ايماقتار • 02 ءساۋىر، 2020

Dolce farm تاۋلىگىنە 70 مىڭ دانا مەديتسينالىق ماسكا دايىندايدى

29 رەت كورسەتىلدى

الماتى وبلىسىنىڭ اۋماعىندا جۇقپالى ىندەتپەن كۇرەس شارالارى كۇشىنە ەندى. تالاپقا ساي ەندى ادامداردىڭ كوشەدە، جۇمىس ورىندارىندا مەديتسينالىق ماسكا تاعىپ ءجۇرۋى مىندەتتەلدى. بۇل ءتارتىپ قوعامدىق كولىك پەن جەكە كولىكتەگى جولاۋشىلارعا دا ورتاق. ال بۇل جاعدايدا بەتپەردەگە دەگەن سۇرانىس ارتاتىنى انىق. قازىردىڭ وزىندە وبلىس اۋماعىندا ماسكا تاپشىلىعى بايقالۋدا.

ارينە، وبلىستاعى ءوندىرىس ورىندارى مەديتسينالىق ماسكا ءوندىرىپ جاتىر. بارلىق اۋدانداردا  دا ەرىكتىلەردىڭ باستاماسىمەن ماسكا تىگۋ ءىسى قولعا الىنىپ، تۇرعىندارعا تەگىن تاراتىلۋدا. اكىمدىكتىڭ ىنتالاندىرۋىمەن جەكە ادامدار كوپ رەتتى تۇتىنۋعا بولاتىن ماسكا تىگىپ، ءتيىمدى باعامەن ساتۋدى جولعا قويعان. تەگىن تاراتىلاتىن ماسكا سانى دا ارتىپ كەلەدى. مۇنداي كومەك ءبىرىنشى كەزەكتە الەۋمەتتىك جاعىنان قورعالماعان وتباسى مۇشەلەرى مەن اتقارۋشى قىزمەتتە جۇرگەن ماماندارعا كورسەتىلىپ جاتىر. مىسالى، تەك ءبىر عانا قاراتال اۋدانىنىڭ وزىندە شاعىن بيزنەس وكىلدەرى، ءبىلىم مەكەمەلەرى مەن ەرىكتىلەر ءوز كۇشتەرىمەن تاۋلىگىنە 3 مىڭداي كوپ رەت پايدالاناتىن ماسكا تىگىپ وتىر. بۇل جۇمىس ىلە اۋدانىندا دا جولعا قويىلعان، وندا ءبىر تاۋلىكتە 20 مىڭ ماسكا دايىندالۋدا. ال تالدىقورعاندا جەكەمەنشىك اپتەكانىڭ باسشىسى 5 مىڭ ماسكانى حالىققا تەگىن تاراتقان.

جاقىندا وبلىس باسشىسى اماندىق باتالوۆ ماسكا تىگۋگە شاعىن بيزنەس نىساندارىنا مەملەكەتتىك تاپسىرىس بەرۋ جولىن ويلاستىرۋدى قاراستىرىپ، جەكە گيگيەنالىق قۇرالدارمەن تۇرعىنداردى جەتكىلىكتى مولشەردە قامتاماسىز ەتۋ ماسەلەسىن ودان ءارى شيراتۋدى تاپسىرعان بولاتىن. ال قازىر الماتى وبلىسىندا تاۋلىگىنە ازىرگە 136 مىڭ ماسكا شىعارىلۋدا.

مەديتسينالىق ماسكا ءوندىرىسىن جولعا قويعان كاسىپورىنىڭ ءبىرى ىلە اۋدانىنداعى Dolce farm كومپانياسى. سەرىكتەستىك تاۋلىگىنە 70 000 دانا بەتپەردە دايىنداپ، شىعارۋدا. ايماقتاعى مەديتسينا مەكەمەلەرىن بەتپەردەمەن قامتىپ وتىرعان كاسىپورىن قايىرىمدىلىق جاساۋعا دا بەلسەنە كىرىستى. الماتى وبلىسىنىڭ اۋماعىندا جۇقپالى ىندەتپەن كۇرەس شارالارى كۇشەيگەلى بەرى Dolce farm ءبىر عانا تالعار اۋدانىنا 17 000 دانا بەتپەردەنى تەگىن بەرىپتى.

-  وبلىستا ماسكا تاپشىلىعىن بولدىرماۋ ءۇشىن قولدان كەلگەننىڭ بارلىعىن جاساپ جاتىرمىز. سونىڭ ىشىندە «دولچە فارم» سەرىكتەستىگىنىڭ ءوندىرىسى توقتاۋسىز جۇمىس ىستەپ تۇر. تاۋلىگىنە 75 مىڭ داناعا دەيىن بەتپەردە شىعارۋعا قۋاتى جەتەدى. كۇنى كەشەگە دەيىن 159 مىڭ دانا مەديتسينالىق ماسكانى قابىلداپ الدىق، - دەيدى الماتى وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى رۋسلان قوجاسباەۆ.

سوڭعى جاڭالىقتار

ۇقساس جاڭالىقتار