭ دا تىكەلەي مىندەتى ەكەنى انىق. ەل بويىنشا جاريالانعان توتەنشە جاعداي مەن جەكەلەگەن ايماقتارداعى كارانتيننىڭ ەنگىزىلۋى، قاۋىپسىزدىك شاراسىنىڭ كۇشەيۋى كوروناۆيرۋس زاردابىنىڭ وتە اۋىر ەكەنىن ايعاقتايدى.

قازىر ادامزاتتىڭ كۇنى وقشاۋلانۋ مەن مەديتسينا قىزمەتكەرلەرىنە قاراپ تۇرعانى راس. اقيقاتىندا ينفەكتسيا تاراعان نۇكتەلەردە قايمىقپاي جۇمىس ىستەپ جۇرگەن دارىگەرلەرگە دەگەن قۇرمەت پەن سىي شەكسىز بولۋى ءتيىس. ىندەتتىڭ جاپپاي تارالۋىنا جول بەرمەۋ ءۇشىن ءارى دەرت جۇقتىرعان ناۋقاستاردىڭ ءومىرى ءۇشىن جانقيارلىقپەن جۇمىس ىستەپ جاتقان قازاق دارىگەرلەرىنىڭ ساپىندا الماتى وبلىسىنىڭ اق جەلەڭدى ابزال جاندارى دا بار. ايماقتاعى ەمحانا، اۋرۋحانالاردى ايتپاعاندا، سانيتارلىق بەكەتتەر مەن كارانتيندىك پوستاردا تاۋلىك بويى كەزەكشىلىك ەتىپ وتىرعان مەديتسينا قىزمەتكەرلەرىنىڭ ۇلكەن شوعىرى ءسات سايىن قاۋىپ پەن قاتەرمەن بەتپە-بەت كەلۋدە. قازىر وبلىس بويىنشا بارلىعى 103 پوست اشىلعان بولسا، ونىڭ ىشىندە 57 سانيتارلىق بەكەت جانە 46 كارانتيندىك بلوك-پوستتا كەمى ءۇش ماماننان قۇرالعان توپ جولاۋشىلاردىڭ دەنساۋلىعىن تەكسەرىپ، جاعدايدى قاداعالاۋدا. اسىرەسە، «جەدەل جاردەم» قىزمەتىنىڭ دارىگەرلەرى ۋاقىتپەن ساناسپاcتان ەڭبەك ەتىپ كەلەدى. ماسەلەن، جامبىل اۋداندىق ورتالىق اۋرۋحاناسى جەدەل جاردەم قىزمەتىنىڭ دارىگەرى گۇلنارا يبراگيموۆا انتىنا دال اق جەلەڭدى جاننىڭ ءبىرى.

وزبەكستاندا دۇنيە ەسىگىن اشقان گۇلنارا سامارقانداعى مەديتسينا ينستيتۋتىن بىتىرگەننەن كەيىن ءتۇرلى دەڭگەيدەگى ەمحانا، اۋرۋحانالاردا تالماي ەڭبەك ەتىپ كەلەدى ەكەن. تەراپەۆت دارىگەر اۋەلگىدە وزبەك توپىراعىنداعى تەرەز بەن قارشى ەلدى مەكەندەرىندە، كەيىنەن تاشكەن شاھارىندا گيپپوكرات انتىنا ادال بولىپ، ادام جانىنا اراشاشى بولا ءبىلدى. قازاقستانعا قونىس اۋدارعان جىلدارى الماتى قالاسىنىڭ جەدەل جاردەم قىزمەتىندە دارىگەر بولىپ ورنالاسقان. بىلىكتى ماماننىڭ كاسىبيلىگى قالاداعى قانشا ادامنىڭ ءومىرىن ساقتاپ قالۋعا سەپ بولعانىن ساناپ جاتۋ ارتىق بولار ەدى. ودان كەيىنگى ەڭبەك جولىن ۇزىناعاش اۋىلىندا، جامبىل اۋداندىق اۋرۋحاناسىندا جالعاستىردى. مۇندا دا سۇيىكتى ءىسى – جەدەل جاردەم قىزمەتىنە كەلدى. قازىر دە اۋدانداعى ۇزدىك دارىگەرلىك بريگادانىڭ مۇشەسى.

- وكىنىشكە قاراي، اۋماقتا جۇقپالى ىندەتتىڭ تارالۋ اۋماعى جىلدام ءوسىپ كەلەدى. بۇل تۇرعىنداردىڭ ومىرىنە تونەتىن قاۋىپتى ەسەلەي تۇسەدى. ادامدار وقشالاۋ تارتىبىنە قاراماستان قاۋىپسىزدىك تالاپتارىن ساقتاۋعا بەيىل ەمەس. مۇنداي جاعدايدا دارىگەرلەردىڭ جۇمىس اۋىرلاي بەرەدى. قازىر ءبىزدىڭ اۋداننان كوروناۆيرۋس جۇقتىرعان ناۋقاس انىقتالدى. قيىنى، ءبىز سول ناۋقاسپەن بەتپە-بەت كەلدىك. ساقتىق شاراسىن ساقتاۋ ءبىر باسقا دا، انتقا ادال دارىگەر بولىپ قالۋ ءبىر باسقا. ءوز باسىم كۇن سايىن قاۋىپكە باس تىگىپ، جۇمىسىن ادال اتقارىپ جۇرگەن ارىپتەستەرىمە باس يەمىن. تۇرعىندار دا مۇنى تۇسىنەدى. قازىر «جەدەل جاردەمگە» قوڭىراۋ سوعاتىندار سانى كوبەيدى. ءبىز بارىنە ۇلگەرىپ، ءار سانات بويىنشا كومەك كورسەتۋگە تىرىسامىز، - دەيدى  جامبىل اۋداندىق ورتالىق اۋرۋحاناسى جەدەل جاردەم قىزمەتىنىڭ دارىگەرى گۇلنارا يبراگيموۆا.

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار