ءبىلىم • 02 ءساۋىر، 2020

QWANT ءبىلىم بەرۋ جوباسى اشىلادى

41 رەت كورسەتىلدى

تسيفرلىق ءونىم مەن قىزمەتتەر نارىعىنىڭ قازاقستاندىق سەگمەنتىنە ارنالعان باعدارلاماشىلار مەن ازىرلەۋشىلەردى دايىندايتىن QWANT ءبىلىم بەرۋ جوباسى 15 ساۋىردە اشىلادى.

تسيفرلى موبيلدىلىك پەن شەكارالاردىڭ اشىلعان داۋىرىندە تسيفرلىق ينفراقۇرىلىمنىڭ الەمدىك نارىعىمەن باسەكەلەسۋ كوپتەگەن ەلدەردىڭ كۇن تارتىبىنە ەنىپ وتىر. تسيفرلى ەكونوميكانىڭ بەلەڭ الۋىمەن اقپاراتتىق تەحنولوگيالار سالاسىنداعى تالانتتى ماماندارعا دا سۇرانىس ارتىپ وتىر. سول سەبەپتى «استانا» حالىقارالىق قارجى ورتالىعى بىلتىردان باستاپ احقو بيۋروسى نەگىزىندە باعدارلاماشى ينجەنەرلەر مەن ازىرلەۋشىلەرگە ارنالعان مامانداندىرىلعان باعدارلامانى جۇزەگە اسىرىپ وتىر. ونداعى باستى ماقسات حالىقارالىق سەرتيفيكاتتاۋ باعدارلامالارى مەن ءبىلىم بەرۋ تەحنولوگيالارى ارقىلى بىلىكتى مامان دايىنداۋ.

QWANT جوعارى تەحنولوگيا مەكتەبى ەۋروپا مەن اقش-تىڭ ەڭ ۇزدىك باعدارلامالاۋ مەكتەپتەرىنىڭ الدىڭعى قاتارلى تاجىريبەلەرىن قامتيتىن كرەمني القابىنىڭ تسيفرلىق پلاتفورماسى – QWASAR ارقىلى بىلىكتىلىك ارتتىرۋ مەن سۇرانىسقا يە كاسىپ مەڭگەرۋگە نيەتتى بارلىق ازاماتقا مۇمكىندىك ۇسىنادى.

QWANT-تىڭ وقىتۋ ادىستەمەسى تاجىريبەلىك ءبىلىم الۋ، ءوزارا باعالاۋ، جوبالىق باسقارۋ، گەيميفيكاتسيا جانە رولدىك مودەلدەۋ پرينتسيپتەرىنە نەگىزدەلگەن. وقۋ پروتسەسى جۇمىس بارىسىنا بارىنشا جاقىن ورتا قالىپتاستىرا وتىرىپ قۇرىلعان، ال باعدارلاماعا قاتىسۋشىلار بەرىلگەن تاپسىرمانى جەكەلەي دە، توپپەن دە ورىنداي وتىرىپ كۇن سايىن ماشىقتارىن شىڭداي تۇسەدى. سونىمەن قاتار وقۋ بارىسىندا باعدارلامالاۋ تىلىنە تەرەڭنەن بويلاي وتىرىپ، ءاربىر قاتىسۋشى اۆتوماتتى جۇيە ارقىلى ءوز ارىپتەستەرىنە باعا بەرىپ، ۇيرەتە الادى.

QWANT جوباسىندا وقىتۋشىلار مەن لەكتسيا جوق. جۇيەنىڭ ەرەكشەلىگى كەڭ قامتىلۋى مەن قاشىقتان جۇمىس ىستەۋگە مۇمكىندىك بەرۋىندە. بۇل وقۋ پروتسەسىنىڭ ساپاسىن ساقتاي وتىرىپ بارىنشا كوپ كانديداتقا پايدالى ءبىلىم بەرۋگە مۇمكىندىك بەرەدى.

6 اي بويى QWANT باعدارلاماسى بويىنشا سەرتيفيكات الۋ ءۇشىن ىرىكتەۋدەن وتكەن كانديداتتار مىنا سالالاردا ءوز ماشىقتارىن دامىتادى: قولدانبالى باعدارلامالاۋدىڭ ينتەرفەيسى، جاساندى ينتەللەكتى تاجىريبەلىك باعدارلامالاۋ، ۆەب-ينفراقۇرىلىم، ماشينالىق وقۋ، ءموبيلدى قوسىمشا. ۇمىتكەرلەرگە تالاپتار نەگىزگى ەكى پارامەترمەن قويىلادى: باعدارلامالاۋ نەگىزدەرىن ءبىلۋ جانە اپتاسىنا 40 ساعاتتان ارتىق ۋاقىت بويى بەلسەندى وقۋعا ىنتاسىنىڭ بولۋى.

الداعى ۋاقىتتا QWANT باستاۋىش باعدارلاماشىلار ءۇشىن دە، تسيفرلاندىرۋ مەن IT سالاسىنداعى باسشىلار ءۇشىن دە ۇسىنىلاتىن وقۋ باعدارلامالارىنىڭ ءتىزىمىن ايتارلىقتاي كەڭەيتەدى. پلاتفورماعا وسى سالاعا ماماندانعان جوو-لار، سونىڭ ىشىندە وڭىرلەردەگى ماماندانعان جوو-لار دا قوسىلا الادى.

«زەردە» ۇلتتىق ينفوكوممۋنيكاتسيا حولدينگى اق ءوزارا قول قويىلعان تۇسىنىستىك تۋرالى مەموراندۋم اياسىندا QWANT جوباسىن قولداۋعا نيەتتى. ونداعى ماقسات ەكونوميكانىڭ باسىم سەكتورلارىن ءتيىمدى تسيفرلاندىرۋعا باعىتتالعان ءبىلىم بەرۋ بويىنشا تسيفرلىق باستامالاردى دامىتۋ. سونىمەن قاتار حالىقتىڭ تسيفرلىق ساۋاتىن ارتتىرۋ مەن كاسىبي مامانداردى دايارلاۋ باعىتى بويىنشا «تسيفرلىق قازاقستان» باعدارلاماسىن ىسكە اسىرۋ شارالارى اياسىندا QWANT جوباسى جاڭادان باستاعان ادامدارعا باعدارلامالاۋ ماشىقتارىن جاپپاي ۇيرەتۋ كۋرسىن دا دايىنداپ جاتىر.

اي ورتاسىندا باستالاتىن ءبىرىنشى وقۋ باعدارلاماسىنا ءوتىنىم قابىلداۋ 4 ساۋىرگە دەيىن اشىق.

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار