ايماقتار • 01 ءساۋىر، 2020

نۇر-سۇلتاندا 1099 جۇمىسكەر الەۋمەتتىك جاردەماقى الدى

56 رەتكورسەتىلدى

نۇر-سۇلتاندا جۇمىسپەن قامتۋ ماسەلەلەرى جونىندەگى شتاب قۇرىلدى. مۇندا اقىسىز ەڭبەك دەمالىسىنا جىبەرىلگەن ازاماتتارعا الەۋمەتتىك جاردەماقىنىڭ تولەنۋىنە قاتىستى ونلاين كەڭەس الۋعا بولادى دەپ حابارلايدى ەلوردا اكىمدىگىنىڭ رەسمي سايتى.

بۇگىنگى تاڭدا شتابتىڭ قاراۋىندا 3 885 جۇمىسكەردى اقىسىز ەڭبەك دەمالىسىنا جىبەرگەن جۇمىس بەرۋشىلەر تاراپىنان 1104 ارىز جاتىر. 224 جۇمىس بەرۋشى تاراپىنان ماسق تولەمدەرىن الۋعا 1099 جۇمىسكەر جىبەرىلدى.

ەلوردا اكىمدىگىندە بەلگىلى بولعانداي، قازىرگى تاڭدا نۇر-سۇلتاندا اقىسىز ەڭبەك دەمالىسىنا جىبەرىلگەن ازاماتتارعا مەملەكەتتىك الەۋمەتتىك ساقتاندىرۋ قورىنان 1 ايلىق جالاقى مولشەرىندە جاردەماقى تاعايىنداۋ شارالارى باستالعان.

شتاب قۇرامىندا ايماقتىق «اتامەكەن» كاسىپكەرلەر پالاتاسىنىڭ، كاسىپوداق، مەملەكەتتىك كىرىستەر كوميتەتتەرىنىڭ، سونداي-اق، جۇمىسپەن قامتۋ جانە الەۋمەتتىك قورعاۋ، قالالىق ورتا ساپاسى مەن باقىلاۋ باسقارمالارىنىڭ وكىلدەرى بار.

توتەنشە جاعداي كەزىندە مەملەكەتتەن 42 500 تەڭگە مولشەرىندە الەۋمەتتىك تولەماقى الۋعا العاشقىلاردىڭ ءبىرى بولىپ بۋبنوۆسكي مەديتسينالىق كلينيكاسىنىڭ قىزمەتكەرلەرى ءوتىنىم بەرگەن.

ء«بىزدىڭ مەملەكەت كاسىپكەرلەرگە كومەك بەرۋگە قاتىستى دۇرىس شەشىم قابىلدادى. ءبىز ءوتىنىمدى جەدەل تۇردە جولدادىق. ەكى ساعات ىشىندە قانداي قۇجاتتاردى دايىنداۋ كەرەكتىگىن بىلدىك. ءبىزدىڭ قىزمەتكەرلەر كەشەدەن بەرى اتالمىش جاردەماقىنى الىپ جاتىر. ءبىزدىڭ پرەزيدەنتىمىزگە وسىنداي كومەگى ءۇشىن العىسىمدى بىلدىرگىم كەلەدى. بۇل – دەر كەزىندە جاسالعان جەدەل كومەك»، –دەدى كلينيكا باسشىسى ە.اداسباەۆ.

ەسكە سالايىق، قازاقستان پرەزيدەنتى قاسىم-جومارت توقاەۆ توتەنشە جاعدايدىڭ ەنگىزىلۋىنە بايلانىستى كىرىسىنەن ايىرىلعان ازاماتتارعا 1 ايلىق جالاقى مولشەرىندە جاردەماقىنى تولەۋگە قاتىستى شارالاردى جۇزەگە اسىرا باستاۋدى تاپسىرعان بولاتىن. مەملەكەت باسشىسى ءوز مالىمدەمەسىندە تابىسىنان ايىرىلعان ازاماتتارعا ەڭ تومەنگى جالاقى مولشەرىندە قولداۋ الاتىن ازاماتتاردىڭ ساناتىن كەڭەيتۋدى تاپسىرعىنانى ايتتى. «سوعان وراي، بۇل قولداۋعا ءوزىن-ءوزى جۇمىسپەن قامتىعاندار مەن رەسمي تىركەلمەي جۇمىس ىستەيتىندەر دە يە بولادى. بۇل كومەك بەلگىلەنگەن ءتارتىپ بويىنشا شىن مانىندە مۇقتاج ادامدارعا عانا بەرىلەدى»، - دەدى ول.

سوڭعى جاڭالىقتار

ۇقساس جاڭالىقتار