مەملەكەت باسشىسى قاسىم-جومارت توقاەۆتىڭ حالىققا ارناعان جولداۋىندا قوعامدا «حالىق ۇنىنە قۇلاق اساتىن مەملەكەت» قاعيداسىن كەڭىنەن ناسيحاتتاپ, ساياسي جۇيەنى اشىق ءارى تۇرعىندارعا قول جەتىمدى باعىتقا قاراي بۇرۋ مىندەتى ايتىلعان ەدى. ونىڭ ىشىندە سىبايلاس جەمقورلىقپەن كۇرەسۋ ىسىندە مەيلىنشە جاريالى بولۋ تالابى كۇن تارتىبىنە شىعىپ وتىر. بۇل ماقساتتى جۇزەگە اسىرۋ ءۇشىن سىبايلاس جەمقورلىققا قارسى ءىس-قيمىل اگەنتتىگىنىڭ بارلىق ايماقتاعى دەپارتامەنتتەرىندە «Antikor» سەرۆيستىك قىزمەت كورسەتۋ ورتالىقتارى اشىلۋدا. تالدىقورعاندا ەسىگىن ايقارا اشقان ورتالىق تا ەندى وسى باعىتتا جۇمىس ىستەيتىن بولادى.
ورتالىقتىڭ اشىلۋىنا وبلىس اكىمى اماندىق باتالوۆ پەن سىبايلاس جەمقورلىققا قارسى ءىس-قيمىل اگەنتتىگى الماتى وبلىستىق دەپارتامەنتىنىڭ باسشىسى ەرنار ماقاجانوۆ قاتىستى.
- پرەزيدەنت قاسىم-جومارت توقاەۆ حالىققا ارناعان جولداۋىندا «حالىق ۇنىنە قۇلاق اساتىن مەملەكەت» قاعيداسى بويىنشا جۇمىس ىستەۋدى ايتتى. بۇل باعىتتاعى ەڭ ءبىرىنشى تالاپ – كورسەتىلەتىن قىزمەتتەردىڭ اشىقتىعى مەن حالىققا جاقىن بولۋى. ال سىبايلاس جەمقورلىقپەن كۇرەسۋ ۇنەمى باستى نازاردا. حالىقپەن تىكەلەي ارالاسىپ, مۇڭ-مۇقتاجىن تىڭداۋعا, ءتيىستى مەكەمە باسشىلارىمەن كەزدەسۋ وتكىزۋگە, تۇرعىنداردىڭ تالابىن ورىنداۋعا وسىنداي ورتالىقتار قىزمەت ەتۋى كەرەك. ءبىز وبلىس اۋماعىندا open space باعىتىندا جۇمىس ىستەيتىن ورتالىقتاردىڭ جۇمىسى جانداندىرا بەرەمىز, - دەدى ءوز سوزىندە وبلىس اكىمى اماندىق باتالوۆ.
الماتى وبلىسى
