قىمباتتى وتانداستار!
سىزدەردى قازاقستان رەسپۋبليكاسىنىڭ كونستيتۋتسياسى كۇنىمەن شىن جۇرەكتەن قۇتتىقتايمىن!
ەلىمىزدىڭ اتا زاڭى جاڭا قازاقستان جەتىستىكتەرىنىڭ بەرىك كەپىلىنە اينالدى. ءتيىمدى قۇقىقتىق جۇيەنى ورنىقتىرۋ ارقىلى ءبىز ەكونوميكالىق وسىمگە ءجانە قوعامنىڭ ءال-اۋقاتىنىڭ ارتۋىنا قول جەتكىزىپ, ەلىمىزدە تۇراقتىلىقتى, بەيبىتشىلىك پەن كەلىسىمدى قالىپتاستىردىق.
اكىمشىلىك جانە قۇقىقتىق رەفورمالار, جەرگىلىكتى ءوزىن ءوزى باسقارۋدى دامىتۋ, الەۋمەتتىك جاڭعىرتۋ – مۇنىڭ ءبارى بەرىك كونستيتۋتسيالىق نەگىزدە جۇزەگە اسىرىلۋدا جانە حالىقتىڭ ءومىر ءسۇرۋ دەڭگەيىن ودان ءارى ۇلعايتۋعا باعىتتالعان. ءبىزدىڭ سىرتقى ساياساتتاعى جۇيەلى باستامالارىمىز قازاقستاننىڭ حالىقارالىق بەدەلىنىڭ ۇدايى ءوسۋىن قامتاماسىز ەتۋدە.
بيىل ەلىمىز 2050 جىلعا دەيىنگى ۇزاق مەرزىمدى دامۋ ستراتەگياسىندا كوزدەلگەن ماقساتتاردى ىسكە اسىرۋعا كىرىستى. سونىڭ ەڭ باستىسى – قازاقستاننىڭ الەمدەگى ەڭ دامىعان 30 مەملەكەتتىڭ قاتارىنا ەنۋى. ستراتەگيانىڭ بارلىق ماقساتتارىنا قول جەتكىزۋ قازاقستاندىقتاردىڭ بىرلىگى مەن كونستيتۋتسيا قاعيدالارىن ءمۇلتىكسىز ورىنداۋ نەگىزىندە عانا مۇمكىن بولماق.
اتا زاڭنىڭ قاعيداتتارى مەن نورمالارىن ۇستانۋ, كونستيتۋتسيالىق قۇندىلىقتاردى قورعاۋ – ءاربىر ازاماتتىڭ قۇرمەتتى پارىزى جانە قاسيەتتى مىندەتى.
بارشا قازاقستاندىقتارعا يگىلىك پەن باق-بەرەكە تىلەيمىن! ءبىزدىڭ وتانىمىز – قازاقستان رەسپۋبليكاسى نىعايىپ, دامي بەرسىن!
نۇرسۇلتان نازارباەۆ.
